ӨДРИЙН СОНИН ҮНЭНИЙГ ХЭЛНЭ
Цаг үе
2015.04.28 09:04

Киногоороо бид гэр бүлийн хайр, нандин учралын тухай харуулахыг зорилоо

“Аврора” энтертайнментийн уран бүтээлчдийг бид “Зүрхэнд гэрэлтэх од”, “Дуудлага”, “Танхай тээгч” зэрэг уран бүтээлүүдээр нь таньдаг болсон. Тэгвэл тус хамт олон залуусын хайр сэтгэлийн тухай өгүүлэх “Учрал” нэртэй зургаа дахь бүрэн хэмжээний уран сайхны киногоо үзэгчдийн хүртээл болгоод байна. Хүн бүрийн сэтгэлийн нандин утсыг хөндөх тус киноны ерөнхий найруулагчаар Б.Чингүүн, хоёрдугаар найруулагчаар Ц.Золжаргал, зураглаачаар Г.Хосбаяр, хөгжмийн зохиолыг Л.Балхжав, С.Гантөр нар бичсэн бол гол дүрүүдэд О.Дөлгөөн, Т.Баттулга, Э.Алдар, Г.Анхмаа нар тогложээ. “Учрал” бүрэн хэмжээний уран сайхны киноны ерөнхий найруулагч Б.Чингүүнтэй цөөн хором ярилцлаа.

-Киноныхоо санааг хэзээ олов?

-Оны өмнө арванхоёрдугаар сарын үед бид шинэ кино хийе гэж төлөвлөөд “Учрал” киноны зохиолыг бичиж эхэлсэн. Тухайн үед “Танхай тээгч” бэлэн болгосон байсан. Нэгдүгээр сард “Танай тээгч” уран сайхны киног нээсний дараахан киноны зураг авалтанд орсон.

-Зураг авалт хэр удаан үргэлжилсэн бэ?

-Сар гарангийн хугацаанд зураг аваад дууссан.

-“Учрал” киноны зохиолын хувьд яриач. Нийгэмд юу үзүүлэхийг зорив?

-Зохиолоо ямар нэг ном, зохиолоос сэдэвлээгүй. Энгийн амьдралаас урган гарсан. Ямар ч хүний амьдралд хайр оршин тогтносоор л байдаг шүү дээ. Тэр утгаараа хайр бол мөнхийн сэдэв. Киногоороо бид гэр бүлийн хайр, нандин учралын тухай харуулахыг зорилоо. Үзэгчид киногоо үзээд дүгнэлт хийх байх.

-Дүр сонголтын хувьд ... ?

-Дүр сонголтын хувьд сэтгэл хангалуун байгаа. Ямар ч кинонд дүр чухал шүү дээ. Киноны гол дүрд О.Дөлгөөн, Т.Баттулга буюу Батуушка, Г.Анхмаа, Э.Алдар гэсэн дөрвөн залуу тоглосон. Харин туслах дүрүүдэд П.Цэрэндагва, Л.Дэмидбаатар, Б.Базаррагчаа, Ц.Ганзориг, Ш.Алтанцэцэг, Б.Баяржавхлан, Б.Шинэбаяр, Б.Мишээл нарын чадварлаг уран бүтээлчдийг сонгосон байгаа.

УЧРАЛ КИНОНООС РОМАНТИК МЭДРЭМЖҮҮДИЙГ МЭДЭРСЭН

“Учрал” киноны гол дүрийн залуу Ивээлийн дүрд тоглосон жүжигчин Т.Баттулгатай ярилцлаа.

-Киноны нээлтийн сэтгэгдлээ хуваалцаач?

-Маш сайхан байна. Киноны баг хамт олонд баярлалаа гэж хэлмээр байна. Ямар нэг урлагийн ажил дандаа хамтын бүтээл байдаг.

-Яагаад энэ кинонд тоглохоор болов?

