Хичээл, сургууль эхлэхтэй зэрэгцээд л шатахуун, бензиний хомсдол бий болсон. Намрын их ажил, хөл хөдөлгөөнтэй үед аль болох бензин, шатахууны хомсдолгүй байлгах тал дээр жил болгон л Засгийн газар салбар яамнаас нь шийдвэр гаргаж ирсэн. Үүнийхээ үр дүнд хомсдол нь 1-2 долоо хоногт үргэлжлээд хэвийн болчихдог байсан бол энэ жилийн хувьд эрт эхэлсэн хомсдол одоог хүртэл үргэлжилсэн хэвээр байна.

Хомсдол үүсэх болгонд салбарын сайд нь “Бензин, шатахууны нийлүүлэлт хэвийн байгаа. Бүх клонкуудаар явж үзлээ. Бүгд жигд нөөцтэй байна. Гол нь ард түмэн өмнөхөөсөө их бензин хэрэглээд байна. Хомсдол бол ард түмний хэт хэрэглээнээс үүдэж байгаа” гэж мэдэгддэг. Бүр ард түмнийг “та нар хэрэглээгээ багасгачих, өмнөх шигээ л амьдар л даа” гэж хэлсэн удаатай.

Тодорхой хэлбэл, яаж ийгээд асуудлыг өөрөөсөө түлхэх, ямар нэгэн байдлаар төрийн буруу биш, ард түмний буруу болгож, шатахууны хомсдол нүүрлээгүй юм шиг энэ намаржингаа чихэн дээр цэцэг ургуулсан сайд саяхан үнэнээ хэлчих шиг боллоо.

Тэрээр чуулганы танхимд “Сая АИ-92-ын хомсдол болж байх үед аль шатахуун түгээх станц хэдий хэмжээний нөөц байгааг бид мэдэхгүй байсан. Шатахуун түгээх станцын нөөцийг хэмжих багаж хэрэгсэл байхгүй” гэж хэллээ.

Иргэд, жолооч нар шатахуунгүй станц болгоныг манаж, хэдэн зуун метрээр дугаарлан зогсож байна. Үнэхээр шатахуун түгээх станцуудад таны ярьж байгаа бензин алга байна. Зөвхөн Улаанбаатар хотод ч биш орон нутаг, сумдад бензин, шатахуун намаржин ирсэнгүй. Одоо өвөл ч ялгаа алга. Ард иргэдийнх нь бодид байдал ийм байхад өдөр болгон хэвлэлээр шатахуунтай, та нар хэрэглээгээ л багасчих гээд мэдэгдэл хийгээд инээж байсан сайд үнэнээ хэллээ. Хомсдол үүссэн байсан гэж. Шатахуун түгээх станц болгоноор очоод хэмжээд, нөөцтэй байгааг нь илрүүлж байсан гэж байсан сайд өнөөдөр бидэнд тэгж хэмжих багаж, боломж байхгүй гэж хэллээ.

Тэгвэл яагаад төдийгөөс өдийг хүртэл иргэдийн хөл хөдөлгөөн, нийгмийн амьдрал идэвхтэй өрнөдөг намар, өвөл шатахуун байхгүй байхад байгаа гэж хэлэв. Одоо зүгээр болно, зөндөө цуваа ирж яваа л гээд байдаг. Тэгээд бодит үр дүн нь хаана байна вэ. Ердөө л шатахуун түгээх дээр шатахуун өгч л байвал ярьсан хэлснийх нь үр дүн гарна гэдгийг мэдэхгүй сайд байна ч гэж юу байх вэ дээ.

Э.МӨНХ