Нийслэлийн цэцэрлэгт хамруулах хоёрдугаар шатны хүсэлтийг 2025 оны наймдугаар сарын 28-наас есдүгээр сарын 08-ны өдрийг дуустал e-Mongolia системээр хүлээн авна. Нийслэлийн цэцэрлэгт хамруулах хоёрдугаар шатны бүртгэлээр нэгдүгээр шатны бүртгэлээс хоцорсон болон түр оршин суугчийн хүүхэд хамрагдах боломжтой.
Цэцэрлэгт хамрагдах хүсэлтийн хариуг таны бүртгүүлсэн дугаарт мессежээр мэдээлэх болно. Мөн Та e-mongolia системд нэвтрэн орж Нийслэлийн цэцэрлэгт хамрагдах хүсэлтийн үр дүн үйлчилгээг авч харах боломжтой.
Нийслэлийн цэцэрлэгийн нэгдүгээр шатны цахим бүртгэл наймдугаар сарын 4-18-ны өдрүүдэд явагдаж дууссан. Цэцэрлэгийн цахим бүртгэлд нийтдээ 101.117 хүүхэд бүртгүүлжээ.

Нийслэлийн цэцэрлэгийн хоёрдугаар шатны бүртгэл наймдугаар сарын 28-нд эхэлнэ

БНСУ-ын Соёл, спорт, аялал жуулчлалын яамны хөгжлийн албан ёсны туслалцаа (ODA) хөтөлбөрийн хүрээнд Монгол Улсад хүүхэд, өсвөр үеийнхэнд зориулсан Д.Нацагдоржийн нэрэмжит Улаанбаатар хотын нийтийн төв номын сангийн өргөтгөлийн барилга барих ажлыг дэмжин хэрэгжүүлж байна. Д.Нацагдоржийн нэрэмжит Улаанбаатар хотын нийтийн төв номын сангийн өргөтгөлийн барилга нь нийт 4 давхар, 2,300 м2 талбай бүхий бүх насны хүмүүс тав тухтайгаар ашиглах боломжтой байдлаар баригдахаар төлөвлөгдөж байгаа бөгөөд, энэхүү зарын дагуу тус барилгын дотоод засал чимэглэлийн ажилд оролцох хүсэлтэй аж ахуйн нэгжүүдийг бүртгэж байна.
Төсөл: Монгол Улс, Д.Нацагдоржийн нэрэмжит Улаанбаатар хотын нийтийн төв номын сангийн өргөтгөлийн барилгын дотоод засал чимэглэлийн ажлын гүйцэтгэл
Байршил: Улаанбаатар хот, Сүхбаатар дүүрэг 2-р хороо, Сөүлийн гудамж, 14251
Бүртгэлийн хугацаа: 2025 оны 8 дугаар сарын 25-аас 9 дугаар сарын 9 хүртэл
Бүрдүүлэх материал
1) Компанийн танилцуулга
2) Улсын бүртгэлийн гэрчилгээ (Тусгай зөвшөөрөл)
3) Нийгмийн даатгалын тодорхойлолт
4) Ажлын гүйцэтгэлийн тайлан (сүүлийн 5 жилийн хугацаанд)
5) Дотоод заслын ажлын үнийн санал
6) Үйлчилгээ (ажлын) гүйцэтгэлийн төлөвлөгөө
Дэлгэрэнгүй мэдээллийг 8-р сарын 25-ны өдөр номын сангийн албан ёсны вэбсайт (www.pl.ub.gov.mn) дээр байршуулна. Дотор заслын ажлын гүйцэтгэлд оролцох сонирхолтой аж ахуйн нэгжүүд дараах хаягаар холбоо барина уу.
Утас: 9921-1020
И-мэйл: hyeok@klib.or.kr (Тодруулах зүйлсийг Солонгос болон Англи хэл дээр хүлээн авна)

Д.Нацагдоржийн нэрэмжит Улаанбаатар хотын нийтийн төв номын сангийн дотоод засал чимэглэлийн ажлын тендерийн зар

