Нийгэм
2016.04.05 11:04

Гал унтрааж хүний амь аварсан жаалуудын нэг нь гал сөнөөгч болно гэжээ

Өнгөрсөн сарын 27-ны өдөр Хөвсгөл аймгийн Онцгой байдлын газарт Мөрөн сумын 9-р багийн 9-ийн 10 тоот айл шатаж байсныг хажууханд нь хөл бөмбөг тоглож байсан 8-12 насны дөрвөн хүү өчүүхэн биедээ баймгүй зориг гаргаж, галыг маш түргэн хугацаанд унтраасан гэдгийг өмнө нь манайх мэдээлж байсан. Гал гарах үед гэрийн эзэн хөгжлийн бэрхшээлтэй 58 настай иргэн Ц.Цэндсүрэн байсан бөгөөд хүүхдүүд галыг унтрааснаар түүний амь насыг гэрийн эд хогшлын хамт авран хамгаалсан.

Тус өдөр үүрэг гүйцэтгэж байсан Аймгийн Онцгой байдлын газрын Гал түймэр унтраах, аврах 27-р ангийн онцгой байдлын дэслэгч С.Ганболд захирагчтай 1-р салааны 1-р тасаг хаягийн дагуу шуурхай очиход таван ханатай монгол гэрт гарсан галыг тэд унтраачихсан байсан аж. Тиймээс Хөвсгөл аймгийн баатарлаг жаалуудыг аймгийн онцгой байдлын газар хүлээж авч уулзан талархал илэрхийлжээ. Тэдний нэг нь бүр том болоод гал сөнөөгч болно гэжээ.

Онцлох нийтлэлүүд