Өдрийн сонин үнэнийг хэлнэ
Шаамар сумын хэмжээнд хүлэмж барих 600 сая төгрөгийн хүсэлтийг шийдвэрлэв DNN.mn Улаанбаатарт шөнөдөө 3 хэм дулаан DNN.mn Аки башёд Тамаваши Б.Мөнх-Оргил түрүүллээ DNN.mn Сэлэнгэ аймагт үр тариа хураалт 12.8 хувьтай байна DNN.mn Зүрхний хавхлагыг нөхөн сэргээх мэс заслын шинэ технологийг нэвтрүүлж байна DNN.mn Г.Бямбасүрэн:Алтанбулаг боомтоор ОХУ-ын 3000 гаруй иргэн орж ирсэн DNN.mn Алтанбулаг боомтоос цаг үеийн асуудлаар мэдээлэл хийж байна DNN.mn "The Hu" хамтлаг "Aim Awards"-т нэр дэвшжээ DNN.mn DNN-ФОТО СУРВАЛЖИЛГА : Автомашингүй өдөр DNN.mn ОХУ-ын иргэн монгол залуугийн толгойг алхаар цохиж гэмтээжээ DNN.mn Шаамар сумын хэмжээнд хүлэмж барих 600 сая төгрөгийн хүсэлтийг шийдвэрлэв DNN.mn Улаанбаатарт шөнөдөө 3 хэм дулаан DNN.mn Аки башёд Тамаваши Б.Мөнх-Оргил түрүүллээ DNN.mn Сэлэнгэ аймагт үр тариа хураалт 12.8 хувьтай байна DNN.mn Зүрхний хавхлагыг нөхөн сэргээх мэс заслын шинэ технологийг нэвтрүүлж байна DNN.mn Г.Бямбасүрэн:Алтанбулаг боомтоор ОХУ-ын 3000 гаруй иргэн орж ирсэн DNN.mn Алтанбулаг боомтоос цаг үеийн асуудлаар мэдээлэл хийж байна DNN.mn "The Hu" хамтлаг "Aim Awards"-т нэр дэвшжээ DNN.mn DNN-ФОТО СУРВАЛЖИЛГА : Автомашингүй өдөр DNN.mn ОХУ-ын иргэн монгол залуугийн толгойг алхаар цохиж гэмтээжээ DNN.mn
Булангууд
2021.11.28 09:11

Г.Алтаншагай: ”Улсын тэргүүний уран сайханч” дүрдээ би маш их хайртай

-МӨРӨӨДЛИЙН АМЬДРАЛАА ӨӨРӨӨ БҮТЭЭЖ, ЦОГЦЛООЖ ЯВНА ДАА-


“Мөрөөдлийн театр”-ын жүжигчин Г.Алтаншагайтай ярилцлаа.


-“Мөрөөдлийн театр”-ынхан 10 жилийн ойгоо яаж тэмдэглэх вэ?

-“Мөрөөдлийн театр” 2011 оны арваннэгдүгээр сарын 7-нд Оросын алдарт зохиолч А.В.Ванпиловын “Ууган хүү” жүжгээс сэдэвлэсэн “Миний нууц хүү” жүжгийг анх Соёлын төв өргөөнд тоглож байсан. Тэр цагаас хойш арван жил өнгөрчээ. Энэ хугацаанд бидэнтэй хамт байсан үзэгчиддээ ойн баярын мэнд хүргэе. Энэ бол зөвхөн “Мөрөөдлийн театр”-ын уран бүтээлчдийн гэхээсээ манай тоглолтыг үздэг, дэмждэг үзэгчдийн маань хамтын баяр гэж ойлгож байгаа. Ойдоо зориулаад энэ сарын 26-нд бид “Ub palace”-т хошин урлагийн нэгдсэн тоглолтыг хийхээр бэлтгэж байна. Мөн “Мөрөөдлийн театр”-ынхаа 10 жилийн ойд зориулаад бид шинэ жилийн баярын богино хэмжээний контент хийхээр зураг авалтаа эхлээд байна. Ойн баярын нэвтрүүлэг маань удахгүй зурагтаар гарч эхэлнэ.

-Хүндэтгэлийн тоглолтод хошин урлагийн бусад уран бүтээлчид оролцоно гэсэн шүү дээ. Юу үзүүлж харуулах бол?

-Хамтлагууд шилдэг номеруудаа тоглох байх. Манайхаас гадна “Шинэ үе”, “Маск”, “Эмоци” продакшн, “Аглуу” энтертайнмент, хошин элэглэлийн “Пароди” хамтлаг шилдэг номеруудаа хүргэнэ. Бидний хувьд өмнө нь тоглож байсан шоу драм тоглолтуудаасаа түүвэрлэж, үзэгчиддээ хүргэнэ. Мөн дуучид, уран бүтээлчид урилгаар ирж ая дууныхаа дээжээ өргөх юм. Ойрд тайзан дээр гараагүй хамтлагуудын хувьд үзэгчдийн хүсэн хүлээсэн сайхан тоглолт болно гэж найдаж байна.