-Дөнгөж он гарах үед киноны найруулагч Чингүүн маань надад санал тавьсан. Очиж уулзаад зохиолоо уншихад үйл явдал нь нүдэнд их гоё буусан л даа. Тэгээд тоглоё гэж бодсон. Миний хувьд 2015 оны анхны маань кино. Мөн хайр дурлалын кинонд анх удаа тоглолоо. Энэ жил уран бүтээлийн олз омог их байх нь гэж бэлгэшээж байгаа.

-Хайр дурлалын кинонд тоглох ямар байсан бэ?

-Мэдээж их гоё байсан. Ер нь дурлалт залуугийн дүрд тоглоё гэж боддог байлаа. Би найз охингүй болоод ч тэр үү бүтэн хоёр сар дурлалт бүсгүйтэй юм шиг явахад сэтгэлд их сайхан байлаа. Манай хамтлагийн дүү Дөлгөөн миний портнер болж тоглосон. Киноноос романтик мэдрэмжүүдийг маш сайхан мэдэрлээ дээ.

-Сургуулиа хэзээ төгсөж байв. Хэн хэнтэй суралцаж байсан бэ?

-2006 онд СУИС-ийг Н.Ганхуяг багшийн ангийг төгссөн. Манай ангийн олон залуус мэргэжлээрээ ажиллаж байгаа. Алтаншагай байна. Шинэ үеийн Ганбаа, Отгоо, Пароди хамтлагийн Нямка, “Х-түц”-д байсан Хулан гээд бүгд манай анги.

-Ажлын гараа хаанаас эхэлж байв?

-Ажлын гараа “Шинэ үе” продакшнаас эхэлж байсан. Оюутан байхдаа төгсөх курсэд ороод анхны жүжгэнд гарч байлаа. “Буруу эргэлт” гээд анхны кино маань мөн л “Шинэ үе”-ээс эхэлсэн. Миний анхны гэсэн бүх зүйл “Шинэ үе” хамтлагтай салшгүй холбоотой. Энэ дашрамд хэлэхэд Бооёо ахдаа маш их баярлаж явдаг шүү гэдгээ хэлье. Бооёо ахаасаа их юм сурсан шүү. Одоо ч гэсэн сурсаар л явна.

-Танд амьдралд баримталдаг зарчим бий юу?

-Амьдралд стресстээд байдаггүй минь миний давуу тал юм уу даа. Аль болох стрессгүй хөнгөн байдаг. Хямарсан ч аль болох өөр тийшээ өөрийгөө эргүүлж чаддаг.

-Залуу хүний хувьд үе тэнгийнхэндээ хандаж хэлэх үг байна уу?

-Адилхан залуу хүн юм чинь шүүмжлэл бол хэлмээргүй байна. Одооны залуус мундаг байна л даа. Анзаараад байхад залуус бие хаандаа ихээхэн анхаарал тавьж фитнесст явдаг болж. Архи дарснаас ч хол байдаг болсон байна.

-Та өөрөө хэр шоучин бэ?

-Би чухал гэсэн хүлээн авалт, хурим найранд гарч оролгүй яахав. Хүн л болсон хойно хааяа өөрийгөө тэгж баясгана шүү дээ. Зав гаргаад бүжиглэнэ, дуулна гээд хааяахан гарах үе бий.

-Таны өндөр, жин, дуртай өнгө гээд близ асуултанд хариулаач?

-Өндөр 182 см, жин 81 кг. Тэнгэр лүү харахад сэтгэл сэргээд сайхан байдаг учраас би “тэнгэр шиг” усан цэнхэр өнгөнд дуртай.

-Сүүлийн үед юу хийгээд байна?

-Манай Мөрөөдлийн театр хамтлагийнхан “Мөрөөдлийн баг дэлхийг аварна” гээд шоу ид дундаа тоглогдоод явж байна. Сүүлийн үед кино гэж яваад хамтлагийнхаа ажлыг жаахан цалгардуулсан. Одоо хамтлагийнхаа ажилд түлхүү анхаарч байгаа.

