ӨДРИЙН СОНИН ҮНЭНИЙГ ХЭЛНЭ
Булангууд
2018.09.19 01:09

Хэлбэр загвар нь сунаж, хувирдаг цахилгаан машин

Хүн ам болон автомашины бөөгнөрөл ихтэй их хотын амьдралын хэв маягт тохирсон тээврийн хэрэгслийн концепцууд технологи сонирхогчдын дэмжлэгийг авах нь улам нэмэгдсээр байгаа. Энэ хүрээнд автомашин үйлдвэрлэгчид хотын авто замын тээврийн хэрэгслийн хөдөлгөөнд оролцоход зориулагдсан хөнгөн, жолоодоход хялбар машин бүтээх ажилдаа аль хэдийнээ ороод эхэлсэн. Эдгээрээс хэлбэр загвар нь сунаж, хувирдаг цахилгаан машиныг онцолж байна. Үүнийг зохион бүтээгчид нь “IEV XX” гэж нэрлэжээ.

Сүүлийн үед дэлхийн томоохон автомашин үйлдвэрлэгч компаниуд хотын авто замын хөдөлгөөнд зориулсан нэг хүний багтаамжтай жижиг загварын цахилгаан машин бүтээхээр түлхүү ажиллах болж. Үүнд нэг асуулт урган гарч ирж байгаа. Энэ бол жижигхэн машинд хэрхэн овор ихтэй ачааг тээвэрлэх вэ гэж. Тэгвэл үүний хариултыг Дюссельдорфын инженерийн багийн зохион бүтээгчид хувирагч машины концепцоороо танилцуулсан байна. Өмнө нь энэ машины IEV X гэх анхны хувилбарыг танилцуулж байсан.

Харин одоо бол IEV XX хувилбар бидний нүдний өмнө харагдаж байна. Зорчигчдын тоо, ачааны овор хэмжээнээс шалтгаалаад урагш сунаж эзлэхүүнээ нэмэгдүүлдэг цахилгаан машин гэж тодорхойлбол илүү ойлгомжтой байх. Энэ машин хувираагүй үедээ өргөн нь 78 см, урт нь 160 см. Харин урагш сунаж, хувирсан үедээ бол өргөн нь 190 см, урт нь 220 см хүртэл нэмэгддэг байна. Энэ бол жижиг загвартай автомашины эзлэхүүнтэй холбоотой асуудлыг шийдэж өгсөн өвөрмөц санаа юм. Урд талын жолоочийн ард байрлах зорчигчийн суудал эвхэгддэг. Ингэснээр ачаа, тээш багтаах эзлэхүүн нь улам нэмэгдэнэ. Жингийн хувьд 115-145 кг юм байна.

Өөртөө 48-72 вольтийн аккумлятортой. Энэ нь 3 цагийн турш 60-120 км зам туулах бололцоог олгодог байна. хөдөлгөөнд оролцож байхдаа 45-60 км цагийн хурдтай давхидаг юм. Цэнэглэхийн тулд 40-60 ватт багтаамжтай нарны зайн хураагуурыг ашиглана. Үүнийг автомашинаа зогсоолд байршуулах цагаа ашиглан хийж болно. хяналтын хэсэгт 7 инчийн ухаалаг дэлгэцтэй болж өгсөн. Зохион бүтээгчдийн талаас энэ автомашинд 9098 ам.долларын үнийн саналыг буулгаад байгаа юм байна.

Онцлох нийтлэлүүд