Улаанбаатар хотыг хөгжүүлэх 24 мега төслийн хүрээнд хөнгөн төмөр замын тээвэр (LRT) төслийг Толгойтоос Хүннү хот чиглэлд барина. Хөнгөн төмөр замын тээвэр 102 км урт үргэлжилнэ. Нийт 17.3 км урт гүүрэн байгууламжтай, 16 буудалтай байна.
Галт тэргээр 70-100 км/цагийн хурдтай зорчих боломжтой. Хөнгөн төмөр замын тээвэр (LRT) төслийг төр, хувийн хэвшлийн түншлэлээр хэрэгжүүлэх онцлогтой. 2022 онд Монгол Улсад Төр, хувийн хэвшлийн түншлэлийн тухай хууль батлагдсанаар төр, хувийн хэвшлийн түншлэлийн оролцоо, хөрөнгө оруулалтыг дэмжих, урт хугацаанд үр ашигтай хамтран ажиллах болон санхүү, төсвийн зохистой удирдлагыг бий болгох эрх зүйн таатай орчныг бүрдүүлсэн билээ.

Хөнгөн төмөр замын тээвэр төслийг Толгойт-Хүннү хот чиглэлд хэрэгжүүлнэ

Авто замын засвартай холбогдуулан нийтийн тээврийн Ч:76 “Архивын ерөнхий газар-3,4-р хорооллын эцэс”, Ч:79 “Монгол хюндэй киа компани-Хангарьд цогцолбор” хоёр чиглэлд түр хугацаанд өөрчлөлт орууллаа.
“ДЦС-3”, “ДЦС-4” ТӨХК-ууд руу ус дамжуулах шугам хоолой угсрахтай холбоотойгоор “ДЦС-3” ТӨХК-иас баруун тийш Яармагийн гүүрийг Ажилчдын гудамжтай холбосон авто замыг дөрөвдүгээр сарын 11-ний 06:00 цагаас 14-ний 06:00 цаг хүртэл түр хаана.
Энэ хугацаанд Яармагийн гүүрнээс Ажилчдын гудамж буюу “ДЦС-3” ТӨХК-ийн баруун хойд талын буцаж эргэдэг тойрог хүртэл урдаас хойшоо зөвхөн нэг чиглэлд зорчино.
Харин хойноос урагш чиглэлийг “ДЦС-3” ТӨХК-ийн баруун хойд талын буцах уулзвараар эргэж, “ДЦС-3” ТӨХК-ийн хойд болон зүүн талын замаар үндсэн хөдөлгөөнд оролцох боломжтойгоор хөдөлгөөнийг түр зохицуулах юм.
Иймд авто замын ажил хийгдэх явцад нийтийн тээврээр зорчигч иргэд та бүхэн 2024 оны дөрөвдүгээр сарын 11-14-ний 06:00 цаг хүртэл доорх зураглалын дагуу зорчилтоо төлөвлөнө үү.
Нийтийн тээврийн үйлчилгээтэй холбоотой санал, хүсэлтийг тус газрын 70044040 дугаарын утсаар тогтмол хүлээн авч, шуурхай шийдвэрлэнэ гэж Нийтийн тээврийн бодлогын газраас мэдээллээ.

Зам засварын ажилтай холбогдуулан Ч:76, Ч:79 чиглэлийн замналд түр өөрчлөлт орлоо