ЭНЭ КИНОГ ОРЧИН ЦАГИЙН РОМЕО ЖУЛЛьЕТтА ГЭЖ БОДОЖ БАЙГАА

Учрал киноны Намууны дүрд тоглосон жүжигчин О.Дөлгөөнтэй ярилцлаа.

-Учрал кино таны хэд дахь уран бүтээл вэ?

-Миний зургаа дахь бүрэн хэмжээний уран сайхны кино байх. Би энэ киног орчин цагийн Ромео Жульетта гэж үзээд байгаа. Амьдрал хүмүүсийн харилцааг харуулсан уран бүтээл болсон. Энэ удаад Намуун гээд гол дүрийн охинд тоглолоо. Би Аврора филмсийн залуустай анх удаа хамтарч ажиллаж байна л даа. Чадварлаг хамт олонтой хамтарч ажиллахад маш их таалагдсан шүү. Дээрээс нь дандаа залуу хүмүүс учраас илүү шинэ сэтгэлгээтэй санагдсан. Сар гаруй хугацаанд хамт байна гэдэг бага хугацаа биш. Бүгдээрээ хамт байгаад дассан байна лээ.

-Киноны санал тавьсан уу, зохиол нь ямар санагдсан бэ?

-Чингүүнээ ахыг ер нь богино хэмжээний киногоор мэддэг байсан л даа. Кинонууд нь өөрийн гэсэн өнгө, шийдлүүдийг чадварлагаар гаргаж байгаа харагддаг. Чингүүнээ ахыг “Учрал” кинонд тоглооч гэсэн санал тавихад их баярласан. Зохиолоо уншаад бүх их таалагдсан.

-Хэзээ сургуулиа төгссөн бэ. Анх яаж олны танил болж байв?

-2012 онд СУИС-ийн жүжигчний ангийг төгссөн. Анх Үндэсний телевизийн “Амьдралд тавтай морил” гээд 80 ангит киноны Золоогийн дүрээр олонд танигдаж байлаа. Тэр киноны багийхандаа маш их баярлаж явдагаа хэлмээр байна. Цаашлаад “Мөрөөдлийн театр”-тай хувь заяагаа холбосон. Хамтлагтаа ажиллаж байхдаа голоор нь хэд хэдэн уран сайхны кинонуудад тоглочихоод байна.

-Олны танил хүнээс охид үлгэрлэл авдаг байх. Биеэ авч явах тал дээр хэр анхаардаг вэ?

-Фэйсбүүк хуудас руу маань жаахан охид их юм бичдэг. Олны нүдэнд байнга харагдаж явдаг хүн учраас өөрийгөө зөвөөр авч явахгүй бол хүмүүс янз янзаар ярих тохиолдол зөндөө. Тэгэхээр хаана ч гэсэн биеэ аятайхан л авч явах шаардлага гардаг.

-Урлагийн хүнд өөрийн чинь ажлыг ойлгох хань чухал. Уншигчдадаа нөхрөө танилцуулахгүй юу?

-Манай нөхөр Гадаад харилцааны менежер мэргэжилтэй Очирпүрэв гэдэг залуу бий. Одоогоор хувиараа бизнес эрхэлж байгаа. Харьцангуй урлагаас хол, урлагийн хүн биш ч гэсэн намайг маш сайн ойлгож дэмждэгт нь баярлаж явдаг. Цаг наргүй ажилдаг намайг ойлгодогт ханьдаа баярлалаа гэж хэлмээр байна.

-Яаж танилцаж байв?

-Манай нөхөр “Next electronics”-т гадаад харилцааны менежер хийдэг байсан юм. Би “Next electronics”-ын нүүр царай нь болоод гэрээтэйгээр ажилладаг байхад нэг залуу байнга намайг хараад байдаг байсан. Тэр үед танилцсан даа. Бид хоёр одоо хөөрхөн хүүтэй болсон.

-Хүүхэд чинь их содон нэртэй юм билээ. Нэрийг нь хэн өгч байв?

