Цаг үе
2020.10.30 05:10

Засгийн газар: Боршоо, Цагааннуур боомтуудыг ирэх сарын 2-ноос 21 хоног түр хаахаар боллоо

Засгийн газрын ээлжит бусаар хуралдаанаар Коронавирусийн эрсдэлийг бууруулах зорилгоор Увс аймгийн Боршоо, Баян-Өлгий аймгийн Цагааннуур боомтуудыг 21 хоног түр хаахаар шийдвэрлэлээ.

Шадар сайд Я.Содбаатар “Боршоо, Цагааннуур боомтыг 21 хоногийн хугацаатай хаах шийдвэр гаргалаа. Яагаад ийм шийдвэр гаргав гэхээр манай улстай хил залгаа байгаа ОХУ-ын бүс нутгуудад ковидын өвчлөл нэмэгдэж байна. Дэлхий нийтэд цар тахлын хоёр дахь давалгаа эрчимжиж, олон оронд хөл хорио тогтоож, хил гаалиа хаах онцгой байдал тогтоох нөхцөл байдал үүсэж байна. Сүүлийн өдрүүдэд улс хоорондын тээвэрт явж байгаа тээврийн жолооч нараас ковид илрэх байдал нэмэгдэж байна. Одоогоор 30 жолоочоос илрээд байна. Үүний хоёр нь өнгөрсөн шөнө Цагааннуур боомтоор ирсэн ОХУ-ын хоёр жолооч байлаа. Ковидын нөхцөл байдал амаргүй байна. Иргэд халдвар хамгааллын дэглэмээ сахихыг уриалж байна” гэв. Эрүүл мэндийн сайд Т.Мөнхсайхан “Дэлхий дахинд коронавирусийн нөхцөл байдал сайнгүй байна. Ялангуяа манай улстай хил залгаа нутгуудад халдварын тоо нэмэгдэж, нас баралт бүртгэгдсээр байна. Тиймээс Засгийн газар хилийн хяналтаа сайжруулах үүднээс зарим боомтуудыг хаах шийдвэр гаргалаа” гэсэн юм.

Онцлох нийтлэлүүд