-Яагаад “Мөрөөдлийн театр” гэж нэрлэсэн бэ?

-Хүн болгоны зүрхэнд ойрхон байдаг, амьдралыг хүчтэй, тэмүүлэлтэй, зорилготой болгодог зүйл мөрөөдөл. Хүмүүс мөрөөдлийнхөө төлөө хөдөлмөрлөдөг. Хязгааргүй орон зайд уран бүтээлээ туурвих юмсан гэсэн залуусын мөрөөдлөөс үүдээд хамтлагаа “Мөрөөдлийн театр” гэж нэрлэсэн. Бидний туйлын мөрөөдөл байсан учраас “Энэ бол бидний мөрөөдлийн театр” гэж бодож нэрлэсэн юм.

-Анх өрх тусгаарлахдаа амжилтад хүрэх болов уу гэж санаа зовж байв уу?

-Байлгүй яах вэ. Г.Эрхэмбаяр бид хоёр Драмын театрт тав, зургаан жил ажиллаад тусдаа гарсан. Тэр үед зоригтой шийдвэр гаргасан. Залуу уран бүтээлчдийн хувьд босго өндөртэй Драмын театраас гарна гэдэг маш эрсдэлтэй шүү дээ. “Хүмүүс Драмын театрт орох гэж тэмүүлдэг байхад та хоёр гарах нь зөв үү” гэж ойр дотны улсууд маань зөвлөж байсан л даа. Тэгээд өөрсдийн хүчийг сорьё. Хувийн продакшн байгуулаад үзье гэдэг тэмүүлэлдээ хөтлөгдөөд гарсан л даа. Тэр үед бас хүн үзэх билүү, үгүй билүү , олны танил болж амжаа ч үгүй байсан цаг хугацаа. Зориглоод гарахад маш эрсдэлтэй алхам байлаа. Олон хүнээс зөвлөгөө авч байв. Найруулагч Н.Наранбаатар ахтай бид ойрхон байдаг. “Та хоёр шантралгүйгээр сайн ажиллаарай” гэж урам өгсөн л дөө.


-Таныг театраасаа гарахад эхнэр чинь яаж хүлээж авсан бэ?

-Эхнэр маань телевизийн хүн. Том хүү маань жаахан байсан учраас ажлаасаа хөндийрсөн байсан. Тэр үед нь би бас хамтлаг байгуулна гээд гэр бүлдээ анхаарч амжихгүй, эхнэр маань ар гэрээ 100 хувь хариуцах болсон л доо. Хамтлагийн маркетингийг бас давхар хариуцаж байсан. Нэг салбарт ажилладаг хүний хувьд дэмжиж хүлээж авсан л даа.

--Таны эхнэрийг хүмүүс мэднэ дээ. Олны танил телевизийн сэтгүүлч С.Насанжаргал. Та эхнэрийнхээ араас их “гүйсэн” үү?

-Бид хоёр 2009 оноос хойш бие биенээ таньдаг болсон. Хамтдаа олон шинэ жил хөтөлж байлаа. Тэр үед “найраад”, “эргүүлээд” улам дотноссон. Би уран бүтээлээ телевизээр нь гаргадаг. TV-5 телевизийн баярын хөтөлбөрүүдэд их оролцоно. Тэгээд л нэг мэдэхэд дотно болсон л доо.

-Танд шинэ жил хөтлөх урилга ирж байгаа гэсэн үү?

-Хоёр жил шинэ жил тэмдэглээгүй болохоор монголчууд маань энэ баяраа их санасан юм шиг байна. Албан байгууллагуудаас их ярьж байгаа.

-Шинэ жилийн контентынхоо тухай сонирхуулаач?

-Ойдоо зориулаад шинэ жилийн контент кино гаргах юм. Шинэ жилийн адал явдал, хөгжилтэй түүхийг харуулна. “Боловсрол” телевиз, “Хүлэгү пикчерс”-тэй, “Мөрөөдлийн театр”-ынхан хамтарсан контент юм.

-Хөл хорионы цаг хугацааг яаж өнгөрүүлэв?

