БНХАУ-д зохион байгуулагдсан U-21 насны Ази Номхон далайн бүс нутгийн “FIBA 3×3 Nations League, Stop-1” тэмцээний аваргаар Монголын баг шалгарлаа. 

3х3 сагсан бөмбөгийн Монголын эрэгтэй багийн бүрэлдэхүүнд Ч.Чойжилсүрэн, М.Өлзийбат, Б.Энх-Амар, А.Билгүүн нарын тамирчид багтжээ.

Хубэй мужийн Сиаоган хотод болсон тус тэмцээнд манай залуус шилдэг тоглолтыг үзүүллээ. Өчигдөр болсон хагас шигшээ болон шигшээ тоглолтод Монголын баг Япон, Шинэ Зеландын багийг дараалан хожиж тус тэмцээний алтан медалийг хүртсэн.

Шинэ Зеландын багийг 19:16 онооны харьцаагаар хожсон Монголын баг цуврал тэмцээний эхний ялагчаар тодорлоо.

Энэ тэмцээнд зохион байгуулагч орны муж бүрийн багуудаас гадна Япон, Хонконг, Тайвань, Сингапур, Индонез, Шинэ Зеланд, Монголын баг оролцсон юм.

U-21 насны Ази Номхон далайн бүс нутгийн “FIBA 3×3 Nations League”-н цуврал тэмцээн энэ долоо хоногт БНХАУ-д үргэлжлэн явагдана.