Улсын хэмжээнд 2025 оны гуравдугаар сард нийт 212.374 зөрчил бүртгэгдсэн нь хоёрдугаар сартай харьцуулахад 26.7 хувиар буурчээ.
Нийт зөрчлийн 73.3 хувь нь Нийслэлд, 26.7 хувь нь орон нутагт бүртгэгдэж, 97.7 хувийг нь Цагдаагийн байгууллага, 2.3 хувийг нь Гааль, Татвар, Гадаадын иргэн, харьяатын газар зэрэг бусад байгууллага шалган шийдвэрлэсэн байна.
Дээрх хугацаанд 205.939 хүн, 783 хуулийн этгээдэд Зөрчлийн тухай хуульд зааснаар шийтгэл оногдуулсан байна. Нийт зөрчлийн хэргийн 96.2 хувийг газар дээр нь хялбаршуулсан журмаар шийдвэрлэжээ.
Өнгөрсөн гуравдугаар сард гарсан зөрчлийг хоёрдугаар сартай харьцуулахад Мөрийтэй тоглоом тоглох зөрчил 83.3 хувиар, Татварын хууль зөрчих зөрчил 67.8 хувиар, Замын хөдөлгөөний аюулгүй байдлын тухай хууль зөрчих зөрчил 28.5 хувиар, Хулгайлах зөрчил 26.7 хувиар, Архидан согтуурахтай тэмцэх тухай хууль зөрчих зөрчил 21.2 хувиар тус тус буурсан үзүүлэлттэй байна.
Харин Гамшгаас хамгаалах тухай хууль зөрчих зөрчил 66.7 хувиар, Гэр бүлийн хүчирхийлэлтэй тэмцэх тухай хууль зөрчих зөрчил 17.1 хувиар, Хүүхдийн эрхийг зөрчих зөрчил 14.4 хувиар өссөн байна.

