Сугар гаригийн өдрийн урт, тэнхлэгийн хазайлт, цөмийнх нь хэмжээг нарийвчлан гаргалаа

Калифорнийн их сургуулийн эрдэмтэд Сугар гаригийн өдрийн урт, тэнхлэгийн хазайлт, цөмийнх нь хэмжээг нарийвчлан гаргаж чаджээ. Үүний тулд мэргэжилтнүүд 15 жилийн турш радарын тусламжтайгаар уг гаригийг судалсан тухай Nature Astronomy сэтгүүл мэдээлэв.

Сугар гариг манай дэлхийн хөрш ч гэсэн бид түүний талаар мэдээлэл маш багатай. Хоёр гариг хэмжээ, жин, нягтралаар нийтлэг зүйл ихтэй. Гэхдээ тэдний хөгжлийн замууд нь өөр. Сугар гаригийн өдрийн урт нь түүний шинж чанарыг ойлгоход тустай. Эргэлтийн хэмжилт ба Сугарын чиглэл нь түүний доторх жингийн хуваарилалтыг харуулна. Дотоод бүтцийг нь мэдэж авснаар гариг хэрхэн бүрэлдэн бүтснийг ойлгох юм. Мөн галт уулын идэвхжилтийн түүхийг тогтоож гаднах давхрага хэрхэн бүрэлдсэнийг мэдэж болно. Гадаргын бүрэн хэмжээний ойлголт нь ирээдүйд түүнийг судлан хаймсууруудыг нисгэх төлөвлөгөөг биелүүлэхэд тустай.

Радиолокацийн хэмжилт нь Сугар гаригийн хоногийн урт нь дэлхийн 243.0226 хоногтой тэнцэн дэлхийн жилийн гуравны хоёртой дүйж буйг харуулав. Сугар гаригийн эргэлт нь байнгын хувирч байдаг ч дунджаар 20 минут орчим гэж тооцоолжээ. Өмнөх тооцооллууд зөрж байсан нь гаригийн атмосферийн хүндээс болсон гэж үзэж байна. Тэр нь хатуу гадаргад нөлөөлөн эргэлтийг хурдасгах буюу удаашруулдаг ажээ. Сугар гаригт агаар нь дэлхийнхээс 93 дахин хүнд байдаг.

Сугар гариг нэг тийшээгээ 2.6392 градусын хазайлттай гэж эрдэмтэд тооцжээ. Дэлхийн хазайлт нь 23 градус болдог. Мөн мэргэжилтнүүд мөсжилтийн давтамжийг гаргажээ. Дэлхийд нэг цикл нь 26 мянган жил бол Сугарт тэр нь 29 мянган жил болж байна. Гаригийн цөм нь 3500 километрийн голчтой бөгөөд харин шингэн үү, хатуу юу гэдгийг тогтоож чадаагүй байна.