МЗЭ-ээс уламжлал болгон зохион байгуулдаг оны шилдэг өгүүллэг
шалгаруулах “Утгын чимэг” наадам өчигдөр Д.Нацагдоржийн нэрэмжит номын санд
боллоо. МЗЭ нь 1990 онд богино хэмжээний өгүүллэгийн “Шувуун саарал”
наадмыг анх зохион байгуулсан бол 1993 оноос “Утгын чимэг” хэмээн
нэрлэж, өдгөө 23 дахь жилтэйгээ золгож байна. Монголын утга зохиолын нэгэн
өвөрмөц төрөл болох богино өгүүллэгийн урын санг баяжуулах, шинэлэг хэлбэрээр
туурвисан, шинэ үеийн уншигчдын оюуны таашаалд нийцэхүйц шилмэл бүтээлийг олны
хүртээл болгох зорилготой тус наадамд зохиолчид сэдвийн хувьд чөлөөтэй,
Монголын утга зохиолд шинэ туурвил зүйг бий болгоход чиглэсэн богино хэмжээний
хүүрнэл зохиол, өгүүллэгээр өрсөлддөг билээ.

Энэ удаагийн наадамд 50 гаруй уран бүтээлч хүүрнэл зохиолоо
ирүүлснээс Н.Бадамжав “Цагаан суурин”, П.Батхуяг “Зэрлэг зөрлөг”, Т.Баянсан
“Эсэн энхийн хаалга”, Т.Бум-Эрдэнэ “Хэрээний нүдэнд хэн нэгэн буй”,
Б.Лхагвасүрэн “Яргуй нүдлэх цагаар”, Я.Мөнхжаргал “Манай урсгалынхан”,
Б.Мягмаржав “Хөх хүү”, П.Нямлхагва “Хур усан бүүвэй”, С.Пүрэв “Нарангарав”,
М.Эрдэнэбат “Доголон нулимс” өгүүллэгүүд эцсийн шатанд тунаж үлдсэн.

Үүнээс Монголын үндэсний олон нийтийн радио, телевизийн
сэтгүүлч, яруу найрагч Б.Лхагвасүрэнгийн “Яргуй дэлгэрэх цагаар” өгүүллэг
тэргүүн байрт шалгарлаа. Харин “Болор цом”-ын эзэн, яруу найрагч
Б.Мягмаржавын “Хөх хүү” өгүүллэг удаахь байрт орсон бол МЗЭ-ийн шагналт
П.Батхуягийн “Зэрлэг зөрлөг” өгүүллэг гуравдугаар байрт тус тус шалгарлаа.

Өмнөх жилийн “Утгын чимэг” наадмыг Монгол Улсын Төрийн
шагналт, Ардын уран зохиолч Сэнгийн Эрдэнийн мэндэлсний 85 жилийн ойн нэрэмжит
болгон зохион байгуулсан юм. Энэхүү наадамд МЗЭ-ийн шагналт зохиолч Б.Золбаяр
“Цоожны ганц шүдлэн” өгүүллэгээрээ түрүүлсэн билээ. Энэхүү өгүүллэгийг хүргэе.