Мөрийтэй тоглоом тоглох зөрчил буурчээ

ОХУ-ын Бүгд Найрамдах Буриад Улс Улаанбаатар хотын захиргаатай хамтран  фашист Германы эсрэг Дэлхийн II дайнд ялалт байгуулсаны ойг тохиолдуулан  хамтарсан арга хэмжээ  зохион байгуулахаар болжээ.
Буриадын тэргүүн Алексей Цыденов Улаанбаатар хотын захирагч Хишгээгийн Нямбаатартай уулзахдаа уг санаачилгыг дэвшүүлж хэрэгжүүлэхээр тохиролцсон байна.
Агуу Их Ялалтын ойд зориулсан хүндэтгэлийн арга хэмжээ нь Дэлхийн II дайны үед улс орноо  хамгаалан өөрийн амь насаа зориулсан Зөвлөлт болон Монголын баатарлаг дайчдын гэгээн дурсгалд зориулсан аж.
Энэ талаар болон ОХУ болон Монгол Улсын уламжлалт хамтын ажиллагааны  талаар  Буриадын тэргүүн Алексей Цыденовтой ярилцсаныг сонирхуулья.
<hr />
-Алексей Самбуевич, Та Улаанбаатар хотын Зайсан толгой дахь Зөвлөлтийн дайчдын хөшөөнд цэцэг өргөсөн. Дэлхийн II дайны, тэрдундаа Ялалт байгуулсаныг эргэн дурсах нь ОХУ болон Монголын хувьд ямар ач холбогдолтой вэ?
-Бидний түүх бол үр хүүхэддээ өвлүүлэн үлдээх үнэт зүйл. Зөвлөлт Холбоот Улс Халх голын тулалдаанд монголчуудтай мөр зэрэгцэн тулалдаж, тусалсан. Монгол  Дэлхийн II  дайны үед  Зөвлөлтөд  туслаж, дайны дараа ч  бид нэг нэгнээ харилцан дэмжиж ирсэн. Энэ нөхөрлөлийг цаашид ч үргэлжлүүлэх ёстой.  “Чиний найз хүчтэй бол чи ч хүчтэй” гэсэн үг бий.
Дайны эхний жилүүдэд  милитарист Японы арми  Монголын газар нутагт халдахад  Зөвлөлт  улс  Монголыг өөрийнх мэт хамгаална гэж мэдэгдсэн байдаг. Халхын голд байгуулсан түүхэн ялалт бол Монгол, Зөвлөлтийн хамтын баатарлаг тэмцлийн үр дүн төдийгүй, манай хоёр ард түмний нөхөрлөлийг мөнхжүүлсэн түүхэн үйл явдал. Энэ тулалдаанд 9000 гаруй Зөвлөлтийн цэрэг амь үрэгдсэн. Үүний дараахан Монгол ч Дэлхийн II  дайны эхлэхэд  хамгийн түрүүнд Зөвлөлтөд тусламж үзүүлсэн. Монголчууд  мах, хүнс, морь, мөнгөн гээд бүх л хэлбэрээр тусалсан. 1941 он гэхэд Монголоос 140 вагон бэлэг ирүүлсэн байдаг. Жишээ нь монголчууд морь бэлэглэхээс гадна сайн  дураараа хандивласан. Нийтдээ  32 000 агт морь бэлэглэсэн. Монголчуудын хандивласан хөрөнгөөр “Хувьсгалт Монгол” танкийн цуваа байгуулсан. Тэдгээр 53 танкнаас  32 нь Т-34 маркийн танк байсан. Улаан армийн 5 адуу тутмын 1 нь монгол морь байсан. Монголчуудын хандивын хөрөнгөөр босгосон танкуудын ихэнх нь Берлин хүрсэн бол, Зөвлөлтийн агаарын хүчний бүрэлдэхүүнд &#8220;Монгольский Арат&#8221; нэртэй  байлдааны нисэх онгоцны эскадриль байгуулсан.  Халхын голын тулалдаанд Зөвлөлтийн 57 мянган цэрэг оролцсоноос,  15 мянга нь Буриадаас, 2200  монгол цэрэг байсан. Ийнхүү манай цэргүүд хамтдаа Японы түрэмгийллийг зогсоож, бүс нутгийн байдлыг тогтвортой болгох нөхцөлийг бүрдүүлсэн түүхтэй. Ялтын хэлэлцээг байгуулах үеэр  И.Сталин Монголыг бие даасан тусгаар улс хэмээн хүлээн зөвшөөрүүлэхийн төлөө тууштай зогссон. Өнөөдөр Монгол Улс бол бие даасан, тусгаар тогтносон, хүчирхэг улс.
-Та ОХУ-ын Тээврийн яамны дэд сайдаар ажиллаж байсан. Одоо энэ салбарыг хариуцсан Төрийн зөвлөлийг ахлан ажиллаж байна. Орос, Монголын тээврийн салбарын хамтын ажиллагааны ирээдүйг хэрхэн харж байна?
