Үндэсний их баяр наадмыг зохион байгуулах хорооноос хэвлэлийн бага хурал хийлээ.

Үндэсний баяр наадмын бэлтгэл 80 хувьд хүрсэн

Үндэсний их баяр наадмыг зохион байгуулах хорооны нарийн бичгийн дарга Д.Амгалан “Цэнгэлдэхэд нэвтэрч наадам үзэх тасалбарын үнэ суудлаасаа хамаарч 100, 130, 150 мянган төгрөгийн үнэтэй. Тасалбарыг Enaadam.mn цахим хуудсаар худалдана. Наадмын нээлтийн тоглолтыг орой давтаж тоглоно. Энэ тоглолтын тасалбар 80 мянган төгрөгийн үнэтэй. Энэ тоглолтын тасалбарыг ticket.mn цахим хаягаар худалдана. (Наадмын тасалбарыг маргааш өглөө 07.00 цагаас худалдаж эхэлнэ)

Үндэсний бөхийн салбар хорооны дарга Н.Мягмар:

-Шөвгөрсөн 32 бөх, сурын 16 харваач, нийтдээ 48 хүн сэргээшийн шижилгээнд хамрагдана. Шинжилгээний эхний хариу 48 цагийн дотор гарна.

Хурдан морины салбар хорооны дарга Д.Ганхуяг: 

-Долоодугаар сарын 6-наас уралдааныг зохион байгуулах албан хаагчид Хүй долоон худагт байрлаж ажиллана. 300 орчим цэргийн албан хаагч ажиллана. 7-ноос эхлээд хурдан морьдыг бүртгэнэ. Цэргийн төв эмнэлгийнхэн 9-нөөс хойш Хүй долоон худагт байрлаж ажиллана.

Сурын харвааны салбар хорооны дарга Ц.Уртнасан:

-Үндэсний их баяр наадмын сурын харвааг зохион байгуулах бэлтгэл бүрэн хангагдсан. Сурын харваачдыг өнөөдрөөс бүртгэж эхэлсэн.

Урлаг, соёлын салбар хорооны гишүүн Э.Цэнд-Аюуш:

-Манай салбар хорооны төлөвлөгөөт ажлууд 85 хувийн гүйцэтгэлтэй үргэлжилж байна. 14 үйл ажиллагааг зохион байгуулахаар төлөвлөж байгаа. 2500 гаруй уран бүтээлч оролцож байгаа. Нийтдээ 40 гаруй байгууллага оролцож байгаа.

Хэв журмын салбар хорооны дарга Т.Сүхболд:

-Наадмын хамгаалалтад 4500 орчим албан хаагч ажиллана. Цэнгэлдэх рүү нэвтэрч байгаа иргэдийг металл хайгчаар шалгаж нэвтрүүлнэ. 9-нөөс эхлээд хотоос гарах хөдөлгөөнийг түгжрэлгүй байлгахад анхаарч ажиллана.

Худалдаа үйлчилгээний салбар хорооны гишүүн Ж.Дуламсүрэн:

-Наадмын өдрүүдэд хоол үйлдвэрлэл, худалдаа үйлчилгээ, хөдөлгөөнт тоглоомын нийт 576 цэг ажиллана. Зөвшөөрөл авах зөвшөөрлийн бүртэлийг өнөөдөр эхлүүлж, гурав хоногийн турш үргэлжилнэ.