Дэлхий дахинд жил бүрийн дөрөвдүгээр сарын 3-ны өдрийг Олон улсын уран бүтээлчдийн баярын өдөр болгон тэмдэглээд даруй 8 дахь жилдээ золгож байна.
Дэлхийн хүмүүнлэгийн үйлстэн, нэрт уран бүтээлч Төгс Гэгээрсэн ИХ БАГШ ЧИН ХАЙН санаачилсан энэхүү баярын өдрийн утга учир нь эх дэлхийд баяр хөөр, аз жаргал, амар амгалан, эв нэгдлийг авчирч, амьдралыг гэрэлтүүлж, зүрх сэтгэлийг тайтгаруулдаг бүхий л салбарын гайхамшигтай уран бүтээлчдэд хайр хүндэтгэл талархлаа илэрхийлж тэднээр бахархан тэднийг дэмжин алдаршуулахад оршдог билээ.
Зохион байгуулагчдын зүгээс өнгөрсөн жилийн хувьд Монголын Хөгжмийн Зохиолчдын Холбоо, Монгол Улсын Филармони зэрэг мэргэжлийн урлагийн байгууллагууд хамтран залуу уран бүтээлчдэд зориулан &#8220;Амьтдыг хайрлах монгол ухаан&#8221; нэртэй хөгжмийн фестиваль зохион байгуулжээ.
Харин энэ жил Боловсролын Яам, Гэр Бүл, Хөдөлмөр Нийгмийн Хамгааллын Яам, Засгийн газрын хэрэгжүүлэгч агентлаг Боловсролын Ерөнхий Газар, Хөгжлийн Бэрхшээлтэй Хүний Хөгжлийн Ерөнхий Газар, Монголын Аутизмын Холбоо, &#8220;Энэрэл&#8221; мэргэжлийн боловсролын сургууль, Монголын Театрын Музей зэрэг байгууллагууд хамтран хөгжлийн бэрхшээлтэй уран бүтээлчдийн &#8220;ХАЙРЫН ӨНГӨ&#8221; нэртэй уран бүтээлийн үзэсгэлэнг 4 дүгээр сарын 3-5ны өдрүүдэд Монголын театрын музейд гаргах гэж байна.
Энэхүү үзэсгэлэн нийгэмд өөрсдийн уран бүтээлээрээ танигдсан хөгжлийн бэрхшээлтэй уран бүтээлчдийн бүтээлүүдийн дээжээс бүрдэж байгаагаараа онцлог юм.
Мөн үзэсгэлэнд тавигдсан уран бүтээлүүдийг олон нийтэд худалдан авах боломжийг олгож,  нэг уран бүтээлчийн бүтээлийг онцлон дуудлага худалдаагаар худалдаална. Тэрхүү бүтээл нь зөвхөн Олон улсын уран бүтээлчдийн баярын өдөрт зориулагдан бүтээгджээ.