-Орос-Монгол-Хятад гурван талт тээврийн сүлжээг хөгжүүлэх нь хамгийн чухал зорилтуудын нэг. Төмөр зам, авто замын  аль аль нь чухал. УБТЗ хэдий ачаалалтай ажиллаж байгаа ч, авто замын транзит тээврийн боломжийг бүрэн дүүрэн ашиглаж чадаагүй байна. Монгол Улс Улаанбаатараас Алтанбулаг хүртэл чанартай авто зам тавьсан. Хоёр улсын хил орчмын боомтуудыг шинэчлэн сайжруулсан.  Тиймээс одоо хамгийн гол анхаарах зүйл бол  тээврийн бодит урсгалыг бий болгох, хөгжүүлэх, улмаар эдийн засгийн үр өгөөжийг нэмэгдүүлэх явдал. Жишээ нь “Хиагт” хилийн логистикийн терминал боомтын шинэчлэл хийгдэж, 1000 автомашин, 5000 зорчигч нэвтрүүлэх хүчин чадалтай болсон. Энэ бол тогтвортой өсөлтийн суурь бөгөөд Монголын талаас ч, Оросын талаас ч нэлээд анхаарал хандуулж буй салбар.
-Таны үзэж байгаагаар ОХУ-ын Буриадын Бүгд Найрамдах  Улс Монгол Улстай эдийн засгийн салбарт ямар чиглэлээр  хамтран ажиллавал илүү ирээдүйтэй вэ?
-2024 онд  ОХУ-ын Бүгд Найрамдах Буриад Улс болон Монгол Улсын худалдаа эргэлтийн хэмжээ 20 хувиар өссөн. Энэ бол маш сайн үзүүлэлт. Нүүрс, химийн бүтээгдэхүүн, целлюлоз, картон, цаас, хүнсний бүтээгдэхүүн, барилгын материал, модон эдлэл гээд бүр чиглэлийн худалдааны эргэлтийн хэмжээ нэмэгдсэн. Хоёр талын бараа  нийлүүлэлт идэвхтэй нэмэгдсээр байна. Жишээ нь, Монгол Улсаас төмс нийлүүлж байна, экспортлож буй махны хэмжээ нэмэгдсэн. ОХУ-ын Хөдөө аж ахуйн яамтай хамтран малын вакцинжуулалт,  аливаа өвчнөөс урьдчилан сэргийлэх чиглэлээр хөтөлбөр хэрэгжүүлж, энэ нь монголын мах үйлдвэрлэгчдэд ОХУ-руу экспортлох боломжийг нэмэгдүүлсэн. Мөн ОХУ-ын хөрөнгө оруулагчид Монголд бизнесээ эхлүүлж байгаа. Жишээлбэл, Улаанбаатар орчимд гахайн аж ахуй байгуулах төсөл хэрэгжүүлж байна. Мөн яг ийм  гахайн аж ахуй Буриадад байдаг бөгөөд жил бүр 140 мянган гахай, 20 мянган тонн гахайн мах үйлдвэрлэдэг.
Монголын барилгын компаниуд Буриадад орон сууцны барилга барихад оролцох сонирхлоо илэрхийлсэн нь бас нэгэн чухал чиглэл болсон. Аялал жуулчлал бол онцгой сэдэв. Бид одоогоор “Хөвсгөл – Байгаль нуур – аяллын гурвалжин” хэмээх  маршрутыг судалж байна. Энэ  маршрутаар  Байгаль нуурт ирсэн жуулчид Хөвсгөл нуур луу зорчих, Хөвсгөлд ирсэн хүмүүс Байгаль нуурыг үзэх боломж бүрдэхээс гадна, хоёр орны соёл, байгаль, аяллын онцлогийг  мэдрэх боломж бүрдэнэ. Энэ нь Япон, Солонгос, Европ, Хятад зэрэг гадаадын жуулчдыг татахад чухал нөлөөтэй. Тэд хоёр улсын  хоёр өөр соёлын өвийг нэг аяллаар  мэдрэх боломжтой болно. Мөн  энэ маршрутын аяллыг дэмжих зорилгоор Монды дахь хилийн боомтыг шинэчлэх ажил хийгдэж байгаа. 
Монгол болон ОХУ-ын хилийн боомтыг олон улсын боомт болгох хэлэлцээр байгуулсан. Шинэчлэл хийгдсэний дараа гуравдагч орны иргэд энэ боомтоор чөлөөтэй нэвтрэх боломжтой болно. Энэ нь аялал жуулчлал, худалдаа, тээврийн харилцаанд чухал түлхэц өгнө.
-Сүүлийн жилүүдэд Монгол Улсад эмчилгээний аялал жуулчлал эрчимтэй хөгжиж байна. Энэ салбарт Буриадын Бүгд Найрамдах  Улс Монголын иргэдэд ямар боломжуудыг санал болгох вэ?
-Энэ салбарын хэд хэдэн чухал чиглэлийг онцлон дурдмаар байна. Юуны өмнө хорт хавдрын эсрэг эмчилгээ, оношилгоо. Манай бүс нутагт орчин үеийн хорт хавдрын төв,150 ортой хавдар судлалын диспансер байгуулагдсан бөгөөд туяа эмчилгээний технологи ашиглан өндөр нарийвчлалтай мэс ажилбаруудыг хийж байна. Ингэхдээ хамгийн сүүлийн үеийн, дэлхийн стандартад нийцсэн  тоног төхөөрөмжийг ашиглаж байгаа. Мөн  манайд Цөмийн анагаах ухааны төв ажиллаж байна. Тус төвд бид радиоидэвхит эмийн бэлдмэлүүдийг өөрсдөө үйлдвэрлэдэг. Энэ нь хавдрыг хамгийн эрт шатанд илрүүлнэ, эмчилгээний явцыг хянана, хими болон туяа эмчилгээний үр дүнг үнэлэх, хувь хүнд тохирсон оновчтой эмчилгээний