Энэ жилийн “Гэгээн Муза” олон улсын театрын наадмын нээлтийн үзвэрээр “Орфей” театрын уран бүтээл, Английн алдарт зохиолч Жорж Оруэллийн “1984” романаас сэдэвлэсэн “1984” постдрамын жүжиг сонгогджээ.

“Гэгээн Муза-18” олон улсын театрын наадмыг энэ сарын 16-24-нд зохион байгуулна. Тус наадам хоёр шаттай зохион байгуулагдах бөгөөд эхний шатны шалгаруулалт нь энэ сарын 16-22-ны өдрүүдэд нийслэлийн театруудад болно. Харин хамгийн сүүлийн шат буюу улаан хивсний ёслол энэ сарын 24-ний өдөр Корпорейт центрт 17:00 цагт болох аж.

Дашрамд дурдахад, “1984” постдрамын жүжиг нь “Гэгээн Муза-18” олон улсын театрын наадмын драмын жүжгийн төрөлд зургаан номинацад нэр дэвшин өрсөлдөж буй.

• Шилдэг найруулагч номинацад “Орфей” театрын найруулагч М.Батболд,
• Шилдэг зураач номинацад “1984” жүжгийн тайзны зураач, Урлагийн гавьяат зүтгэлтэн Г.Ганбаатар,
• Шилдэг хөгжмийн зохиолч номинацад Д.Нямхүү, Х.Цэцэн
• “1984” постдрамын жүжигт бүтээсэн Уинстон Смитийн дүрээрээ Гавьяат жүжигчин С.Болд-Эрдэнэ шилдэг эрэгтэй гол дүр
• Жулиягийн дүрээр Гавьяат жүжигчин Д.Ганцэцэг шилдэг эмэгтэй гол дүр,
• О”Брайены дүрээр Гавьяат жүжигчин Ц.Төмөрхуяг шилдэг эрэгтэй туслах дүрийн номинацад тус тус өрсөлдөх юм.