ӨДРИЙН СОНИН ҮНЭНИЙГ ХЭЛНЭ
Гадаад
2019.05.29 12:05

"Lenovo" нугардаг дэлгэцтэй компьютерын загварыг танилцуулав

Хятадын Lenovo компани дэлхийн анхны нугардаг, уян дэлгэцтэй зөөврийн компьютерын загварыг танилцууллаа.

Уг бүтээгдэхүүн 2020 онд ThnikPad X1 брэндийн нэг хэсэг болж зах зээлд хүрэх юм гэнэ. Тус зөөврийн компьютер нь 13.3 инчийн хэмжээтэй, 4:3 харьцаатай, 2K OLED дэлгэц нь нугалсны дараа хатуу хавтастай номны хэмжээтэй болдог байна. Хагас дэлгэсэн үедээ 13 инчийн зөөврийн компьютер болох бөгөөд дэлгэцний нэг хагас нь гарны товчнууд бүхий самбар болж хувирах юм. Харин бүрэн дэлгээд тусгай суурь дээр байрлуулж, гар, хулгана залгавал All-in-one загварын ширээний компьютер болж хувирна. Үүнээс гадна тусгай үзэг ашиглан таблет болгон ашиглаж боломжтой.

Туршилтын шатанд яваа уг компьютерын дэлгэрэнгүй үзүүлэлтүүдийг Lenovo компани одоогоор нууцалж байгаа юм. Уг бүтээгдэхүүнийг зах зээлд гаргах хугацаа, үнэ зэрэг мэдээлэл тодорхой болоогүй байна. Дизайн, хийцийн хувьд ч бэлэн болоогүй ба туршилтын загвараа тодорхой хүрээнийхэнд танилцуулжээ.

Б.САРУУЛ


Онцлох нийтлэлүүд