Маргааш “хайрын өнгө” уран бүтээлийн үзэсгэлэнгийн нээлт болно

Мьянмарт болсон хүчтэй газар хөдлөлтийн улмаас амиа алдсан хүмүүсийн тоо 2886 болж, 4639 хүн гэмтэж бэртсэнээс гадна 373 хүн сураггүй болсон тухай Мьянмарын төрийн мэдлийн телевиз өнөөдөр мэдээлжээ.
Байгалийн гамшигт үзэгдлээс хойш тав хоногийн дараа аврагчид нэгэн хүнийг нурангин дороос гаргаж чадсан байна. 26 настай зочид буудлын ажилтныг Мьянмар-Туркийн хамтарсан багийнхан аварч, орон нутгийн эмнэлэгт хүргэжээ.
Хүмүүнлэгийн нөхцөл байдал хүндрэхийн хэрээр олон улсаас илүү их хэмжээний тусламж авахыг олон нийтийн зүгээс Мьянмарын цэргийн хунтад уриалж байна. Хятад улс Мьянмарт байнгын дипломат төлөөлөгчтэй 20 гаруй орны нэг бөгөөд Нейпидо дахь Элчин сайдын яамаараа дамжуулан мөнгөн тусламж үзүүлсэн гэж Бээжин мэдэгджээ.
Газар хөдлөлтийн дараа босогчдын эсрэг хийж буй дайралтаа зогсоохыг НҮБ-ын зүгээс цэргийн хунтын удирдагчдад уриалсан байна. Гэвч байгалийн гамшигт үзэгдэл нүүрлэж, түр эвлэрлийн гэрээ байгуулсныг үл харгалзан сүүлийн өдрүүдэд цэргийнхэн босогчдод хэд хэдэн удаа цохилт өгсөн тухай хэвлэлүүд мэдээлж байна. НҮБ-ын тусгай төлөөлөгч Жули Бишоп мэдэгдэхдээ, энгийн иргэд, тусламжийн ажилтнуудыг хамгаалах, тусламжийг хүргэхэд анхаарлаа хандуулахыг сөргөлдөгч талуудад уриалжээ.
Тайландад байгалийн гамшгийн улмаас амиа алдсан хүний тоо 22 болсон бөгөөд тэдний ихэнх нь Бангкок хотод барьж байсан өндөр барилга нурсны улмаас амиа алджээ. Хятадын компанийн барьж байсан уг барилгад аюулгүй байдлын журмыг дагаж мөрдсөн эсэх тухайд асуудал үүссэн тул Бээжингийн эрх баригчид Хятадын бүх барилгын компанид хандан тухайн улс орнуудын хууль тогтоомжийг хүндэтгэхийг уриалжээ.

ЭХ СУРВАЛЖ: MONTSAME.MN

Газар хөдлөлтийн улмаас 2886 хүн амиа алджээ

Хилийн чанадад зорчих явцдаа бичиг баримтаа гээгдүүлсэн тохиолдол нэмэгдэж буй талаар цагдаагийн байгууллагаас мэдэгдлээ. Тодруулбал, БНХАУ-д зорчиж буй иргэд анхаарал, болгоомжгүйгээр гадаад паспорт, мөнгө зэрэг хувийн эд зүйлсээ гээгдүүлэх, олон нийтийн тээврийн хэрэгсэлд мартах тохиолдлууд гарч байна.
Энэ нь зочид буудалд захиалга өгөх боломжгүй болох, нислэгээ цуцлах, тус улсын хилээр гарах зөвшөөрөл хүсэж 5-7 хоног хүлээх зэрэг хүндрэлтэй асуудлуудыг бий болгодог. Иймд гадаад улсад зорчих иргэн та сонор сэрэмжтэй байж, гадаад паспорт болон мөнгө, эд зүйлсээ биеэсээ салгахгүй, хянамгай байхыг зөвлөж байна.
Хэрэв бичиг баримтаа гээгдүүлсэн тохиолдолд Монгол Улсаас БНХАУ-д суугаа Элчин сайдын яамны шуурхай утас: +8617600787323, +86(10)65321203 болон beijing@mfa.gov.mn, beijing.consul@mfa.gov.mn зэрэг цахим хуудсаар холбогдоно уу.

ЦЕГ: Гадаадад зорчихдоо бичиг баримт, мөнгө, эд зүйлсээ гээх тохиолдол нэмэгдэж байна