2025 оны улаанбуудайн анхны хураалт Сэлэнгэ аймгийн Ерөө сумын Хөдөлмөрийн баатар тариаланч С.Ганболд захиралтай &#8220;Их шинэстэй&#8221; ХХК-ийн талбайгаас эхэлж, улсын хэмжээнд намрын хураалтын ажил эхэллээ.
Энэ жил газар тариалангийн гол бүс нутгуудаар хур тунадас багатай, халалт, хуурайшилт ихтэй байснаас гангийн нөхцөл үүсэж, тариаланчдад хүндрэл учруулсан.
Гэсэн хэдий ч тариаланчид хуримтлуулсан туршлага, техник технологийн чадавхдаа тулгуурлан, шинжлэх ухаан, шинэ технологийн ололт болон төрөөс хэрэгжүүлж буй таатай нөхцөлтэй зээлийн үйлчилгээг ашигласнаар байгалийн бэрхшээлийг даван туулж, хураалтаа зохих түвшинд эхлүүлээд байна.
Урьдчилсан балансаар 2025 оны ургацаар хүнсний улаанбуудайн хэрэгцээний 70 хувийг дотоодын үйлдвэрлэлээр хангах төлөвтэй байна гэж Хөдөө аж ахуйн корпораци ТӨХХК-иас мэдээллээ.

Улаанбуудайн хэрэгцээний 70 хувийг дотоодын үйлдвэрлэлээр хангах төлөвтэй байна

Монгол Улсын Их Хурлын Тамгын газрын Хяналт шалгалтын газраас улсын тусгай хамгаалалтад авсан газар нутгийн хил заагийг тогтоох, Улсын Их Хурлын тогтоолын биелэлтийг хангах асуудлаар холбогдох яамд, Засгийн газрын Хэрэг эрхлэх газрын төлөөллийг оролцуулсан уулзалтыг өнөөдөр зохион байгууллаа.
Улсын Их Хурлын Тамгын газрын дэд дарга Ү.Амарбат “Зарим газар нутгийг тусгай хамгаалалтад авах тухай”, Монгол Улсын Их Хурлын 2019 оны 41, “Зарим газар нутгийг тусгай хамгаалалтад авах тухай” Монгол Улсын Их Хурлын 2020 оны 46,  “Зарим газар нутгийг тусгай хамгаалалтад авах тухай” Монгол Улсын Их Хурлын 2020 оны 47 дугаар тогтоолын биелэлттэй танилцах, санал дүгнэлт гаргах үүрэг бүхий ажлын хэсэг Улсын Их Хурлын даргын 321 дүгээр захирамжаар байгуулагдаж, Улсын Их Хурлын гишүүн М.Ганхүлэг ахлан ажиллаж байгаа талаар оролцогчдод мэдээлэл танилцуулж, тус ажлын хэсгийн хүрээнд мэдээлэл солилцон цаашид хэрэгжүүлэх ажлын санал солилцохоор уулзалт зохион байгуулж буйг танилцуулав.
Монгол Улсын Их Хурлын 2019 оны 41, Монгол Улсын Их Хурлын 2020 оны 46, 47 дугаар тогтоолын хүрээнд байгалийн нөөц болон дурсгалт газрын ангиллаар тусгай хамгаалалтад авсан 19 газрын хил зааг тогтоохыг Монгол Улсын Засгийн газарт даалгасан бөгөөд өнөөг хүртэл хил зааг батлагдаагүй байгаа хэмээн Байгаль орчин, уур амьсгалын өөрчлөлтийн яамны Төрийн нарийн бичгийн даргын албан үүргийг түр орлон гүйцэтгэгч Т.Золбаяр дурдаад, өмнөх онуудад хэрэгжүүлсэн ажлын талаар мэдээлэл хийв.
Улсын тусгай хамгаалалтад авахтай холбогдуулан өмнө нь олгогдсон ашигт малтмалын хайгуулын болон ашиглалтын тусгай зөвшөөрлийн нөхөх олговрын асуудлыг хэрхэн шийдвэрлэх талаар болон цаашид хил зааг тогтоох асуудалтай холбогдуулан зөвшилцөлд хүрч ажиллах асуудлаар Аж үйлдвэр, эрдэс баялгийн яамны Геологийн бодлогын газрын дарга Х.Санчигдорж танилцуулсан юм.
Засгийн газрын Хэрэг эрхлэх газрын зүгээс байгалийн нөөц болон дурсгалт газрын хил заагийг урьдчилж тогтоон, одоогоор ямар нэгэн маргаан үүсээгүй газар нутгийн хил заагийг Засгийн газрын нэгдсэн хуралдаанд танилцуулан шийдвэрлэх, ашигт малтмалын хайгуулын болон, ашиглалтын талбайг эргэн хянах, орон нутгийн  саналыг харгалзан салбарын яамд зөвшилцөн дахин Засгийн газрын хуралдаанаар хэлэлцүүлэх талаар санал гаргав.
Түүнчлэн Байгаль орчин, уур амьсгалын өөрчлөлтийн яаманд байгалийн нөөц болон дурсгалт газрын хил зааг тогтоох үүрэг бүхий ажлын хэсэг өмнөх онуудад ажилласан аж. Энэхүү өмнөх ажлын хэсгийн дүгнэлтийг шинэчлэх чиглэлээр Аж үйлдвэр, эрдэс баялгийн яамтай хамтран ажиллахаар төлөвлөж буй талаар тус яамны Байгалийн нөөцийн бодлогын хэрэгжилтийн газрын дарга Н.Уранчимэг мэдээлэл өглөө.
Уулзалтын үеэр Аж үйлдвэр, эрдэс баялгийн яам болон Байгаль орчин, уур амьсгалын өөрчлөлтийн яам хамтран ажлын хэсэг байгуулан ажиллаж, байгалийн нөөц болон дурсгалт газрын хил зааг, ашигт малтмалын хайгуулын болон ашиглалтын талбайн хил заагийг орон нутгийн саналыг харгалзан хамтран тогтоож нэгдсэн дүгнэлт гаргах, Засгийн газрын Хэрэг эрхлэх газрын зүгээс биелэлтэд хяналт тавин, мэргэжил арга зүйгээр хангаж ажиллан, ажлын явцын талаар тухай бүр эргэн  танилцуулахаар тогтов.

