ӨДРИЙН СОНИН ҮНЭНИЙГ ХЭЛНЭ
Гадаад
2020.02.13 01:02

Шинэ төрлийн титэм вирусийг COVID-2019 гэж нэрлэнэ


Хятад улсад анх дэгдэж, одоо олон орныг хамраад буй шинэ төрлийн титэм вирусийг COVID-2019 хэмээн нэрлэх болсноо Дэлхийн эрүүл мэндийн байгууллага албан ёсоор зарлажээ.

Тухайлбал, CO гэдэг нь корона буюу титэм, VI- вирус, D нь өвчин гэсэн үгний товчлол юм байна. Тус байгууллагын онцолсноор уг вирусийн эсрэг вакциныг гаргахад 18 сарын хугацаа шаардлагатай гэнэ. Энэ талаар ДЭМБ-ын ерөнхий захирал Тедрос Адханом Гебрейесус “Вирус нь ямар ч террорист халдлагаас илүү улс төр, нийгэм, эдийн засагт хохирол учруулах хүчтэй зүйл юм.

Энэ бол хүмүүсийн төсөөлж чадах хамгийн аюултай дайсан юм” гэж онцолжээ.

Хамгийн сүүлийн мэдээгээр шинэ төрлийн титэм вирусийн халдвараар 1112 хүн амиа алдаад байна. Мөн уг халдварын 44794 тохиолдол бүртгэгдсэн бол 4657 өвчтөн эдгэрчээ. Хятад судлаачид вирусийн тархалтын оргил үе нь хоёрдугаар сарын сүүл, харин дөрөвдүгээр сар гэхэд өвчин аюулгүй болно гэсэн тооцоог гаргаад буй. Үүнтэй зэрэгцэн титэм вирусийн тархалттай холбогдуулан АНУ-ын иргэний агаарын тээврийн “American Airlines” компани Хятад улс руу хийх бүх нислэгээ дөрөвдүгээр сарын 20-ныг хүртэл цуцлахаа мэдэгдлээ. Тус компани Хонконг, Бээжин, Шанхай хот руу тогтмол нислэг үйлддэг аж.

Д.ЦЭРЭНДОЛГОР

Онцлох нийтлэлүүд