ӨДРИЙН СОНИН ҮНЭНИЙГ ХЭЛНЭ
Онцлох нийтлэл
2017.05.19 06:05

Ч.Хүрэлбаатар: Сэхээтэн, оюунлаг хүмүүс нь хар тамхи хэрэглээд эхэлбэл улс орон мөхдөг түүх бий

УИХ-ын чуулганы үдээс хойших хуралдаанаар УИХ-ын гишүүн О.Баасанхүүгээс Монгол Улсын Ерөнхий сайд Ж.Эрдэнэбатад хандан “Хар тамхи, мансууруулах бодистой холбоотой гэмт хэргийн тоог бууруулахчиглэлээр Засгийн газраас авч хэрэгжүүлж байгаа арга хэмжээний талаар” тавьсан асуулгын хариуг сонсож дууслаа.

Асуулгатай холбогдуулан гишүүд асуулт асууж, энэ асуудлыг анхаардаг агентлаг, яам, сайд, дарга нараас хариулт авлаа.

УИХ-ын гишүүн Ч.Хүрэлбаатар: Хар тамхи, мансууруулах бодистой холбоотой асуудал дээр зовоож байгаа зүйл бол хандлага байгаа. Жилээс жилд хэрэглэгчдийн тоо өсч байна. Хил гааль ийм чөлөөтэй болчихсон үед цаашдаа нэмэгдэнэ. Сэхээтэн, оюунлаг хүмүүс нь үүнийг хэрэглээд эхэлбэл улс орон мөхдөг түүх байна. Тиймээс энэ тэмцэлд зарчмын байр суурь барьж ажиллах хэрэгтэй гэж бодож байна. Улстөрчдийн хүүхдүүд гэмт хэрэгт орооцолдсон, амиа хорлосон гэх юм. Үнэн ч юм уу худлаа ч юм уу. Хар тамхи гэр бүл, найз нөхдийн харьцааг сүйтгэж байна. Тиймээс хар тамхитай тэмцэх тэмцлийг бага дээр нь дарах ёстой. Хөрш орнуудаас голчлон дамжиж орж ирж байгаа байх. Энэ тал дээр хэрхэн хамтарч ажиллаж байна вэ. Шөнийн цагаар ажилладаг баар цэнгээний газрууд үүнийг даамжруулаад байх шиг байна. Энэ байгууллагуудтай хамтарч ажиллаж байгаа хөшүүрэг байгаа юу.

УИХ-ын гишүүн Б.Баттөмөр: Зөөвөрлөөд байгаа хар тамхи хоёр хөршөөр л орж ирж байгаа. 80 орчим хувь нь урд хөршөөс, үлдсэн хувь нь ОХУ-аас орж ирж байгаа. Гурван жилийн өмнө Солонгосоос дамжин өнгөрөх явдал байсан. Хөрш улсуудтай хэрхэн харьцаж байна вэ гэсэн асуудал дээр Хөх хоттой хамтарч ажиллаж байгаа. Тодорхой хугацаанд мэдээ, мэдээллээ солилцдог. Мөн тэдний мэдээлэл дээр үндэслэн хар тамхи зөөвөрлөж байгаа бүлэглэлүүдийг тогтоож илрүүлэх хамтын ажиллагаа явагдаж байгаа.

Хил орчмын байгууллагуудтай хамтарч байна. Эхний ээлжинд мэдээ, мэдээлэл солилцох тал дээр л ажиллаж байна. Боловсон хүчнийг сургах асуудал хамтын ажиллагаан дээр явагдаж байгаа. Диско баарны эздийн зүгээс мэдээлэл ирээд байдаггүй. Хар тамхинаас үүдээд хүний биед ямар өөрчлөлт орох, гэмт хэрэгт орооцолдож болох тал дээр бид урьдчилан сэргийлэх арга хэмжээ авч байгаа.

Эрүүл мэндийн сайд А.Цогцэцэг: Хар тамхинаас урьдчилан сэргийлэхийн тулд Колумбын хөтөлбөрийг барья гэсэн бодлого баримталж байгаа. Ялангуяа боловсролын системд сурч байгаа өсвөр насны хүүхдүүдийн хувьд мансууруулах бодистой тэмцэх хичээлийн программыг оруулаад явахаар тооцсон байгаа. Колумбын хөтөлбөрт орчихвол 16 багц урьдчилан сэргийлэх янз бүрийн чиглэлээр байгууллагуудын ажилчдад сургалтууд явуулах зэрэг ажлууд хийгдээд явна. Сэтгэхүйтэй ажиллавал таван хувь л эдгэрдэг өвчин. Тиймээс урьдчилан сэргийлэх л чухал.

Хууль зүй, дотоод хэргийн сайд С.Бямбацогт: Өмнө нь баячуудын хүүхэд ихэвчлэн хэрэглэдэг. Ял авсан ч тэнсэн аваад гараад ирдэг байсан. Үүнийг өөрчилж байгаа. Үнэхээр гэмшээд илчилсэн хүн байвал ялыг хөнгөлөх бодлогыг оруулж өгсөн. Ер нь бол уян хатан, цаашид дэлгэрүүлэхгүй байх арга хэмжээг авсан. Бидний ярьж байгаа санал бодол маань ирэх долоо хоногт шийдэгдэнэ. Мөн энэ тал дээр зарцуулах мөнгө хөрөнгөний хэмжээ тодорхой болох байх. Цаашдаа ДОХ гэдэг зүйлийг ярьсаар байгаад жигшүүлсэн шиг хар тамхийг ч бүх нийтээрээ хамтран жигшүүлэх байх гэж найдаж байна гэв.

Үүний дараа Засгийн газарт асуулга тавьсан УИХ-ын гишүүн О.Баасанхүү хэлэхдээ: Миний тавьсан асуулгын хариуг ингэж судалж, хэлэлцүүлэг хийж байгаад талархаж байна. Энэ бол ноцтой асуудал. 2016 онд 48, одоогийн байдлаар 51 тохиолдол бүртгэгдээд байна. Тоо баримтаас харахад цаашид ч өсөх хандлагатай байна. Хуучин энэ гэмт хэрэг 10-15 жилийн ялтай байсан. Өмнө нь кг хар тамхи бэлдэж, хадгалсан бол 10 жилийн ял өгдөг байсан. Энэ хуулиар таван жил болжээ гэж байв.

Асуулгын хариуг сонссоноор өнөөдрийн УИХ-ын чуулганы нэгдсэн хуралдаан өндөрлөв.

О.ӨНӨР

Онцлох нийтлэлүүд