АНУ-ын ерөнхий эмч Вивек Мерти архины хэрэглээг долоон төрлийн хорт хавдартай холбосон шинэ судалгаа хийхийг уриалав. Түүний хэлснээр архи нь хорт хавдар үүсгэдэг гэсэн анхааруулга тамхины хайрцагтай адил архины шошгон дээр байх ёстой юм байна.

АНУ-ын Холбооны Эрүүл Мэндийн албаны энэхүү дээд албан тушаалтан “АНУ-д архинаас болж жилд 100.000 хүн хорт хавдраар өвчилж буйгаас 20.000 нь нас барж, 13.500 автомашины осол гарч байна. Архи нь тамхи, таргалалтын дараа хорт хавдраас урьдчилан сэргийлэх боломжтой гурав дахь шалтгаан болж байна” гэж анхааруулсан мэдэгдэл гаргажээ. Вивек Мерти мөн ” Архины төрлөөс үл хамааран согтууруулах ундааны хэрэглээ болон хорт хавдрын эрсдэл хоёрын шууд хамаарал нь дор хаяж долоон төрлийн хорт хавдраар илэрч байна. Үүнд эмэгтэйчүүдийн хөхний хавдар болон хоолой, элэг, улаан хоолой, мөгөөрсөн хоолой, бүдүүн гэдэсний хорт хавдрууд багтаж байна” гэж онцлов. тэрээр “зөвхөн шошгыг өөрчлөхөөс гадна архины хэрэглээний стандартыг шинэчлэн тогтоож, олон нийтийн боловсролыг дээшлүүлэхийг уриалах ёстой” гэв. Мөн эрүүл мэндийн ажилтнуудыг архины хордлого илрүүлэх шинжилгээнд хамруулахыг уриалж, шаардлагатай хүмүүсийг эмчилгээнд шилжүүлэхийг зөвлөсөн байна.

Архины шошгоны стандарт 1988 оноос хойш өөрчлөгдөөгүй бөгөөд үүнийг өөрчлөхийн тулд Конгрессын шийдвэр гарах шаардлагатай байгаа аж. Архи согтууруулах ундаа хэрэглэх нь жирэмсэн эхчүүд, жолооч, машин механизмтай ажилладаг хүмүүст аюултай гэдгийг анхааруулж байна.

АНУ-ын ерөнхий эмчийн албан тушаал нь Нийгмийн эрүүл мэндийн албаны ажилтнуудын тэргүүн бөгөөд Холбооны засгийн газрын нийгмийн эрүүл мэндийн тэргүүлэх төлөөлөгч гэсэн үг юм байна. Иймээс Вивек Мертигийн энэхүү мэдэгдлийн дараа Хөрөнгийн бирж дээр АНУ-ын согтууруулах ундааны компаниудын хувьцаа дөрвөн хувиар унасан байна.