-Энэ хугацаанд ер нь завгүй байлаа. Телевизийн олон контент, уран сайхны кинонд тоглолоо. Одоо бас “Боловсрол” телевизийн 16 ангит “Хавтаст хэрэг” кинонд гол дүрд тоглож байгаа. Энэ кино маань нэгдүгээр сарын 15-наас “Боловсрол” телевизээр үзэгчдэд хүрэх юм. Энэ хугацаанд бас хувийн уран бүтээлдээ анхаарч, зохиол бичиж, продакшн, кино компаниудтай хамтарч арав гаруй уран бүтээл дээр ажилласан. Өөрийгөө дайчилж ажиллалаа.

-“Хавтас хэрэг”-т ахмад Идэрийн дүрд тоглосон гэсэн. Үзэгчид өөрийг чинь өөр өнцгөөс харах нь ээ?

-Миний тоглодог дүрүүдийн 60-70 хувь нь инээдмийн жанр байдаг бол ахмад Идэр бол мөрдөн байцаагч залуугийн дүр. Өөрийгөө “эвдэж”, арай өөр талаас нь харуулахыг хичээсэн.

-Хүү чинь бас кинонд тоглоод эхэлжээ?

-Би хоёр хүүтэй. Бага хүү маань олон киноны урилга хүлээж авсан. Өөрөө бас тэр тал руугаа сонирхолтой. Хоёр хүү маань “Сингл лейдис” кинонд тоглож байсан. Манай хамтлагийн “Одод болохын хүслэн” байна. Манай бага саяхан нээлтээ хийсэн “Том тоглоом” кинонд бас тоглосон. Удахгүй бас нэг кино нь дэлгэцэнд гарах юм. Уран бүтээлч аав, ээжийн хүүхдүүд учраас тоглолтын бэлтгэл дээр хамтдаа байдаг. Хөшигний ард “Мөрөөдлийн театр”-ын тоглолтыг үзээд, аавынхаа ажил дээр байдаг учраас хүүхэд энэ тал руугаа сонирхолтой болчихдог юм билээ.

-Таны аав сумын клубын эрхлэгч байсан гэлүү?

-Аав маань клубийн эрхлэгчээр олон жил ажилласан. Аавыгаа дагаад урлагт хайртай дуртай болсон доо. Хүүхэд байхдаа тайзан дээр өссөн. Багаасаа урлагийн хүн болно гэж бодож, мөрөөдөж явсаар СУИС-ийн жүжигчний ангид орж байлаа.

-Аавтайгаа хамт тоглосон номер байдаг уу?

-Байдаг. Бага байхад маань шог гараа гэж тоглодог байлаа. Багадаа аавтайгаа хамт “Ганцхан Чойжоо” гэдэг номерт тоглож байв.

-Таны “Улсын тэргүүний уран сайханч” их амьдралтай дүр л дээ. Магадгүй тийм орчин байсан болохоор илүү мэдэрсэн болов уу?

-Тийм тийм. Суманд насаараа урлагийн байгууллагад ажиллачихсан тийм улсууд их байдаг шүү дээ. Тэд маань хөдөөд соёлыг түгээж байгаа чухал улсууд. Гавьяа шагнал нь “Улсын тэргүүний уран сайханч”-аас хэтэрдэггүй. Гэсэн ч урлагтаа хайртай. Насаараа сум, орон нутгийнхнаа баясгаж, урлагаар тэжээж явдаг улсуудын дүрийг гаргахыг хичээсэн. Яг л миний аавын мэргэжил юм даа. Тэр дүр маань их үнэмшилтэй болсон шиг байгаа юм. Тухайн үедээ үзэгчдэд их хүрсэн. Энэ дүрдээ би хайртай байдаг. Намайг анх хүмүүсийн танил болгосон дүр л дээ.

-Та сүүлийн үед жингээ барих гээд хичээж байгаа гэсэн үү?

-Жингээ барих гэж хичээж, яг 80 кг-д бариад байна. Сүүлийн үед хоол ундаа зөв зохистой тааруулж, хоолны дэглэм барьж байна. Эрүүл мэнддээ анхаарах цаг болсон байна.

-Ааруул, лимонтой ус ууж байгаа гэсэн үү, ямар нэгэн өвөрмөц жор байдаг уу?

- Айхавтар жорсоод байх юу байх вэ. Ус сайн уудаг, 18 цагаас хойш хоол идэхгүй байхыг хичээдэг. Гурил хэрэглэхгүй. Тийм л дэглэм барьдаг.

-Та цаг зав багатай уран бүтээлчийн ажлын хажуугаар гэр бүлдээ хэрхэн цаг гаргадаг вэ?

