ӨДРИЙН СОНИН ҮНЭНИЙГ ХЭЛНЭ
Нийгэм
2015.03.23 07:03

Хүслийн самбар

“Хүссэн юм хүзүүгээр татна” гэсэн үг байдаг. Үнэхээр “Мөрөөдөл биелдэг юм” гэдгийг амьдрал дээр харвал хичнээн сайхан бэ. Сүүлийн үед “Хүслийн самбар”-ын тухай ярих боллоо. Өөрийнхөө хүсэл мөрөөдлийг нүдэндээ байнга харж байх санаа юм даа. “Хүслийн самбар”-аа хүн өөрөө бүтээдэг болохоор мөрөөдлөө тодорхойлох хэрэгтэй болно. Мөрөөдлөө тодорхойлсон хүнд зорилгобий болох учиртай. Зорилго бий болчихоор түүндээ хүрэх төлөвлөгөө гаргах хэрэгтэй болно. Зорилгодоо хүрэх үе шатуудаа бодитой, нарийн төлөвлөж чадвал өглөө бүр мөрөөдөлдөө нэг шатаар дөтлөнө гэсэн үг.

Хүслийн самбараа бүтээхдээ өөрийн мөрөөдлийг илэрхийлж чадах зурагнуудыг сэтгүүлээс, энд тэндээс хайж олох учиртай гэнэ. Таны мөрөөдлийн байшин, эсвэл машин, сурахыг хүсдэг сургууль, очихыг хүсдэг газар орон хаа нэгтэй байж л таараа. Энэ бүхнийгээ хайж олоод, “Хүслийн самбар”-аа бүтээснийхээ дараа өөртөө байнга харагдах газарт түүнийгээ байрлуулах учиртай. Хүн мөрөөдлөө нүдэндээ байнга харж байх нь далд ухамсарт нь нөлөөлдөг гэсэн үзэл санаабайдаг. Таталцлын хуулийн тухай ч яриа бий. Хүн үнэхээр хүссэн юмаа далладаг гэдэг. Тэгэхээрта бидний “Хүслийн самбар” сайн сайхан мөрөөдлөө нүдэндээ байнга харж, түүнийхээ тухай бодож, төлөвлөж, хүсэл мөрөөдөлдөө хүрэхийн тулд юу хийснээ, юу хийх хэрэгтэйг маань сануулах болно. Хүн бүр л хүсэл мөрөөдөлтэй байдаг. Өдөр тутмын ажилд дарлуулж, амьдралд нухлагдсаар мөнөөх хүсэл маань мөрөөдөл төдий үлдчихвэл гунигтай. Хүслээ нүдэндээ харж, өдөр бүр түүндээ нэг шатаар дөтлөөрэй. Бид мөрөөдлөө мартахгүй бол бурхан бидэнд туслах буй за.

Б.ЯНЖМАА

Онцлох нийтлэлүүд