ӨДРИЙН СОНИН ҮНЭНИЙГ ХЭЛНЭ
Онцлох нийтлэл
2020.02.22 12:02

ХӨСҮТ: БНCУ-аас ирсэн 6 оюутнаас коронавирусийн халдвар илрээгүй


Шинэ коронавирусийн халдварын нөхцөл байдлын талаар ЭМЯ мэдээлэл хийлээ.

ЭМЯ-ны Олон нийттэй харилцах, тандалт шуурхай удирдлагын хэлтсийн дарга Д.Нарангэрэл "Өнөөдрийн байдлаар шинэ коронавирусийн халдвар дэлхийн 29 оронд бүртгэгдээд байна. БНХАУ 31 муждаа хяналт тавьж, арга хэмжээ авч байгаа ч дэлхийн бусад улс оронд эрсдэл үүссээр байгааг ДЭМБ, эрдэмтэн судлаачид анхааруулж байна. Ялангуяа, бидний хамгийн их зорчиж, холбоотой байдаг Япон, Солонгос улс байна.

Мөн өнөөдөр нэмэгдээд Иран улсад байдал хүндэрч, өвчлөл нэмэгдэж байгаа. Израиль улсад шинэ коронавирус шинээр бүртгэгдэж, батлагдсан мэдээлэлтэй байна.

Ялангуяа, БНСУ-д өчигдөр 156 тохиолдол бүртгэгдээд байсан бол өнөөдөр 284 тохиолдол болж албан ёсоор бүртгэгдлээ. Гол бүртгэгдэж байгаа тохиолдол нь дөрвөн хот, зургаан мужид байгаа бөгөөд Дэгү хотод тархалт эрчимтэй байна. Тархалтын уурхайг бид өмнө нь мэдээлж байсан, сүмд залбирал үйлдэж байсан эмэгтэй халдвар тараасан гэж. Гэтэл тэр эмэгтэй Динам гэдэг эмнэлэгт үйлчлүүлсэн байгаа. Тиймээс тэр эмнэлгийн ажилчид, тухайн үед үйлчлүүлсэн хүмүүс өвдөж халдвар тархсан. Тиймээс нэг хүнээс маш олон хүнд халдвар тархах боломжтойг энэ жишээ харуулж байна.

Манай эрдэмтэн судлаачид шинэ коронавирусийн нэг халдвартай хүн цаашаа таван хүнд нэг дор тараах боломжтой гэж үзэж байгаа. Тэр таван хүн цааш тарааж, таван мөчлөгийн хугацаанд буюу таван үе дамжихад нэг хүн 384 хүнд халдвар тараах боломжтой" гэлээ.

ХӨСҮТ-ийн Тандалт судалгааны албаны дарга А.Амбасэлмаа "Өчигдөр ХӨСҮТ-д БНСУ-аас ирсэн зургаан оюутанг ажиглалтад авч, шинжилгээ хийсэн. Шинжилгээний хариу бүгд сөрөг гарч, шинэ кроновирусын халдвар илрээгүй. ДЭМБ-аас ХӨСҮТ-д нийлүүлэгдэж байгаа 3000 оношлуурийг өнөөдөр хүлээн авна. ХӨСҮТ-д найман хүний бүрэлдэхүүнтэй дөрвөн шуурхай багийг ээлжийн хуваариар ажиллуулж байна. Мөн 24 цагийн утас ажиллаж байна" гэлээ.

Олон хүний төвлөрөл үүсгэхгүй байх нь урьдчилан сэргийлэх маш чухал алхам гэдгийг олон улсад ч зөвлөж байгаа тул иргэд гэр гэртээ байж, ялангуяа баярын өдрүүдээр айл хэсэхгүй байхыг дахин дахин анхаарууллаа.

Онцлох нийтлэлүүд