аргачлалыг сонгох юм зэрэг боломжуудыг олгоно. Өнөөдөр монголчууд ийм төрлийн үйлчилгээг авахын тулд БНСУ болон  бусад алслагдсан улс руу явдаг. Гэтэл бид газар зүйн хувьд ойр,  манайд техник, технологийн хувьд дэлхийд тэргүүлэгч төвүүд байна. Бидний хэрэглэж байгаа тоног төхөөрөмжийг дэлхийд хамгийн орчин үеийнх. Өнгөрсөн жил л гэхэд манай цөмийн анагаах ухааны төвөөр 5 мянга гаруй хүн үйлчлүүлсэн. Энд нэг үзлэг, шинжилгээ дунджаар 2 цаг орчим үргэлжилдэг. Тиймээс бид богино хугацаанд, чанартай тусламж үзүүлэх бүрэн боломжтой. Мөн манай Буриадын Бүгд Найрамдах Улсын эмнэлэгт зүрхний нарийн мэс засал, түүний дотор нээлттэй зүрхний хагалгаа хийгддэг. Жилд ойролцоогоор 600 мэс засал амжилттай хийдэг. Түүнчлэн бидэнд бөөр шилжүүлэн суулгах хагалгааг ч хийх чадвар, туршлага бий. Жил ирэх тусам Буриадын өндөр технологийн анагаах ухааны түвшин хурдтай хөгжиж, гадаадын иргэд, ялангуяа монголчуудад зориулсан чанартай, шуурхай, хүртээмжтэй тусламж, үйлчилгээ үзүүлэх бүрэн боломжтой.
&#8211; Та боловсролын хамтын ажиллагааны ямар ирээдүйтэй, боломжтой  талаар ярина уу?
-Боловсролын салбарыг бид маш их боломжтой, ирээдүйтэй гэж үздэг. Одоогийн байдлаар ойролцоогоор 230 монгол оюутан Буриадын Бүгд Найрамдах Улсад суралцаж байна.  Мөн дээд боловсрол, мэргэжлийн боловсролын хөтөлбөрүүдэд хамрагдсан байдаг. Түүнээс гадна бид өөрсдийн тусгай хөтөлбөрийг хэрэгжүүлж эхэлсэн. Энэ хөтөлбөрийн хүрээнд Буриадын санхүүжилтээр монгол оюутнуудыг орос хэлний багш мэргэжлээр үнэ төлбөргүй сургаж байна. Эдгээр оюутнууд эх орондоо эргэж очоод, ерөнхий боловсролын сургуульд орос хэл заах боломжтой. Одоогоор энэ хөтөлбөрөөр 137 оюутан суралцаж байгаа бөгөөд: сургалтын төлбөр бүрэн тэглэгдэж, оюутны дотуур байранд үнэгүй амьдрах боломжтой. Мөн монгол оюутнуудад хамаарах бас нэгэн чухал зүйл гэвэл  ОХУ-ын Ерөнхийлөгч Владимир Владимирович Путины даалгавраар баригдаж буй дээд боловсролын олон улсын кампус юм. Энэ оюутны кампусын хүрээнд монгол оюутнуудад зориулагдсан тусгай квот бий болно. Хөтөлбөрүүдийн хүрээ маш өргөн. Тодруулбал, техник, инженерчлэл, хүмүүнлэгийн ухаан, анагаах ухаан, хөдөө аж ахуй, нисэхийн болон барилгын салбар гээд маш өргөн хүрээг хамарна.  Буриадад суурь мэдлэг, орос хэлний бэлтгэлд хамрагдсаны дараа  Москва, Санкт-Петербург зэрэг Оросын бусад хотуудад  суралцах боломж бүрдэнэ. Өөрөөр хэлбэл Буриад нь  монгол оюутнуудын хувьд ОХУ руу нэвтрэх боловсролын &#8220;хаалга&#8221; болж чадсан. Энэ бол хоёр улсын боловсролын салбар дахь  хамтын ажиллагааны маш идвэхтэй хөгжсөний бодит илэрхийлэл юм.
&#8211; 2026 онд Буриадад “Алтаргана-2026” наадмыг зохион байгуулна. Бэлтгэл ажил эхэлсэн үү?
-2024 онд Монгол Улсын Булган аймагт зохион байгуулагдсан “Алтаргана” наадам маш өндөр түвшинд зохион байгуулагдаж, бидний хувьд шинэ шалгуур тогтоогдсон юм. 
Тиймээс ирэх жилийн наадмыг маш сайн  зохион байгуулахын хийхийн тулд бэлтгэл ажил хэдийнэ эхэлсэн. Бид спортын байгууламжуудыг бэлдэж, цэнгэлдэх хүрээлэн, бусад  барилга байгууламжуудад засвар, шинэчлэлмйн ажлыг хийж, соёлын хөтөлбөр, урлагийн болон уралдаан, спортын хөтөлбөрүүдийг боловсруулж байна. Ирэх жилийн наадамд маш олон  зочдыг хүлээж авахаар бэлтдэж байна. Өнгөрсөн жил ОХУ-ын талаас 1000 гаруй хүн Монголд очиж уг наадамд оролцсон, тиймээс энэ удаад Монголын талаас ч ижил хэмжээний оролцоо байх болов уу гэж найдаж байна.

