2021.01.08 10:01

Цар тахлын улмаас Японд 80 мянган хүн ажилгүй болжээ

Нийтлэлч: Өдрийн сонин

Японд коронавирусийн цар тахлын улмаас өнгөрсөн онд 80100 орчим хүн ажлын байраа алдсан гэж тус улсын Хөдөлмөрийн яам өнөөдөр мэдээллээ.

Өнгөрсөн оны нэгдүгээр сарын эцсээс энэ долоо хоногийн лхагва гараг хүртэл 80100 хүн ажлын байраа алдахад хүрээд байна гэж яамны тайланд тэмдэглэжээ. Гэвч уг тайлан холбогдох байгууллага, ажилд зуучлах төвүүдийн мэдээллийг хамарч байгаа тул бодит үзүүлэлтийг дээр дурдсанаас өндөр байгаа гэж үзэж байна.

Японд 2020 оны арванхоёрдугаар сарын 25-ны байдлаар үйлдвэрлэлийн салбарт 17 мянга орчим ажилтан, зоогийн газрын үйлчилгээний салбарт 11 мянган ажилтан, жижиглэн худалдааны салбарын 10 мянга гаруй ажилтан, зочид буудлын салбарын 9600 ажилтан ажилгүй болжээ.

Мөн Токио хот болон эргэн тойрны мужуудад пүрэв гаргаас онцгой байдал тогтоох гэж байгаатай холбоотойгоор ажилгүй хүмүүсийн тоо улам нэмэгдэж болзошгүйг үйлдвэрчний эвлэлүүд анхааруулсан байна. Харин Хөдөлмөрийн яам ажлын байраа хадгалахын тулд Засгийн газрын татаасын хөтөлбөрт хүсэлт гаргахыг компаниудад уриалжээ. Мөн яамны тайлан цар тахал хүмүүсийн орлогод хэрхэн нөлөөлж буйг харуулсан бөгөөд 11 дүгээр сарын байдлаар цалингийн хэмжээ найман сар дараалан буурсан дүн үзүүлсэн байна. Хөдөлмөрийн яамны мэдээллээр, сарын дундаж цалин 2700 ам.долларт хүрсэн нь өмнөх оны мөн үеийнхээс 2.2 хувиар буурчээ. Зарим фирм хямралын улмаас урамшууллаа ихээр бууруулсныг мэргэжилтнүүд онцолжээ.