Үндсэн хуулийн барилдаанд Э.Оюунболд түрүүлэв DNN.mn
Нийтлэлч: Өдрийн сонин
Шинэ үндсэн хуулийн батлагдсаны 31 жилийн ойд зориулсан үндэсний бөхийн барилдаан өчигдөр Монгол бөхийн өргөөнд боллоо. Барилдаанд улсын арслан Э.Оюунболд, Р.Пүрэвдагва, улсын заан Ц.Одбаяр, М.Лхагвагэрэл, улсын харцага Ш.Пүрэвгарьд, Г.Бадрах, улсын өсөх идэр начин Б.Эрдэнэхүү, С.Батчулуун, Н.Мустафа тэргүүтэй улс, аймгийн алдар цолтой 128 бөх барилдав.
Тус барилдаанд Хэнтий аймгийн Өмнөдэлгэр сумын харьяат, "Хан Хэнтий аварга" дэвжээний бөх улсын арслан Энхтөгсийн Оюунболд түрүүллээ. Харин Завхан аймгийн Яруу сумын харьяат, "Даян" дэвжээ, "Хилчин" спорт хороо, "Жем интернашиональ" компанийн бөх улсын заан Мөнхтөрийн Лхагвагэрэл үзүүрлэсэн юм.
Үзүүр, түрүүнд үлдсэн бөхчүүд бараг 40 гаруй минут барилдаж хаялцаагүй тул хөлийн цэцүүдийн шийдвэрийн дагуу идэвхээр арслан Э.Оюунболд давуулсан юм.
Их шөвөгт Архангай аймгийн Булган сумын харьяат "Бөх Билэгт" дэвжээ, "Алдар" спорт хороо, “Алтан Дорнод Монгол" компанийн бөх улсын арслан Рэнцэнбямбын Пүрэвдагва, Сэлэнгэ аймгийн Мандал сумын харьяат “Таван хан" дэвжээ, "Аврагч" спорт хорооны бөх улсын начин Насанцогтын Баярбаатар нар шалгарлаа.
