ӨДРИЙН СОНИН ҮНЭНИЙГ ХЭЛНЭ
Эдийн засаг
2020.05.19 11:05

Алт олборлолт 2.1 дахин өсч, нүүрсний экспорт нэмэгдээд байна


Аж үйлдвэрийн салбарын нийт үйлдвэрлэл энэ оны эхний дөрвөн сард урьдчилсан гүйцэтгэлээр 4.1 их наяд төгрөг болсон нь өмнөх жилийнхтэй харьцуулбал 1.3 их наяд төгрөгөөр буураад байгаа юм. Уул уурхай, олборлох аж үйлдвэрийн салбарын үйлдвэрлэл 1.3 их наяд төгрөгөөр, боловсруулах аж үйлдвэрийн салбарын үйлдвэрлэл 65.1 тэрбум төгрөгөөр тус тус буурсан нь голлон нөлөөлжээ. Өнгөрөгч сард Гашуунсухайт, Шивээхүрэнгийн боомтоор өдөрт дунджаар 400 машин нүүрс экспортолж байсан бол тавдугаар сар гарснаас хойш нүүрсний экспорт нэмэгдээд байна. Гашуунсухайт, Шивээхүрэнгийн боомтоор өдөрт 700 гаруй машин нүүрс экспортолж байна.

Оны эхнээс тавдугаар сарын 10-ны өдөр хүртэлх хугацаанд нийт 4.6 сая тонн чулуун нүүрсийг 374.5 сая ам.доллараар экспортлоод байна.

Энэ нь өнгөрсөн оны мөн үетэй харьцуулахад биет хэмжээгээр 2.7 дахин бага, мөнгөн дүнгээр 2.8 дахин бага үзүүлэлт юм. Зөвхөн тавдугаар сар гарснаас хойш 482 мянган тонн чулуун нүүрс экспортолжээ.

БУРГАСТАЙ БООМТООР ЖИЛД ДУНДЖААР 1-1.16 САЯ ТОНН ТӨМРИЙН ХҮДЭР ЭКСПОРТОЛДОГ

Улсын Онцгой комиссоос гаргасан төмрийн хүдрийн экспортын тээвэрлэлтийг эхлүүлэх шийдвэрийн дагуу “Хилийн боомтыг түр хаах, нэвтрэх хөдөлгөөнийг хязгаарлах” тухай Засгийн газрын 39 дүгээр тогтоолд өөрчлөлт оруулж, Бургастай-Лаоемяо боомтыг нээгээд байна.

“Алтайн хүдэр” ХХК-ийн уурхай сар бүр Говь-Алтай, Ховд аймгийн 38 иргэн, аж ахуйн нэгжүүдээс 8.6 тонн мах, 560 литр сүү, сүүн бүтээгдэхүүн, 11.7 тонн хүнсний ногоо зэрэг ахуйн хангамжийн бараа материалын худалдан авалт хийж, уурхайчдын хоол хүнсэнд ашигладаг байна. Мөн дээрх орон нутгийн ханган нийлүүлэгч жижиг, дунд үйлдвэрлэгч иргэн, аж ахуйн нэгжүүдэд сард 152 сая төгрөгийн төлбөрийг шилжүүлдэг бөгөөд тус боомт нээгдсэнээр уурхай ажиллаж, улмаар экспорт сэргэн, орон нутгийн иргэдийн орлого нэмэгдэх зэрэг ач холбогдол ихтэй.

Говь-Алтай аймгийн Цээл сум дахь Бургастай боомтоор "Алтайн хүдэр" ХХК жилд дунджаар 1-1.16 сая тонн төмрийн хүдэр экспортолж, Улсын төсөвт 15.7 тэрбум төгрөг, орон нутгийн төсөвт нэг тэрбум төгрөг төвлөрүүлсэн байна.

МОНГОЛБАНКИНД ТУШААХ АЛТНЫ ХЭМЖЭЭ НЭМЭГДЖЭЭ

Монголбанкинд тушаасан алтны хэмжээ нэмэгджээ. Өнгөрсөн оны мөн үетэй харьцуулахад 20 гаруй хувиар нэмэгдэхэд дараахь хоёр хүчин зүйл нөлөөлсөн гэж үзжээ. Нэгдүгээрт, коронавирусийн халдварын тархалттай холбоотойгоор алтны үнэ дэлхийн зах зээл дээр өссөнөөс аж ахуйн нэгжүүд үнэ өсөхийг нь хүлээн хадгалж байсан алтаа тушааж эхэлсэн байна. Хоёрдугаарт, коронавирусийн нөлөөгөөр хилийн хорио цээрийн хяналт сайжирч, зорчих хөдөлгөөн буурсан зэрэг нь алтыг хууль бусаар хил гаргах боломжийг хязгаарласан нь Монголбанкинд тушаах алтны хэмжээг нэмэгдүүлсэн байх талтай аж.

Улсын хэмжээнд оны эхний дөрвөн сард алт олборлолт өмнөх оны мөн үеэс 2.1 дахин өсөөд байна.

65 МЯНГАН ТОНН ГАЗРЫН ТОСОЛ БОРЛООД БАЙНА

Монгол Улсын хэмжээнд энэ онд 6.6 сая баррель буюу 890.000 тонн газрын тос олборлон экспортод гаргаж, газрын тосны орлогоос улсын төсөвт 335.6 тэрбум төгрөгийн орлого төвлөрүүлэхээр төлөвлөсөн.

Сүүлийн мэдээгээр улсын хэмжээнд 479311 баррель буюу 65463 тонн газрын тос олборлож, 359355 баррель буюу 46174 тонн газрын тос экспортолж 21.3 тэрбум төгрөгийн орлого хуримтлуулаад байна.


Онцлох нийтлэлүүд