ӨДРИЙН СОНИН ҮНЭНИЙГ ХЭЛНЭ
Спорт
2018.07.04 11:07

Швед 24 жилийн дараа шөвгийн наймд шалгарав

Хөлбөмбөгийн дэлхийн аварга шалгаруулах тэмцээний шөвгийн наймд үлдэх эрхийн төлөөх тоглолтууд өнгөрсөн шөнө явагдлаа. Урьдчилсан шатны тэмцээнд дэлхийн дөрвөн удаагийн аварга Италийг хожиж эрхээ өвөртөлсөн Швед энэ удаа Швейцарийн багтай Санкт-Петербург хотын "Санкт-Петербург" цэнгэлдэх хүрээлэнд тоглов. Энэхүү тулаанд Шведын шигшээ баг довтлогч Эмил Форсбергийн гоолоор Швейцарийг ялж шилдэг найд шалгарчээ.

Ширүүн өрсөлдөөнтэй явагдсан тоглолтын эхний үе гоолгүй өндөрлөсөн. Швейцарийн баг бөмбөг эзэмшилтээр давуу байсан ч Шведийн хамгаалалтыг сэтэлж хараахан чадсангүй. Жердан Шакири, Рикарду Родригес нар гоолынболомж үүсгэж байсан ч гоол оруулж чадаагүй.

Харин хоёрдугаар үеийн 66 дахь минутанд Форсберг гоолдсон нь багаа хожилд хөтөлсөн юм.

Шведийн шигшээ баг энэ тэмцээний хамгийн зохион байгуулалт сайтай багаар тодорч байна. Тэд энэ удаагийн тоглолтыг оруулаад гурван тоглолтод гоол алдсангүй. Шведийн хаалганд Германы баг хоёр гоол оруулсан билээ. Шведийн баг хамгийн сүүлд 1994 оны ДАШТ-нээр шөвгийн наймд шалгарсан юм.

О.ДАШНЯМ


Онцлох нийтлэлүүд