ӨДРИЙН СОНИН ҮНЭНИЙГ ХЭЛНЭ
Спорт
2017.09.16 11:09

Надад тун хэцүү байна. Сэтгэл, санаа булингартаад л…

Айзейя Томасын өдрийн тэмдэглэлээс.

Дэнниг (Дэнни Эйнж -“Бостон Селтикс” багийн ерөнхий менежер) залгах үед би машин жолоодоод явж байлаа. Эхнэр бид хоёр Майамид хуримын ойгоо тэмдэглэж хэд хоночихоод буцаж байсан үе. Машин барих үедээ ямар нэг зүйлд сатаараад дуудлагыг нь өнгөрөөчихөв. Дэнни удалгүй “IT боломжтой үедээ залгаарай” гэсэн мессэж үлдээжээ.
Дэнни бол “Селтикс”-ийн хамгийн чухал хүн нь шүү дээ. Түүнтэй тогтмол түмэн төрлийн хэрэгтэй, хэрэггүй асуудлуудаар байнга ярьж байдаг тул нэг их ач холбогдол өгсөнгүй , шууд л машин жолоодож байх үедээ залгалаа. Тэр намайг наран шарлагын газар амарч, гэр бүлтэйгээ тэмдэглэлт ойгоо өнгөрөөчихөөд ирж байгааг мэдэж байсан тул тэр тухай асууж би хариуд нь түүний гэр бүлийн талаар мэнд мэдэж, ерөнхийдөө жижүүрийн “буу халалт” хийж дуусаад гэнэт чимээгүй болчихов. Тэгээд тэр огцом “Би чамайг сольчихлоо” хэмээн ниргэдэг юм даа.
Тун энгийн. Элдэв чимэглэл, энээ тэрээ байхгүй. Ер нь иймэрхүү новшийн зүйл хийх үед олон үг хэлэх шаардлага гардаггүй юм байлгүй. Хэсэг хугацаанд ярих чадвараа алдсан би түр азнаад “хаашаа вэ” гэж ганцхан үг л унагаж чадсан санагдана.
Дэнни-“Кливленд рүү. Кайригаар”
Танд хэн нэгэн хүнтэй утсаар удаан ярих үед толгойд чинь “утсаа тасла, одоо болно” гэх мэдрэмж хэзээ ч юм төрж байсан тийм үү. Яг тийм мөч намайг эзэмдэж байлаа. Учир нь Дэнни цочмог мэдээллийнхээ дараа намайг Бостонд том байсан талаар, чи алтан гургалдай, чамайг Кливлендэд дардан зам, гайхамшигт замнал хүлээж байгаа гэх мэт чалчих үлгэрийг зогсоох боломжгүй “үлээж” эхэлсэн. Харин би түүний энэ үлгэрийг зогсоох гэж хэсэг оролдоод болоогүй тул яриан дундуур нь шууд л “залгасанд баярлаллаа, өөр хэлэх зүйл алга” гээд утсаа тасалсан.
Дуусаа. Хувь заяаг өөрчилсөн утасны дуудлагын утга ийм л байлаа. Эхний ээлжинд гэр бүлийнхээ талаар бодов. Эхнэр Кайли бид хоёр тухайн үед хоёулаа явж байсан тул ээжийнд орхисон хүүхдүүддээ энэ мэдээг хурдан хэлэх хэрэгтэй гэдгийг ойлгосон. Учир нь тун удахгүй бүх хэвлэл мэдээллийн хэрэгслэлээр шуугиж эхлэх бөгөөд тэр мэдээлэл дотор хүүхдийн ухамсрыг цочроох худал хуурмаг зүйл өчнөөн бичигдэх тул өөрөө эхэлж тэдэнд дуулгах ёстой гэдгээ ухамсарлав. Дэнни чи арай ч дээ. Хичээлийн улирал эхлэх гэж байна шүү дээ. Хүүхдүүд Надад тун хэцүү байна. Сэтгэл, санаа булингартаад л…маань өөр хот руу шинэ сургуульд яаж дасна даа.
Том хүү Жэймс маань олон зүйл асууж гайхсангүй, шууд л “Хаашаа вэ? Аав аа” гэсэн.
“Кливленд рүү. Ааавыг нь Кайригаар сольчихжээ”
“Аа, аав аа та Леброн Жэймстэй хамт тоглох юм байна шүү дээ. Пөөх, Лебронтой шүү”
Харин бага хүү Жэйден дуугаа хураачихаад айсан нүдтэй зогсоод байлаа. Тэр их мэдрэмтгий бас Бостон хотод ухамсарт амьдрал нь өнгөрсөн тул хэцүү байгаа бололтой.
“Жэйден чи баярлаж байна уу, гуньж байна уу”
“Аав аа би явмааргүй байна. Кливлендэд манайх шиг тоглоомын талбай байхгүй”
Хэдэн цагийн дараа бүх хэвлэл, мэдээллээр миний солилцооны тухай зар мэдээ пижигнэж эхэлсэн дээ. Твиттэр хуудас, фэйсбүүк, гар утас руу хичнээн ч дуудлага ирсэн бэ бүү мэд. Өрөвдсөн, өршөөсөн, заналхийлсэн, уучилсан үгнүүд, мэдэх, мэдэхгүй мэргэжилтэнгүүдийн ухаантай царай гарган анализ хийх бичлэгүүд надад ямар ч нөлөө үзүүлээгүй ээ. Хоёрхон хүний сэтгэгдэл надад хангалттай. Том хүүгийн маань “пөөх, Леброн” гэх авиа энэ цаг үеийн шилдгийн шилдэг сагсан бөмбөгчтэй хамт тоглох болжээ гэдгийг илэрхийлсэн. Түүнтэй хамт дахин Дорнод бүсийн аваргын төлөө тоглох юмсан, лигийн аваргын төлөө өрсөлдөх ч боломж бий гэсэн өөдрөг үзлийг бэлэглэлээ. Харин бага хүүгийн маань “гунигтай байна” гэдэг үг одоогийн бодит байдал дээр минь аваачих юм. Чөтгөр ав гэж. “Селтикс” чамайг би их удаан үгүйлэх нь дээ. Бас яг одоо надад тун хэцүү байна. Намайг наймаалчихлаа гэж үү. Сэтгэл санаа булингартаад асар хэцүү байна. Энд ямар ч хувийн өш хонзон байхгүй, зүгээр л бизнес явагдаж байна гэдгийг мэдэвч хөлс, цусаа урсган үнэнчээр зүтгэсэн он жилүүдийг бодитоор үнэлж болсонгүй юу гээд бодохоор асар их уур хүрч байна.
Д.БАТ-ЭРДЭНЭ

Онцлох нийтлэлүүд