ӨДРИЙН СОНИН ҮНЭНИЙГ ХЭЛНЭ
ЭНТЕРТАЙМЕНТ ЕРТӨНЦ
2015.12.26 04:12

Ирэх сард ямар кинонууд нээлтээ хийх вэ?

"ШУУГИАН ТАРИГЧ"

Нэгдүгээр сарын 1-нд буюу 2016 оны эхний өдөр нэгэн шинэ кино нээлтээ хийх юм байна. Тодруулбал, найруулагч Д.Галбаярын “Шуугиан таригч” уран сайхны киноны анхны трейлер цацагдаж эхэллээ.

Сонирхолтой нь энэхүү инээдмийн төрлийн киноны гол дүрийг найруулагч Д.Галбаяр өөрөө бүтээсэн бол киноны продюсероор түүний эхнэр Т.Хулан ажилласан байна. “Хайрын рекорд”, “Намрын синдром”, “Тагнуулч аав” зэрэг кинонуудыг найруулсан “Go Adventure” студийн захирал Галбаярыг жүжигчин Дашхүүгийн хүү гэдгээр нь хүмүүс мэдэх биз ээ. Тэрээр 2004 онд нэвтрүүлэг хийхээр төлөвлөж байсан санаагаа уран сайхны кино болгосон гэнэ. Уг киноны эмэгтэй гол дүрд “Зэрлэг цэцэгсийн хүлэмж” киноны Яргуйгийн дүрээр олонд танигдсан М.Бямбаа тоглож байгаа аж. Мөн жүжигчин Т.Бархүү, Х.Намуун, Э.Мөнхтөр, А.Өнөржаргал, Д.Энхбаяр, Ардын жүжигчин П.Цэрэндагва, Г.Мягмарнаран зэрэг уран бүтээлчид оролцон тогложээ. Уг кинонд нэгэн гудамжны архичин залуугийн амьдралд гэнэтийн аз ч юм уу хувь тохиол ч юм уу тохиож хөрөнгө мөнгөтэй нөлөө бүхий эрхэм болж хувирна. Энэ нь гол дүрийн залууд яг л зүүд шиг санагдах болно. Үйл явдал хэрхэн өрнөж хэрхэн шуугиан дэгдэхийг уг киноноос үзэх боломжтой аж.

“БИ ЭЭЖ БОЛМООР БАЙНА”

“Маск” продакшны залуу уран бүтээлчдийн шинэ бүтээл “Би ээж болмоор байна” уран сайхны кино энэ оны гуравдугаар сард үзэгчдийн хүртээл болох аж. Киноны найруулагчаар ах, дүү Г.Дарханбаяр, Г.Дарханбаатар нар ажиллаж байгаа бол зохиолыг Г.Дарханбат бичсэн байна. “Маск” продакшны жүжигчин Ц.Ганзориг, Ш.Жавхлан нар хамтран энэхүү уянгын инээдмийн төрлийн “Би ээж болмоор байна” уран сайхны киног бүтээж байгаа сурагтай. Учир нь хоёр жүжигчин энэхүү санаагаа 2002 онд оюутан байхдаа олсон ч продакшныхаа жүжиг болон бусад уран сайхны кинонд тоглоод тун завгүй байсаар өдий хүрсэн гэнэ. Харин киноны гол дүрийг жүжигчин Ш.Жавхлан бүтээж байгаа аж. Мөн түүнтэй хамт нэгэн дуучин бүсгүй тоглох юм байна. Одоохондоо уг дуучин бүсгүйг нууцалж байгаа гэсэн. “Би ээж болмоор байна” кино хүүхэд төрүүлэх боломжгүй бүсгүйчүүд болон үр хөндүүлж буй эмэгтэйчүүдийн асуудлыг хөндөх юм байна.

“ЗҮРХЭНД ТУССАН НУЛИМС”

“Морьтон энтертайнмент”, “35 фильмс”-ийн хамтын бүтээл “Зүрхэнд туссан нулимс” уран сайхны кино шинэ он гарангуут нээлтээ хийхээр төлөвлөжээ. Өнөөгийн нийгэмд газар авч буй гэр бүл салалт, эх үрийн хагацал, хүүхдийн хүчирхийллийг тусган харуулсан “Зүрхэнд туссан нулимс” уран сайхны киноны найруулагч, зохиолчоор Л.Ариунболд ажиллажээ. Гэр бүлийн салалтын гол хохирогч нь эцэстээ хүүхдүүд болдог тухай өгүүлэх уг киноны гол дүрийг М.Золжаргал, Б.Энхчимэг, Ж.Цовоо нар бүтээжээ. Мөн жүжигчин Б.Батзаяа, Д.Оюунтуул зэрэг уран бүтээлчид тогложээ.

"ОРООЛОН"

“Кино цамхаг” студийн “Ороолон” хэмээх аймшгийн кино мөн л ирэх сард нээлтээ хийх гэж байна. Тус студийн хувьд кино тэр дундаа аймшгийн төрлийн киногоор дагнан уран бүтээл хийдэг гэхэд болно.“Зоорь”, “Хүүхэлдэй” зэрэг кино уг студийн бүтээл юм. Дээрх хоёр киноны зохиолыг аймшгийн төрлөөр бичдэг зохиолч гэгддэг Ц.Ууганбаяр бичиж байсан бол “Ороолон” киноны зохиолыг тус студийн найруулагч Б.Цогт-Эрдэнэ бичжээ. Харин найруулагчаар жүжигчин Соёлын тэргүүний ажилтан Ө.Мөнгөнтулга ажиллаж байгаа аж. Хэсэг залуус цугларч шинэ оны баярын үдшийг хамтдаа өнгөрүүлэхээр шийднэ. Гэвч баяраа тэмдэглэх мөчид төсөөлшгүй эргэлт болно. Улмаар киноны сонирхолтой өрнөл, аймшигт үйл явдал руу хөтлөх байна. Кинонд СТА Д.Бямбацогт, СТА Б. Сарантуяа , “Зэрлэг цэцэгсийн хүлэмж” киноны гол дүрийн залуу болох жүжигчин Б.Энхтүвшин, жүжигчин Ц.Эрдэнэцэцэг, М.Батзориг, Э.Пүрэвжаргал, Г.Баярхүү, П.Солонго, Б.Эрдэнэхүү, Э.Билэгтмаа нар тогложээ. Мөн “Хүүхэлдэй” киноны арын албаны уран бүтээлчид дахин ажллажээ. Тодруулбал, нүүр хувиргагчаар make up artist Г.Хос-Эрдэнэ, Г.Сувд- Эрдэнэ, зураглаач М.Цэндлодой, дууны найруулагч Н.Бямбацогт, найруулагч Х.Түвшин нар ажиллаж байна. Киноны дууг реппер DESANT, дуучин SOLO нар хамтран дуулж байгаа аж.


Онцлох нийтлэлүүд