Гашуунсухайт-Ганцмод боомтын нүүрс тээврийн жолооч Б.Далхжаваас одоогийн нөхцөл байдал ямар байгаа талаар тодрууллаа.

---

-Гашуунсухайт-Ганцмод боомтоор нүүрс тээврийн жолооч нарыг гаргахгүй байгаа гэсэн. Энэ үнэн үү?

-Жолооч нарыг огт гаргахгүй байгаа асуудал бол байхгүй ээ. Харин нүүрсний ажил муудсан юм. Үнэхээр дордсон ийм л нөхцөл байдалтай байна. Анх энэ оны тавдугаар сараас гэнэт нүүрсний жолооч нар багасаж эхэлсэн. Тэгээд зургадугаар сар гарангуут бараг бүх жолооч нарыг буцаасан. Орон тооны цомхотгол хийж байгаа шиг л жолооч нарын эрэлт хэрэгцээ буурсан. Өнөөдрийн байдлаар Гашуунсухайтад цөөхөн компанийн хэдхэн машин явж байна. Хамгийн их явж байгаа компани нь “Энержи Ресурс”. “Мак”, “Говь-Хангай” компаниудаас хэдхэн машин явж байгаа. Манай хил дээр өмнө нь хамгийн оргил үедээ нэг өдөрт 1500 машин явдаг байлаа. Ер нь дунджаар 700 машин Хятадын тал руу нүүрс ачаад ордог байсан.

– Тэгвэл одоо өдөрт хэдэн машин явж байна вэ?

-Одоо өдөрт Гашуунсухайтын боомт дээр 20-30 машин явж байна. Хамгийн ихдээ л 30 машин явдаг. Дунджаар 20 машин тээвэр хийдэг гэж ойлгож болно. Ихэнх жолооч нар буцсан. Зарим нь баруун хил рүү нүүрсний тэрэг барихаар явсан. Ер нь манай нүүрсний ажил цаг хугацааны асуудал байдаг юм шиг ээ. Нэг хэсэг сайжирч байгаад эргээд муудчих юм. Одоо бид сайжрах цагийг нь хүлээхээс өөр сонголт алга. Бидэнд байгаа мэдээллээр бол Ганцмодонд нүүрс нь овоороод байгаа учраас татах нь удааширсан гэсэн. Нүүрсний ханш буурсан нь ч гэсэн одоогийн нөхцөл байдалд нөлөөлсөн.

-Энэ нөхцөл байдал нүүрсний жолооч нарт хамгийн их хүндрэлтэй байна уу?

-Маш их хүндрэлтэй байгаа. Нүүрс урагшаа гарахгүй болохоор бид ажилгүйчүүдийн эгнээнд шилжиж байгаа гэсэн үг. Мэдээж ажилгүй хүн ямар ч орлогогүй шүү дээ. Хамгийн гол нь банкны зээлээ төлж чадахгүй хүндрэл бэрхшээл үүссэн. Юуг нь нуух вэ. Бараг ажилгүй болсон нүүрсний жолооч нар ар гэрээ ямар мөнгөөрөө тэжээх вэ. Оюутны сургалтын төлбөр, байрны лизинг, түрээс, өдөр тутмын урсгал зардал гээд яриад байвал дуусахгүй хүндрэл, бэрхшээлтэй нүүр тулж байна даа.

-Жолооч нарыг буцаахдаа ямар тайлбар хийсэн бэ?

-Гэртээ харьж амраад намраас ирээрэй, бид дуудна гээд жолооч нарыг буцаасан даа. Ганц модонд байгаа нүүрс сайн татагдаад нэмж гэрээ орж ирэхээр ажил сайн болно гэсэн. Өмнө жил нүүрсний ажил үнэхээр сайн явж байсан. Энэ жил үнэхээр муу байна. Ёстой амьтай төдий гэхэд хилсдэхгүй байх. Компаниас хятадууд нүүрс авахгүй байна гэж хэлдэг. Мэдээж нүүрсний ханш буухаар тээврийн хөлс багасна шүү дээ. Энэ нь нүүрсний компаниудад ашиггүй. Тиймээс нүүрсний ажил зогсохоос өөр сонголтгүй болдог. Нэг ёсондоо хятадууд нүүрсээ хангалттай авсныхаа дараа ханшаа бууруулах гэдэг юм шиг байна лээ. Тэгэхээр манай талын компаниудад ямар ч ашиггүй. Тэгээд сайн цаг ирэхийг хүлээгээд сууж байна даа.

 

А.Даваадулам