ӨДРИЙН СОНИН ҮНЭНИЙГ ХЭЛНЭ
Соёл урлаг
2020.07.01 06:07

The Hu хамтлаг шинэ басс гитарчинтай болжээ

The Hu хамтлагийн басс гитарчин Б.Батхүү өөрийн хүсэлтээр хамтлагаасаа гарч, түүний оронд Б.Нямдаваа гэх шинэ хөгжимчинтэй болжээ. Тэрбээр "Аадар" хамтлагийн басс гитарчин байжээ.Тэд зургадугаар сарын 29-нд Улсын онцгой комисст хандив өргөх "ГЭРЭГ" тоглолтын үеэр шинэ басс гитарчинтай тоглолтоо хийжээ.

Тус хамтлаг найман гишүүний бүрэлдэхүүнтэй бөгөөд дөрөв нь үндсэн нүүр царай болж, бусад нь арын албанд хөгжимддөг. Хамтлагийн ахлагч Ц.Галбадрах аянга морин хуур, хархираа хөөмийдөх үүргийг гүйцэтгэнэ. Харин төмөр хуур, цуур, хөөмийг Г.Нямжанцан, гал морин хуур, хөөмийг Б.Энхсайхан, товшуур хөгжмийг Н.Тэмүүлэн, хэнгэрэгийг М.Өнөмөнх тоглодог. Үүн дээр метал хөжим буюу Соло гитарыг А.Жамбалдорж, басс гитарыг Б.Батхүү тоглож байв. Үндсэн гишүүдээс гадна Ц.Надмидтулга, Брэндон Фрайзен нар хамтлагийн менежерээр ажилладаг аж.

“The Hu” хамтлагийн гишүүд Монгол Улсын Соёл урлагийн их сургууль болон Монгол Улсын Консерваторийг дүүргэсэн бөгөөд бүгд рок болон этник рок хамтлагуудад тоглож байсан мэргэжлийн уран бүтээлчид юм.Хамтлаг 2016 онд байгуулагдсан ч хамтлагийн гишүүд хөгжмийн зэмсгээ эзэмших, хөөмийлөх чадвараа сайжруулахад олон жилийг зориулсан аж.

Б.МӨНХДУЛАМ

Онцлох нийтлэлүүд