Улсын тусгай хамгаалалтад авсан газар нутгийн хил заагийг тогтоох, УИХ-ын тогтоолын биелэлтийг хангах асуудлаар санал солилцов

Гадаадын иргэн, харьяатын газар өнгөрөгч долоодугаар сард гадаадын 4811 иргэнд визийн зөвшөөрөл, 3102 иргэнд виз, цахим визийн evisa.mn системээр 41 улсын 12681 иргэнд виз олголоо.
Мөн эрх бүхий байгууллагын зөвшөөрлийг үндэслэн гадаадын 1810 иргэнд Монгол Улсад оршин суух зөвшөөрөл олгож, 2230 иргэний оршин суух зөвшөөрлийн хугацааг сунган, 701 иргэний бүртгэлд хасалт хийв.
Цахим үйлчилгээний нэгдсэн системээр нийт 25335 иргэний хүсэлтийг хүлээн авч хянан шийдвэрлэлээ. Мөн Монгол Улсад албан болон хувийн хэргээр оршин суух зөвшөөрөл, түүний сунгалт, түр ирэгчийн бүртгэл, хасалт, визийн хугацааны сунгал, бүртгэлийн дугаарын олголт, ашиглалт, оршин суух үнэмлэх олгох, хэвлэх, төлбөрийн буцаалтын асуудлаар нийт 8307 иргэнд зөвлөгөө, мэдээлэл өглөө.
2025 оны долоодугаар сарын байдлаар Монгол Улсад албан болон хувийн хэргээр оршин суух бүртгэлтэй 135 улсын 36483 гадаадын иргэн байна. Үүнээс хөдөлмөр эрхлэгч 20897, хөрөнгө оруулагч 5074, гэр бүлийн зорилгоор 3066, цагаач 1791, суралцагч 3871, хувийн бусад зорилгоор 1122,  шашны чиглэлээр 134 гадаадын иргэн байна гэж ГИХГ-аас мэдээллээ.

