Японы баруун өмнөд нутагт орших Шинмоэдакэ галт уул дахин дэлбэрч, галт уулын тогооноос 5500 м-ийн өндөрт үнс нурам цацагджээ. Кагошима, Миязаки мужуудыг дамнан оршдог Киришима нурууны идэвхтэй галт уул пүрэв гаргийн 04:53 цагт дэлбэрсэн байна. Улмаар долоодугаар сарын 3-наас хойш анх удаа үнс нурам нь 5 мянга гаруй м-ийн өндөрт цацагдсаныг орон нутгийн цаг уурын ажиглалтын албаныхан мэдээлжээ.

Үнс нурам пүрэв гаргийн өглөөний 05:23 цагийн байдлаар 4500 м өндөрт цацагдсан байна. Харин галт уулын томоохон чулуулаг, пирокластик урсгал ихээр ажиглагдаагүй байна. Одоогоор Японы таван шатлалт хэмжүүрээр гуравдугаар түвшний түгшүүрийг зарлаад байгаа бөгөөд энэ нь галт уул руу ойртож болохгүй гэсэн үг юм.

Галт уулын чулуулаг тогооноос 3 км-ийн зайд, пирокластик урсгал 2 км-ийн зайд байгаа тул сонор сэрэмжтэй байхыг албаныхан сануулж байна. Мөн шаардлагагүй тохиолдолд гадуур гарах, үнс нурам унасан байх магадлалтай газруудад авто машинаар зорчихгүй байхыг зөвлөжээ.

Түүнчлэн хөрш зэргэлдээх хотуудад галт уулын их хэмжээний үнс нурам цацагдсан нь батлагдсан гэж орон нутгийн эрх баригчид мэдэгдсэн байна. Мэргэжилтнүүдийн үзэж байгаагаар, бага зэргийн хур тунадас орсноор тунадаснаас үүдэлтэй гамшиг нүүрлэж болзошгүй тул үнс нурмыг хурдан арилгах нь чухал юм.

 

Э.Хулан