ӨДРИЙН СОНИН ҮНЭНИЙГ ХЭЛНЭ
Гадаад
2018.09.11 01:09

Жек Ма огцрохоо мэдэгдэв

Хятадын интернэт худалдааны томоохон төлөөлөгч болох “Алибаба” группийг үүсгэн байгуулагч Жэк Ма компанийнхаа захирлуудыг зөвлөлийн даргын албан тушаалаас огцорч буйгаа өчигдөр мэдэгдлээ. Түүний халааг гүйцэтгэх захирал Дэниэль Жан авах юм байна. Тэрээр ирэх оны есдүгээр сараас 10-нд үүрэгт ажилдаа орох юм байна. Юутай ч Жэк Ма албаа шилжүүлэх хүртлээ ТУЗ-ийн даргын албаа үргэлжлүүлэн хаших гэнэ. Тэрбээр гаргасан шийдвэрийнхээ талаар Хятадын твиттер гэгдэх “Weibo”-д жиргэхдээ “Алибабагийн бамбарыг Дэниэл болон түүний багийнханд шилжүүлэх үйл ажиллагааг эхлүүлсэн нь зөв цагт гаргасан зөв шийдвэр гэж үзэж байна. Дараагийн үеийн удирдагчдадаа бүрэн итгэж байна” гэв. Тэрээр цааш нь “Би боловсролын салбартаа эргэн орохыг хүсч байна. Миний хийх дуртай зүйл учраас маш их баяртай байгаа” гэжээ. Дашрамд дурдахад, Жек Ма 2020 онд болох компанийн хувьцаа эзэмшигчдийн хурал болох хүртэл удирдах зөвлөлийн гишүүн хэвээр байх аж. Тэрбээр интернэт худалдааны бизнест гайхалтай амжилтад хүрсэн нэгэн. Түүний компанийн нийт хөрөнгө 400 тэрбум ам.доллар гэх. Мөн дэлхийн томоохон компаниудын нэгт зүй ёсоор тооцогддог билээ.

Онцлох нийтлэлүүд