НОБГ: Цасанд боогдсон 37 иргэнийг аварчээ DNN.mn

Ойрын өдрүүдэд цасан шуурга болон хүйтний эрч сулрахгүй, халтиргаа гулгаа ихтэй байна. Энэ сарын 29-30-ны өдрүүдэд Онцгой байдлын албаныхан цасанд боогдон явах боломжгүй болсон 37 иргэнийг осгох аюулаас аварчээ. Багахангай, Налайх дүүргийн Онцгой байдлын албан хаагчид цасанд машинтайгаа боогдож суусан таван иргэнийг аварсан байна. Багануур дүүргийн Онцгой байдлын хэлтэс давхардсан тоогоор 39 албан хаагч долоон дуудлагаар таван автомашинтай ажиллаж, 26 том хүн, зургаан хүүхэд гээд нийт 32 иргэнийг аварчээ.

Мөн цасанд суусан, явах боломжгүй болж боогдсон, замын хажуу руу хальтран орсон таван автомашиныг татан гаргаж, шөнийн 02:00 цагаас үүрийн 04:00 цаг хүртэл үүрэг гүйцэтгэж ажилласан байна. Иргэдийг анхааруулсаар байтал өөрсдийн амь насыг эрсдэлд оруулахгүй байхыг нийслэлийн Онцгой байдлын газраас онцгойлон анхаарууллаа.