Энэ онд нийслэлийн хэмжээнд 36 байршилд 74 км авто замыг засаж, шинэчилнэ. Тэгвэл энэ оны зам засвар, шинэчлэлийн ажил эхэллээ.
Энэ талаар нийслэлийн Замын хөгжлийн газрын Засвар арчлалтын хяналтын хэлтсийн дарга О.Энхбаатараас тодрууллаа.
Тэрбээр “Энэ онд нийслэлийн 36 байршилд зам засварын ажил хийхээр төлөвлөсөн. Үүний 26 нь он дамжиж хийж байгаа бөгөөд үлдсэн 10 байршил нь бидний шинээр төлөвлөсөн замууд байгаа. Зам засварын ажил өнөөдөр Зүүн дөрвөн замаас 25 дугаар эмийн сан хүртэлх зам засварын ажлаар эхэллээ. Уг ажлын хүрээнд замын хажуугийн авто машины карма зогсоолуудыг хаах, хашлага болон нүхэн эвдрэлийн засварлах ажлуудыг эхлүүлээд байна. Хэсэгчилсэн асфальт хучилтын ажил энэ сарын 25-аас эхэлнэ. Энэ жил нийслэлийн гол гудамж, замуудыг засварлахаар төлөвлөсөн. Тухайлбал, Чингисийн өргөн чөлөө, Энхтайваны өргөн чөлөө зэрэг олон жилийн насжилттай гол гудамж, замуудыг засна. Зам хаах мэдээллийг тухай бүрд иргэдэд хүргэнэ” гэлээ.
Түүнчлэн энэ онд 1978 оноос хойш их засвар хийгээгүй Найрамдлын зам, 2008 оноос хойш их засвар хийгээгүй Энхтайваны өргөн чөлөөний замыг бүрэн шинэчилнэ. Энхтайваны өргөн чөлөөний нийт 8,9 км авто зам болон Найрамдлын 16 км замын засварыг долоодугаар сарын 10-аас өмнө хийж дуусгана гэдгийг хэлж байлаа.

Нийслэлийн 2025 оны зам засвар, шинэчлэлийн ажил эхэллээ

УИХ дахь МАН-ын бүлэг ээлжит бус хуралдаанаар Авлигатай тэмцэх газрын даргын томилгооны асуудлыг хэлэлцлээ.
Монгол Улсын Ерөнхий сайд АТГ-ын даргыг улираан томилуулах саналыг танилцууллаа. АТГ-ын даргаар З.Дашдаваа 2019 онд УИХ-ын 37 дугаар тогтоолоор томилогдсон. Энэ хугацаанд Авлигатай тэмцэх Үндэсний хөтөлбөр болон хэрэгжүүлэх төлөвлөгөөг батлуулж, авлигатай тэмцэх газрын чадавхыг бэхжүүлэх, ижил чиг үүрэг бүхий гадны байгууллагуудтай хамтын ажиллагааг өргөжүүлэх чиглэлд тодорхой үр дүн гарсан байна.
Авлигатай тэмцэх чиглэлд тодорхой олон үр дүн гарсан учраас АТГ-ын дарга З.Дашдавааг улируулан сонгох нь зүйтэй гэж УИХ дахь МАН-ын бүлгийн хуралдаанд оролцсон гишүүдийн олонх нь үзэж, байнгын хороо, чуулганы нэгдсэн хуралдаанаар хэлэлцэхийг дэмжлээ.

МАН-ын бүлэг: Авлигатай тэмцэх газрын дарга З.Дашдавааг улируулан томилох саналыг дэмжлээ

Нийслэлийн статистикийн хорооноос махны дундаж үнийн мэдээллийг танилцууллаа. Тодруулбал, 2025 оны 03 дугаар сарын 31-ны өдрийн байдлаар хонины ястай мах нэг килограмм нь дунджаар 17351 төгрөг, үхрийн ястай мах нэг килограмм нь дунджаар 19919 төгрөгийн үнэтэй тус тус худалдаалагдаж байна.
Өмнөх долоо хоногтой харьцуулахад үхрийн ястай махны үнэ 0.2 хувиар өсөж 19919 төгрөг, үхрийн цул махны үнэ 0.2 хувиар буурч 22394 төгрөгийн дундаж үнэтэй байна.