Өнгөрсөн сард цахим визийн evisa.mn системээр 41 улсын 12681 иргэнд виз олгов

Нийслэлийн төвийн 6 дүүргийн нутаг дэвсгэрт 2025 оны 08 дугаар сарын 01-ний өдрийн байдлаар нийт 2098 зам тээврийн осол бүртгэгдсэнээс 122 тохиолдолд жолооч хэргийн газрыг зориуд орхиж, зугтаасан нь өмнөх оны мөн үеэс 17-оор буюу 16 хувиар өссөн байна.
<img decoding="async" src="https://prosecutor.mn/uploads/users/1287/images/%D1%85%D1%8D%D1%80%D0%B3%D0%B8%D0%B9%D0%BD%20%D0%B3%D0%B0%D0%B7%D1%80%D0%B0%D0%B0%D1%81%20%D0%B7%D1%83%D0%B3%D1%82%D0%B0%D0%B0%D1%81%D0%B0%D0%BD.jpg" alt="" />
Монгол Улсын Замын хөдөлгөөний дүрмийн 3.5 дахь хэсгийн б/-д “осолд өртсөн хүнд эмнэлгийн анхны тусламж үзүүлж, түргэн тусламж дуудах, хугацаа алдаж болзошгүй тохиолдолд уг хүнийг ойр байгаа эмнэлэгт аль тааралдсан тээврийн хэрэгслээр хүргүүлэх буюу бололцоогүй бол өөрийн жолоодож яваа тээврийн хэрэгслээр хүргэж, эмнэлгийн ажилтанд биеийн байцаалт (иргэний үнэмлэх буюу жолоодох эрхийн үнэмлэх гэх мэт), тээврийн хэрэгслийн гэрчилгээг үзүүлж, өөрийн овог нэр, утасны дугаар, тээврийн хэрэгслийн марк, улсын дугаарыг тэмдэглүүлээд уг газартаа буцаж ирэх”, мөн дүрмийн 3.5 дахь хэсгийн г/-д “тухайн ослын талаар цагдаагийн байгууллага (ажилтан)-д яаралтай мэдэгдэж, ослыг гэрчлэх хүмүүсийн овог нэр, хаяг, утасны дугаарыг тэмдэглэж аваад цагдаагийн ажилтныг хүлээх ба түүнийг иртэл осолд холбогдол бүхий эд мөрийн баримт, ул мөрийг хамгаалах, бусад тээврийн хэрэгсэл тойрч гарах нөхцөлийг бүрдүүлэх талаар бололцоотой арга хэмжээ авах”-аар гэж заасан нь зам тээврийн осолд холбогдсон жолоочийг үүрэгжүүлсэн улмаар жолооч үүргээ биелүүлээгүй хэргийн газрыг зориуд орхиж зугтаасан бол Эрүүгийн хуулийн тусгай ангийн 27.11 дүгээр зүйлийн 1 дэх хэсэгт заасан эрүүгийн хариуцлага хүлээлгэхээр хуульчилсан.
Тээврийн прокурорын газраас 2025 онд Нийслэлийн төвийн 6 дүүргийн нутаг дэвсгэрт зам тээврийн осол гаргасан жолооч, хэргийн газрыг зориуд орхиж зугтаасан 87 хэргийг шүүхээр эцэслэн шийдвэрлүүлсэн байна.
Иймд жолооч та зам тээврийн осол гаргасан бол Монгол Улсын Замын хөдөлгөөний дүрэмд заасан зам тээврийн осолд холбогдсон жолоочийн үүргээ биелүүлэхийг Тээврийн прокурорын газраас анхааруулж байна.

Жолооч хэргийн газрыг зориуд орхиж зугтаасан тохиолдол 16 хувиар өсчээ

2025-2026 оны өвөлжилтийн бэлтгэл хангах ажлын хүрээнд инженерийн хангамжийн 13 байгууллагын нийт 750 төсөл, арга хэмжээг хэрэгжиж байна. Үүнийг нэг нь Улаанбаатар хотын дулаан хангамжийн 11 Г, Д ф800 мм-ийн гол шугамыг ф1000 мм-ийн голчтой болгон өргөтгөх ажил юм. Уг ажлыг он дамжин хэрэгжүүлэхээр төлөвлөсөн бөгөөд энэ жил 25 дугаар эмийн сангаас төмөр замын BSB цахилгаан барааны дэлгүүр хүртэл дулааны шугамыг өргөтгөж байна. Уг ажлыг “Энерго сервис монтаж” ХХК гүйцэтгэж байгаа бөгөөд ажлын явц 70 гаруй хувьтай үргэлжилж байна.Энэ хүрээнд 25 дугаар эмийн сан орчимд Улаанбаатар хотын Ерөнхий менежер Г.Батзориг болон холбогдох албаныхан ажиллалаа.
<img decoding="async" src="https://ulaanbaatar.mn/files/mn/images/7z642jhzpjd/68ad50eb76868b67547b3346.jpg" />
Энэ үеэр Улаанбаатар хотын Ерөнхий менежер Г.Батзориг ирэх сарын 15-наас өмнө хариуцсан ажлаа дуусгах, хөдөлмөрийн аюулгүй байдал болон иргэдийг аюулгүй зорчих нөхцөлийг бүрдүүлж ажиллахыг үүрэг болгов.
<img decoding="async" src="https://ulaanbaatar.mn/files/mn/images/ox0u04ydh7h/68ad50f676868b67547b3347.jpg" />
&nbsp;
<img decoding="async" src="https://ulaanbaatar.mn/files/mn/images/j70jo7rsxqb/68ad510376868b67547b3349.jpg" />
Улаанбаатар хотын гол магистраль 11 Г, Д шугамыг 1984 онд ашиглалтад оруулж байсан бөгөөд дулаан хангамжийн 30 хувийг дангаар бүрдүүлдэг. Тус шугамыг 2024 оноос эхлэн хэсэгчлэн өргөтгөж байгаа юм. Тодруулбал, 2024 онд Саппорогийн уулзвараас 25 дугаар эмийн сан хүртэлх 1.6 км хос шугамыг  ф1000 мм-ийн голчтой болгон шинэчилсэн. Ингэхдээ хонгилын систем буюу туннелтэй болгож буй. Ингэснээр дараа нь засвар үйлчилгээ хийхдээ авто зам сэтлэхгүйгээр дотор нь орж засах боломжтой юм.
11 Г, Д магистралийг өргөтгөн шинэчилснээр дамжуулах сүлжээний гол магистраль шугамын нэвтрүүлэх чадвар 800 тн/ц-аар нэмэгдэж, хотын төв, Цирк, Бага тойруу, Төв номын сан, Багшийн дээд, 13-р хороолол орчмын хэрэглэгчдийн дулаан хангамж сайжрах ач холбогдолтой юм. Мөн дулаан дамжуулах сүлжээний алдагдал 5-15 хувиар буурна.

