ӨДРИЙН СОНИН ҮНЭНИЙГ ХЭЛНЭ
Булангууд
2014.06.14 12:06

Жинхэнэ аз жаргал

Буддын ухаанд “Эсрэг тэсрэг мэдрэмж хэзээ ч зэрэг төрдөггүй” гэсэн философи бий. Уурлаж бухимдсан хүнд хэзээ ч энэрэл төрдөггүй,  хайр энэрэл сэтгэлийн гүнээс ундарсан агшинд уур цухалд орон зай байдаггүй гэсэн санаа л даа. Нэг ийм домог бий. Ад чөтгөрүүд бурхан багшийг хөнөөхөөр нум харваж л дээ. “Чөтгөрүүдийн харвасан сум бүр бурханы  биед хүрэлгүй цэцэг болон хувирч дэлбээлсэн гэдэг. Учир нь тэр үед Будда энэрэн нигүүлсэхүйн сэтгэлийг бясалгасан юмсанжээ” гэж домогт өгүүлдэг.  Энгийнээр ухвал ямар ч хүчтэй сөрөг зүйлийг эерэгт урвуулах онцгой шид хайранд бийг үлгэрлэсэн хэрэг. Бидэнд ч ийм хүч бий. Сэтгэлээ хайраар дүүргэж, зүрхний гүнээсээ хайр оргилуулж чадвал уур, бухимдал, атаа, зэвүүцэл ер хатуу хөтүү юунд ч үл ажрах хүчийг олно. Сэтгэлд нь нар гийсэн хүн  хэнд ч хатуу үг хэлэхгүй. Хэн рүү ч муухай харахгүй, дэргэдээ байгаа хүмүүст элдэв муу зан гаргахгүй. Ийм хүн рүү бас хэн ч муухай харахгүй. Эерэг сэдэл эерэг хандлагыг төрүүлнэ гэж үүнийг л хэлээд байгаа юм. Хүнийг бухимдуулахгүй, өөрөө ч бухимдахгүй амьдрах л жинхэнэ аз жаргал. 

Ц.БААСАНСҮРЭН

Онцлох нийтлэлүүд