-Хүүг маань Ивээлт-Од гэдэг. Нэрний хувьд Очирпүрэвийн О үсэг, Дөлгөөний Д үсгийг нийлүүлээд ямар ч байсан Од-той нэр өгнө гэж бодож байсан. Тэгээд л хоёулаа ярилцаж байгаад Ивээлт-Од гэж нэр өгсөн. Одоо миний хүү нэг ой өнгөрч байгаа.

-Охид бүсгүйчүүдэд сонин байх болов уу. Өндөр, жин, биеийн харьцаагаа хэлээч?

-Би 49 кг жинтэй, өндөр 163 см. Сүүлд үзэхэд өгзөгний тойрог маань 90 см байсан шүү.

-Залуусын амьдралын хэмнэл ямар байгаа юм шиг санагдаж байна?

-Залуустаа хэлэхэд ид залуу байгаа дээрээ завгүй байгаарай. Завгүй байвал маш их зүйлийг амжуулдаг юм шиг санагддаг. Миний хувьд бүх юм амжихгүй юм шиг мөртлөө гүйгээд байхаар их зүйл амжуулчихсан байдаг. Тэгэхээр ид эрч хүчтэй, энергитэй байгаа дээрээ завгүй амьдраарай. Эргээд харахад залуу насаа харамсахааргүй өнгөрөөх хэрэгтэй шүү дээ.

-Цахим ертөнцөд хэр идэвхтэй вэ?

-Фэйсбүүк, инстаграм гээд цахим ертөнцөд идэвхтэй. Би ч гэлтгүй бүх хүмүүсийн салшгүй хэрэглээ болж. Тэрийгээ л харахгүй бол болохгүй ч юм шиг болчихож. Дээрээс нь миний мэргэжилтэй уялддаг юм шиг санагддаг шүү. Хүмүүстэй илүү ойр харьцдаг. Олон хүмүүс надаас юм асуудаг. Тэр болгонд уулзаж чадахгүй болохоор фэйсбүүкээр хариу өгдөг.

-“Халз нүүрээ угаая аян” яваад байгаа. Өөрөө тэрэнд орсон байна лээ?

-Хүмүүс ямар бүтээгдэхүүн хэрэглэдэг вэ, арьсаа яаж арчилдаг вэ гэж фэйсбүүк, аск.мн-ээс их асуусан. Би хангуг косметикийн Монгол дахь нүүр царай болоод бүтээгдэхүүнийг нь хэрэглээд жил гаруй болж байна л даа. Үнэхээр миний арьсанд таардаг юм. Тиймээс тэр асуултуудад хариу өгч “Халз нүүрээ угаая аян”-д орж бичлэг хийж фэйсбүүктээ тавьсан. Бичлэгтээ өөрийнхөө хэрэглэдэг бүтээгдэхүүнээр нүүрээ яаж буддагаа үзүүлсэн. Тэрийг сонирхсон хүн л үзэх байх л даа.

-Яагаад Мөрөөдлийн театрт оров?

-Энэ бол хувь хүний сонголт л доо. Гуравдугаар күрсэд байхад минь “Мөрөөдлийн театр”-т орох уу гэсэн санал тавьсан. Оюутан байхад минь намайг голохгүй тайзны уран бүтээлд оруулсан ах нартаа маш их баярладаг. Тэр утгаараа надад их үүрэг хариуцлага ирсэн л дээ. Бүтэн драмын жүжгийг хүмүүс үзэх гэж ирнэ шүү дээ. Оюутан байсан учраас би тэр дүрд тоглож чадах болов уу гэсэн айдас байдаг байсан. .

-Тоглохыг хүсдэг дүр бий юу?

-Жүжигчний мэргэжлээр төгссөн охидууд Жульеттад тоглохыг мөрөөддөг. Миний мөрөөдөл бол драмын театрт Жульеттагийн дүрд тоглох.

-Сүүлийн үед юу хийж байна?

-Хамтлагийнхаа шинэ тог­лол­тод оролцож байгаа. Мөн ирэх зунаас шинэ киноны зураг авалтад орох гэж байгаа.

С.Ариунжаргал

Онцлох нийтлэлүүд