Дулаан хангамжийн 11 Г, Д гол шугамыг ф1000 мм-ийн голчтой болгон өргөтгөх ажил 70 гаруй хувьтай үргэлжилж байна

“Монгол-Хятадын V экспо” БНХАУ-ын Өвөр Монголын Өөртөө Засах Орон (ӨМӨЗО)-ы Хөх хотноо 2025.08.25-ны өдөр нээлтээ хийлээ.
Энэ удаагийн экспод Монгол Улсаас 350 гаруй аж ахуйн нэгж ноос, ноолуур, арьс шир, гоо сайхан, бэлэг дурсгал, арьсан эдлэл, хүнс зэрэг 700 гаруй нэр төрлийн органик бараа бүтээгдэхүүнтэй оролцож байна. Монгол Улсын үндэсний үйлдвэрлэгчид экспогийн үеэр бараа бүтээгдэхүүнээ БНХАУ-ын хэрэглэгчдэд таниулж, онцлог, давуу талаа сурталчилж байгаа юм. Мөн Монгол Улсаас экспортод гаргахад олон улсын шаардллага стандартыг хангах экспортын өрсөлдөх чадвар, уламжлалт үйлдвэрлэлийн өв соёлыг харуулж,  үндэсний брэндийг олон улсад гаргах, бүтээгдэхүүний экспортыг нэмэгдүүлэх, харилцан туршлага солилцох, хөрөнгө оруулалтыг дэмжих арга хэмжээнүүд болж байна.
<img decoding="async" src="https://mofa.gov.mn/files/images/4rr49eyvqat/large-68ac2d6583d7de7c1b04bea6.jpg" />
Нээлтийн ёслолд Монгол Улсын Их Хурлын Хууль зүйн байнгын хорооны дарга Д.Цогтбаатар, Тэргүүн шадар сайд бөгөөд Эдийн засаг, хөгжлийн сайд Н.Учрал, Хүнс, хөдөө аж ахуй, хөнгөн үйлдвэрийн яамны Төрийн нарийн бичгийн дарга Т.Жамбалцэрэн, БНХАУ-ын Ардын Төлөөлөгчдийн Их Хурлын Дэд дарга Цай Дафэн, Худалдааны яамны Дэд сайд Яан Дун, ӨМӨЗО-ны Намын хорооны нарийн бичгийн дарга Сүн Шаочен нарын зочид оролцлоо.
<img decoding="async" src="https://mofa.gov.mn/files/images/wbfu7xfden/large-68ac2d6e83d7de7c1b04beab.jpg" />
Хүнс, хөдөө аж ахуй, хөнгөн үйлдвэрийн яамны Төрийн нарийн бичгийн дарга Т.Жамбалцэрэн экспог нээж хэлсэн үгэндээ,  “Манай хоёр улсын хооронд дипломат харилцаа тогтоосны 75 жилийн, “Иж бүрэн стратегийн түншлэлийн харилцаа” тогтоосны 10 жилийн түүхэн, тэмдэглэлт ой өнгөрсөн онд тохиосон. Монгол, Хятадын уламжлалт найрсаг харилцаанд суурилан, хоёр орны харилцааг итгэлцэлтэй, өргөн хүрээтэй, тогтвортой, харилцан ашигтай хамтын ажиллагаагаар гүнзгийрүүлэхэд “Монгол-Хятадын экспо” арга хэмжээ үр дүнтэй чухал түншлэл болсоор ирсэн.  2024 онд Монгол Улс нийт 163 улстай гадаад худалдаа хийснээс, БНХАУ нь манай хамгийн том худалдааны түнш хэвээр байгаа бөгөөд хоёр улсын нийт худалдааны эргэлт 18.6 тэрбум ам. долларт хүрсэн нь худалдааны эргэлтийг 20 тэрбум ам. долларт хүргэх Төрийн тэргүүнүүдийн дэвшүүлсэн зорилтод ойртсоныг харуулж байна.  