Алексей Цыденов: Энэ нөхөрлөлийг цаашид ч үргэлжлүүлэх ёстой. “Чиний найз хүчтэй бол чи ч хүчтэй” гэсэн үг бий

Өмнөговь аймгийн Даланзадгад сумын авто замын зорчих хэсэгт “КАМА-KMC3046” загварын автомашин &#8220;Портер” загварын автомашинтай мөргөлдсөн осол гарчээ. Ослын улмаас жолооч нь автомашины төмөр эд ангид хавчуулагдсан байна. Энэ тухай дуудлагыг дөрөвдүгээр сарын 09-ний өдрийн 11:50 цагт холбогдох албаныхан хүлээн авсан байна. Дуудлагын дагуу тус аймгийн Онцгой байдлын газрын 21 дүгээр ангийн алба хаагчдыг очиход “Портер” загварын бага оврын ачааны автомашины бүхээгт жолооч Б (28 настай, эрэгтэй) хавчуулагдсан байсныг 12:11 цагт эсэн мэнд гаргаж аймгийн эмнэлэгт шилжүүлэн өгсөн болохыг ОБЕГ-аас мэдээллээ.

Ачааны машинууд мөргөлдөж нэг жолооч машины эд ангид хавчуулагджээ

Улаанбуудайн гурилын импорт I улирлын байдлаар 15.8 мянган тонн хүрч, өмнөх оны мөн үеэс 2.7 дахин өссөнийг Гаалийн ерөнхий газрын мэдээллээс харж болохоор байна. Харин 1.7 мянган тонн улаанбуудай импортолсон нь өмнөх оны мөн үеэс 97.4 хувиар буурчээ.
Энэ онд 360 мянган га талбайд улаанбуудай тариалах төлөвтэй байгааг ХХААХҮЯ мэдээлж байсан ч улаанбуудайн гурил, малын тэжээлийн импортын татварыг тэглэсэн хууль хүчин төгөлдөр мөрдөгдөхөөс ихээхэн хамаарахаар байгааг тодотгож байна.
Үүнээс гадна өргөн хэрэглээний хүнсний бараа, бүтээгдэхүүнүүдийн импорт ерөнхийдөө өссөн үзүүлэлттэй гарлаа. Цагаан будааны импорт 95 хувиар, өтгөрүүлсэн болон хуурай сүү 77.8 хувь, хүнсний ногоо 22 хувиар өсжээ. Мөн өндөгний импорт 3.6 дахин нэмэгдэж, оны эхний гурван  сарын байдлаар 33.9 сая ширхэг өндөг ОХУ-аас худалдан авсан байна.
Евразийн Эдийн засгийн холбоотой байгуулах чөлөөт худалдааны хэлэлцээр батлагдвал 90 сая ширхэг хүртэлх өндгийг гаалийн татварыг 50 хувиар бууруулж, 7.5 хувийн татвар ногдуулна. Мөн 50 мянган тонн улаанбуудайг 3.75 хувийн татвартай импортлохоор тохиролцоод байгаа юм.
Хэлэлцээрийн хүрээнд нийт 366 барааны жагсаалтыг эцэслэн тохирсныг Эдийн засаг, хөгжлийн яам мэдээлж байв. Гэхдээ хэлэлцээр хэрэгжиж эхэлснээр дотоодын нийт бүтээгдэхүүний өсөлт, аж үйлдвэрийн салбарын үйлдвэрлэлд ихээхэн нөлөө үзүүлэхийг МУИС-ийн судлаачид танилцуулсан юм.
Дотоодын нийт бүтээгдэхүүний өсөлт 6.1 хувиар буурах тооцоолол гарсан бол аж үйлдвэрийн салбарын үйлдвэрлэл 17.9 хувиар агших эрсдэлтэй. Түүнчлэн импорт 4.72 хувиар, экспорт 3.7 орчим хувиар тус тус өсөхөөр байгааг мэдээлсэн юм.
ЭХ СУРВАЛЖ: BloombergTV

