Энэ сарын 20-нд Оросын сансрын цэргийн Плесецк буудалд ноцтой осол гарсныг судлаачид, шинжээчид энэ нь Оросын “RS-28 Sarmat” тив алгасах баллистик пуужингийн туршилт амжилтгүй болсон байх магадлалтай гэж үзэж байгаа аж. Иймээс BBC бэлэн мэдээлэлд үндэслэн болсон явдлын зураглалыг гаргасан байна. BBC-ийн Оросын алба Плесецк буудлын долоо болон есдүгээр сарын 23-нд авсан хиймэл дагуулын зургийг судалжээ. Эдгээр зураг хөөргөх цогцолборын нэг хэсэг маш их гэмтсэн болохыг харуулжээ. Мөн дэлхий даяар гарсан томоохон гал түймрийн талаар шуурхай мэдээлдэг НАСА-гийн “FIRMS” алба есдүгээр сарын 20-нд Плесецк буудлын хөөргөх цогцолборт гарсан гал түймэр маш хүчтэй байсан тул сансраас хүртэл харагдаж байна” гэж мэдээлснийг баримт болгожээ.

Өнөөг хүртэл “RS-28 Сармат” пуужингийн туршилтыг зөвхөн нэг удаа “Юбилейный” талбайгаас амжилттай хөөргөсөн гэж Оросын “Известия” сонин албан ёсоор мэдээлсэн юм. “Сармат” бол цөмийн цэнэг тээвэрлэх ёстой тив хоорондын баллистик пуужин бөгөөд туршилтын болон байлдааны бэлтгэлийн үед пуужинд цөмийн цэнэгт хошуу суурилуулдаггүй юм байна. Олон шинжээчид пуужинг цэнэглэж байх үед осол гарсан байж магадгүй гэж үзэж байгаа ч энэ бол зүгээр л таамаг юм. BBC “Дэлбэрэлтээс үүссэн тогооны хэмжээг ойлгохын тулд ойролцоо байрласан галын машинуудтай харьцуулж үзээрэй” гэж зөвлөжээ.

“Сармат”-ын түлшний найрлагыг албан ёсоор зарлаагүй байгаа ч түлш ба исэлдүүлэгч гэсэн хоёр тусдаа хэсгээс бүрддэг нь тодорхой байгаа аж. Харин исэлдүүлэгч химийн бодис нь маш хортой, шатамхай бодис юм байна.Иймээс онолын хувьд хуучирсан түлшийг шинээр солиход ийм дэлбэрэлт болох өндөр магадлалтай байгаа аж. Өмнө нь ийм осол гарч байсан бөгөөд уг дэлбэрэлт шууд пуужин байрладаг уурхайд болж байсан юм байна. Эсвэл пуужин нисч чадахгүй байсны улмаас ийм аваар тохиолдож болох ажээ.

Владимир Путин Холбооны Ассамблейд илгээсэн 14 дэх илгээлтдээ гэнэт илтгэлийнхээ бараг тал хувийг шинэ төрлийн зэвсгийн тухай зориулсан бөгөөд “Сармат” нь 2018 оны гуравдугаар сарын 1-нд бахархал болгон зарлаж байсан эдгээр зэвсгийн нэг юм. Түүнийг үг хэлэх үеэр пуужингийн туршилт гэж бодит хөөргөлт бус компьютер график харуулсан нь цэргийн шинжээчдийн доог тохуу болсон билээ.

Украины парламентын Үндэсний аюулгүй байдал, батлан хамгаалах хорооны зөвлөх, цэргийн шинжээч Максим Старчак ВВС-д өгсөн ярилцлагадаа “Сармат пуужин бол түүхий төсөл” гээд “Роскосмос” зургаан туршилтыг амжилттай явуулна гэж тооцоолж байсан ч зөвхөн нэгийг нь л мэдээлсэн. “Роскосмос”-ын үйлдлийг харгалзан үзвэл 2022 оноос 4-5 удаа хөөргөх оролдлого хийсэн гэж би таамаглаж байна. Оросууд үнэхээр бүтэлгүйтсэн” гэжээ.

ЗХУ-ын үед тив алгасах пуужин, цөмийн цэнэгт хошууг Украинд үйлдвэрлэж байсан юм байна. Иймээс Оросууд “RS-28 Sarmat” төслийг хөгжүүлэх болсон гол шалтгаан нь Путин Крымыг эзлэн авсны дараа Украины “Южмаш” компанийн инженерүүд ОХУ-ын “Р-36М Воевода” стратегийн пуужин, цөмийн цэнэгт хошуунд үйлчилгээ үзүүлэхээ больсон явдал гэдгийг BBC эцэст нь онцолжээ.