2015 онд анхдугаар экспог хоёр орны худалдаа, аж үйлдвэр, соёлын хамтын ажиллагааг өргөжүүлэх олон улсын түвшний үзэсгэлэн, форумын арга хэмжээний хүрээнд зохион байгуулж эхэлсэн бөгөөд дараа дараагийн экспо нь цар хүрээний хувьд өргөжин тэлж эрчим хүч, цахим эдийн засаг, уур амьсгалын өөрчлөлтийн асуудлууд болон “Бүс ба зам” санаачилгын хүрээнд бүс нутгийн, олон улсын хамтын ажиллагааг өргөжүүлэн хөгжүүлэхэд чиглэж байна. Хоёр жил тутам зохион байгууллагддаг “Монгол-Хятадын экспо” нь хоёр улсын төр, хувийн хэвшлийн төлөөлөгчдөд харилцан туршлага солилцох, шинэ хөрөнгө оруулалт, бизнесийн боломжийг эрэлхийлэх, инноваци, дэвшилтэт технологийг нутагшуулах, соёл, нийгэм, техник технологийн олон талт харилцааг хөгжүүлэх, бараа бүтээгдэхүүний борлуулалтын зах зээлийг тэлэх, хамтарсан үйлдвэр байгуулах,  гэрээ хэлэлцээр байгуулах өргөн боломжийг нээж байна. Түүнчлэн бид энэхүү арга хэмжээг зөвхөн худалдаа, үзэсгэлэнгийн арга хэмжээ төдийгүй хөдөө аж ахуйн салбарын хамтарсан шинжлэх ухаан, технологи, инновацийн чуулган, хөрөнгө оруулалтын форумын чиглэлээр өргөжүүлэн зохион байгуулах, ногоон хөгжил, хөдөө аж ахуйн тогтвортой байдал, хүнсний аюулгүй байдал, уур амьсгалын өөрчлөлтийн эсрэг хамтын ажиллагаа зэрэг шинэ чиглэлээр өргөжүүлж, харилцан ашигтай, тэнцвэртэй байдлаар хөгжүүлэх нь чухал юм. Мал аж ахуй, газар тариалан, хүнс, хөнгөн үйлдвэрлэл болон дагалдах үйлчилгээний салбарын уялдаа холбоог бэхжүүлж, ханган нийлүүлэлтээс эхлээд үйлдвэрлэл, худалдааны сүлжээг цахим технологиор нэгтгэх зорилгоор салбарын бодлогын хүрээнд “Мал аж ахуй, үйлдвэрлэл, технологийн эко парк” цогцолборыг бүтээн байгуулахаар ажиллаж байна. Хөдөө аж ахуйн салбарт блокчэйн, хиймэл оюун ухаан зэрэг дэвшилтэт технологид тулгуурлан олон улсын хамтын ажиллагааны шинэ платформ бий болгох чиглэлээр цаашид энэхүү экспо арга хэмжээг өргөжүүлж, чухал түлхэц үзүүлнэ гэдэгт итгэж байна.  Монгол Улс, Бүгд Найрамдах Хятад Ард Улсын хоорондын худалдаа, эдийн засгийн хамтын ажиллагааг өргөжүүлж, шинэ түвшинд гаргахад эрхэм үйлдвэрлэгчид, бизнес эрхлэгчид, эрдэмтэн судлаачид, хөрөнгө оруулагчид Та бүхний оролцоо, хувь нэмэр хамгаас чухал гэдгийг онцлон тэмдэглэе” хэмээсэн юм.
“Монгол-Хятадын V экспо” ӨМӨЗО-ы Хөх хотод 2025.08.29-ний өдрийг хүртэл үргэлжилнэ.

Хайх