Үхрийн цул махны үнэ 0.2 хувиар буурчээ

2026 оныг “Боловсролыг дэмжих жил”-ээр зарлах Засгийн газрын тогтоол гарлаа. “Боловсролыг дэмжих жил&#8221;-ийн хүрээнд хэрэгжүүлэх арга хэмжээний төлөвлөгөө боловсруулан Засгийн газарт танилцуулж, шийдвэрлүүлэхийг Боловсролын сайд П.Наранбаярт үүрэг болголоо.
Ерөнхий сайд Л.Оюун-Эрдэнэ Засгийн газрын 2024-2028 оны үйл ажиллагааны хөтөлбөрт туссан “Эрдэм боловсролтой Монгол хүн” зорилго, “Тэгш, хүртээмжтэй, чанартай боловсрол”, “Мэдлэг, чадвартай мэргэжилтэн”, “Багшлах хүний нөөц”, “Цахимжсан боловсрол” зорилтын хэрэгжилтийг хангах, бүх шатны боловсролын тогтолцоо, агуулгын нэгдмэл бодлого боловсруулж хэрэгжүүлэхэд дэмжлэг үзүүлэх зорилгоор 2026 оныг “Боловсролыг дэмжих жил”-ээр зарлах санаачилга гаргажээ.
Боловсролыг дэмжих жил болгон зарласнаар багш бэлтгэх тогтолцоо, хичээлийн хөтөлбөрийн шинэчлэл, багшийн нийгмийн баталгаа, цалин хангамж, сургуулийн менежментийн шинэчлэл, шинэ сургууль, цэцэрлэг барих хөрөнгө оруулалт, бага сургуулийн цогцолборуудыг нэмэгдүүлэх, ахлах сургуулиудыг төрөлжүүлэн хөгжүүлэх, их сургуулиудын шинэчлэл, хөрөнгө оруулалт зэрэг асуудлууд тодорхой шийдэлд хүрэх боломж бүрдэх, боловсролын салбарт дэмжлэг үзүүлэх, салбар дундын хамтын ажиллагаа, уялдааг хангах нөхцөл бүрдэх юм.

2026 оныг “Боловсролыг дэмжих жил” болголоо 

Энэ жилийн аялал жуулчлалын улирлыг эхлүүлж, дөрөвдүгээр сарын хоёр дахь долоо хоногт үндэсний болон олон орны хоолны соёлыг иргэд, жуулчдад таниулах “UB food” фестивалийг нийслэлийн Засаг даргын Тамгын газраас санаачлан зохион байгуулж байна.
“UB food” фестиваль энэ сарын 8-14-ний өдрүүдэд Сүхбаатарын талбайд болно. Энэ удаагийн фестивалиар Бүгд найрамдах Узбекистан улсын хоолны амт, соёлыг онцлохын зэрэгцээ Монголын бурхан шашинтны төв Гандантэгчинлэн хийдийн лам нар нэг тонн хэмжээтэй ширмэн тогоонд гурилтай шөлийг уламжлалт аргаар бэлтгэж, монгол хоолны соёлыг түгээх юм.
Өдөрлөгт хүрэлцэн ирсэн иргэд олон үндэстний амтат хоолыг мастер тогоочдын бэлтгэснээр төрөлх амт, жорынх нь дагуу амтлах боломжтой. Жишээлбэл, Узбекистан үндэстний алдарт плов, шашлык, казань кебаб, самса тэргүүтнийг Узбек мастер тогооч өөрийн жорын дагуу бэлтгэж, иргэд, жуулчдад таниулна. Мөн залуучуудад зориулсан Dj үзүүлбэр, Open Mic, “Бага тойрог” урлагийн тоглолт, Узбек бараа бүтээгдэхүүний худалдаа, Улаанбаатар театрын тоглолт, “Анир” поп оркестрын тоглолт, амьд хөгжмийн тоглолт, төрөл бүрийн хоолны тэмцээнүүд болно.
“UB food” фестивалиар Узбекистан, Монгол хоолыг онцлох хэдий ч бусад олон орны хоолны соёл, амт чанар, стандартыг хоол үйлчилгээний салбарт нэвтрүүлж, иргэдэд танилцуулах, жуулчдын анхаарлыг татах олон сонирхолтой үзүүлбэрийг бэлтгээд байна. Цаашид “UB food” олон орны хоолны фестивалийг тусгай чиглэлийн аялал жуулчлалыг хөгжүүлэхэд чухал ач холбогдолтой байхаар тогтмол зохион байгуулна.

Хайх