Улаанбуудайн гурилын импорт I улиралд 2.7 дахин өсчээ

Монголын пара бочигийн улсын аварга шалгаруулах тэмцээн өнөөдөр Спортын төв ордонд нээлтээ хийлээ. Найм дахь удаагийн тэмцээнд 14 багийн нийт 78 тамирчин дөрвөн ангилал (BC1, ВС2, ВС3, ВС4)-д өрсөлдөж байгаа бөгөөд хамгийн залуу нь 10 настай Б.Азжаргал бол хамгийн ахмад нь 57 настай Б.Болдмаа юм.
Тус тэмцээний нээлтийн ёслолд БТСУХ-ны дарга Э.Билэгт оролцож, хэлсэн үгэндээ “Үндэсний шигшээ багийн бүрэлдэхүүнд пара бочигийн дасгалжуулагч, тамирчид маань багтаж, зуны паралимпын наадамд оролцох эрх авахын төлөө хичээл зүтгэл гарган ажиллаж байна. Энэхүү тэмцээнийг зохион байгуулснаар хүүхэд, залууст спортоор хичээллэх эрмэлзлийг төрүүлж, тамирчдын өрсөлдөх чадвар ахина” хэмээн онцлов.
Пара бочигийн спорт нь манай улсад 2017 оноос хөгжсөн ба Монголын баг тамирчид зуны паралимпын наадмаас бусад тэмцээн уралдаанд оролцжээ. Монголын пара бочигийн тамирчид олон улсын тэмцээнээс гурван медальтай бөгөөд Дэлхийн цомоос Т.Мөнхдэмбэрэл мөнгө, Х.Ирмүүн хүрэл, “Парис-2024” зуны паралимпын эрх олгох олон улсын тэмцээнээс Х.Ирмүүн хүрэл медаль хүртэж байв. Пара бочигийн УАШТ найман удаа болоход хамгийн өндөр амжилтыг Х.Ирмүүн үзүүлсэн ба тэрбээр зургаан удаа түрүүлжээ.

Пара Бочигийн УАШТ-д 14 багийн 78 тамирчин өрсөлдөж байна

Сүүлийн өдрүүдэд гал түймрийн дуудлага ихэсч байгаатай холбоотойгоор НОБГ-аас өнөөдөр сэрэмжлүүлэг мэдээлэл өглөө.
Он гарсаар объектын гал түймрийн 767 дуудлага бүртгэгдэж, иргэн ААН-ийн нийт 88.8 тэрбум төгрөгийн хөрөнгийг авран хамгаалжээ. Гал, түймрийн улмаас он гарсаар дөрвөн том хүн, гурван хүүхэд амь эрсэдсэн аж. Гал гарсан шалтгааны 45 хувь нь ил галаас, 29 хувь нь цахилгаан ашиглалтаас, 17.6 хувь нь яндангийн цонолтоос болжээ.
Гэр хороололд 244 удаа буюу нийт гал түймрийн 31.8 хувь, монгол гэр- 44 удаа нийт гал түймрийн 5.7 хувь, орон сууцанц 47 буюу нийт гал түймрийн 6.1 хувийг эзэлж байна. Энэ нь өнгөрсөн оны мөн үетэй харьцуулбал, 31.6 хувиар өссөн үзүүлэлт юм байна.
Он гарсаар нийт 90 удаагийн шар өвсний дуудлага ирсэн. Сүүлийн 72 цагийн хугацаанд нийслэлийн хэмжээнд 55 удаагийн гал түймрийн дуудлага бүртгэгдлээ. Үүний 25 нь шар өвсний шалтгаантай гал түймрийн дуудлага байна. Тиймээс иргэд анхаарал болгоомжтой байж, шар өвс шатаахгүй байхыг НОБГ-аас сэрэмжлүүллээ.

Хайх