-Хүүхдүүдээ аль болох хичээлд нь хүргэж өгч, авахыг боддог. Заримдаа яалт ч үгүй амжихгүй, өөрсдөө сургуулийнхаа автобусаар явна. Ер нь надад “Завгүй байна” гэдэг утгагүй үг шиг санагддаг. Цаг завыг өөртөө заавал гаргаж байх ёстой. “Завгүй байна” гээд байвал завгүй л байгаад байна. Цагаа зөв зохицуулж чадвал ямар ч их ажилтай үед цаг гаргаж болдог. Гэр бүлдээ цаг гаргаж, аль болох хүүхдүүдтэйгээ монгол наадгай, шагай, даам тоглож, агаар салхинд алхаж, цуг тоглож байхыг боддог. Аль болох цаг гаргаж хамт байвал хүүхдүүд өөртөө итгэлтэй болдог. Гэр бүлтэйгээ хамт байхыг боддог. Заримдаа зураг авалттай үед оройтож очихоор манай гэрийнхэн унтчихсан байдаг л даа.

-Та хоёр бол олны танил хосууд. Ингэхэд та “баздаг” уу, “базуулдаг” уу?

-Эр хүн бол эхнэрээ хүндэлж байх ёстой. Хайр, хүндлэл хоёр дээр л гэр бүлийн нандин харьцаа оршдог байх. Түүнээс биш “базна”, “базуулна” гэдэг харьцангуй ойлголт шиг байгаа юм. Нөгөө талаасаа хүндлэл юм болов уу гэж боддог шүү дээ.

-Нэг хэсэг хөл хорионд суусан болохоор тоглолтын бэлтгэл их хийж байгаа юу?

-Ойрд ажил ихтэй байгаа. “Хавтаст хэрэг” киноны зураг өдөр болгон авч байна. Дээр нь хамтлагийн 10 жилийн ой давхцаад, шөнө, оройн цагаар хувийн продакшн, хамтлагийнхаа бэлтгэл сургуулилтыг хийж байна. Өдөр нь киноныхоо зураг авалтад орж байна. Одоо ч 20 цагт хамтлагийнхан маань лайв хийх гээд цугласан байна. Лайвын дараа бэлтгэл сургуулилт хийх юм. Урилга тараах, хамтлагуудтайгаа нэгдсэн бэлтгэл хийх, шинэ жилийн киноны маань зураг авалт эхэлнэ гээд маш их ажилтай арваннэг, арванхоёрдугаар сар өнгөрөх юм шиг байна.

-Одоо танай хамтлагт хэн хэн байна?

- Манай Эрхэмээ, Сөрөлт, Ганбаа, Отгоо, Алдармаа, Намуунаа байна. Залуу уран бүтээлч дүү нар маань бий. “Мөрөөдлийн театр” хориод хүний бүрэлдэхүүнтэй ажилладаг. Манайд ажиллаж байсан Ааяа эгч, Навчаа, Батаа, Дөлгөөн маань бүгд л ойдоо ирж тоглоно.

-Та хэдийгээр жүжигчин хүн ч хамтлаг авч явахад удирдагчийн ур чадвар шаардаж байгаа байх л даа?

-Хамтлаг удирдана, манлайлна гэдэг тусдаа авьяас шаарддаг шиг байгаа юм. Хүүхэд байхаасаа нийгмийн идэвхи, санаачилгатай сурагч байсан учраас тэр дадлаараа л явж байгаа. Түүнээс биш Удирдлагын академид ч юмуу удирдахуйн ухаанд суралцсан юм алга. (инээв)

-Дараагийн уран бүтээлээ яаж төсөөлж байгаа вэ?

-Он гараад Ц.Балдорж гуайн зохиол “Шөнө буусан аадар” драмын жүжигт ажиллахаар бэлтгэл сургуулилтдаа орно. Энэ жүжгээ гуравдугаар сард үзэгчиддээ өргөн барихаар төлөвлөөд байна.

-“Мөрөөдлийн театр”-ынхны одоогийн мөрөөдөл юу байна?

-2022 оноос авахуулаад гадагшаа том фестивалиудад оролцох зорилго бий. Мөрөөдөлдөө хугацаа тогтоосныг зорилго гэдэг. Тийм учраас зорилгууд маань биелвэл бидний мөрөөдөл биелнэ. Алсдаа “Мөрөөдлийн театр” том ордонтой, байшинтай болохыг л мөрөөдөж байна даа. Мөрдлөг болгож явдаг зүйлээ хэлье. Өглөө болгон хүн хоёр сонголттой сэрдэг. Нэг нь орноосоо шууд босоод мөрөөдлийнхөө төлөө зүтгэх, нөгөө нь үргэлжлүүлж унтаад мөрөөдлөө зүүдлэх.

-Энэ таны мөрөөдлийн амьдрал мөн үү?

-Уран бүтээлээ хийгээд, мөрөөдлийн амьдралаа өөрөө цогцлоож явна даа.

Онцлох нийтлэлүүд