Улсын арслан Э.Оюунболдын барилдах эрхийг 2023 оны хоёрдугаар сарын 20-ноос энэ оны зургадугаар сар хүртэл хасахаар шийдвэрлэсэн билээ. Өөрөөр хэлбэл, түүний барилдах эрхийг хоёр жил дөрвөн сараар хассан юм. Үүнтэй холбогдуулан нэр бүхий бөхчүүд улсын арслан Э.Оюунболдыг цагаан сарын барилдаанд оролцуулахыг шаардаж эхэлсэн билээ.

Энэ талаар Улсын харцага А.Бямбажав Монголын Үндэсний Бөхийн холбоонд хандаж, “Цагаан сараар Э.Оюунболдыг барилдуулаач ээ. Барилдаан сонирхолтой болно шүү дээ. Тэгсэн тэгээгүй та нар ганц хоёр сарын өмнөөс уучлалт гуйлгаад л барилдуулдаг биз дээ. Аавын хүүг “Алаг” үзэж яадаг юм бэ” гэв.

Харин улсын заан Б.Соронзонболд “Бүх хүнд үнэхээр адил тэгш шударгаар арга хэмжээ авдаг бол Э.Оюунболдын эрхийг хэдэн жилээр ч хасаж болно. Хасахыг нь ч дэмжинэ. Нэгэнт дур зоргоороо шийддэгээс хойш, бас нэгэнтээ энэ оны зургадугаар сараас барилдаж болно гээд шийдвэрлэчихсэн юм бол гурван сар дутуу гэхгүйгээр цагаан сараар барилдуулах хэрэгтэй. Гурван сар байтугай жил, хоёр жилийг ч хүчингүй болгоод, бүр эрхээ ч хасуулахгүй барилдаад байж болж байгаа шүү дээ” гэсэн юм.

“Элдэв эрдэнэт” хэмээх модон могой жилийн сар шинийн баярт зориулсан улс, аймаг, цэрэг, сумын алдар цолтой хүчит 256 бөхийн уламжлалт барилдааны нэг, хоёрын даваа энэ сарын 27-нд, 3-8-ын даваа 28-нд тус тус болох юм.

 

Ө.АЗАА