Балбын түр ерөнхий сайд Сушила Карки нь коммунистууд болон төвчүүдийн засгийн газрыг унагасны дараа эсэргүүцлийн жагсаалд оролцогчдын Dis­cord цахим сүлжээний санал хураалтаар сонгогдсон бөгөөд томилогдсоныхоо дараа анх удаа олон нийтэд зориулан үг хэлж “Би зургаан сарын дараа, улс оронд сонгууль явуулж, шинэ засгийн газар байгуулагдмагц огцорно. Би энэ албыг хүсээгүй. Намайг зөвшөөрүүлэхэд гудамжны дуу хоолой нөлөөлсөн Шинэ сонгуулийг ирэх оны гуравдугаар сарын 5-нд явуулахаар төлөвлөж байна. Бид “Z-т үеийнхэн“-ий сэтгэлгээнд нийцэж ажиллах ёстой. Тэд авлигыг эцэслэх, сайн засаглалыг бий болгох, эдийн засгийн тэгш байдлыг хангахыг шаардаж байна” гэж мэдэгдэв. Тэрээр энэ сарын 12-ны баасан гаригт түр ерөнхий сайдын албыг хүлээн авсан юм.

Өмнөх ерөнхий сайд, “Маогийн марксист нам” гэгддэг “Балбын нэгдсэн марксист-ленинист нам”-ын коммунист удирдагч Кхадга Прасад Шарма Оли нь өнгөрсөн долоо хоногт хоёр өдөр үргэлжилсэн иргэдийн ширүүн эсэргүүцлийн дараа огцорсон бөгөөд хамгийн сүүлийн мэдээллээр энэ үймээнээр 72 хүн амиа алдаад байгаа юм.

Жагсагчид ерөнхий сайдыг огцорсны дараа ч эсэргүүцлээ зогсоолгүй хэдэн улстөрчийн байшинг сүйтгэж, парламентын байрыг шатаасан юм. Иймээс авлигын эсрэг тэмцэгч гэдгээрээ нэрд гарсан Сушила Каркиг Dis­cord сүлжээгээр хэд хэдэн нэр дэвшигчдийн дундаас иргэд сонгож, ерөнхий сайд болгожээ.

Сушила Карки нь 2009–2017 онд Дээд шүүхийн шүүгчээр, сүүлийн жилд нь тус шүүхийн даргаар ажиллаж байсан. Огцорсныхоо дараа тэрээр хоёр ном бичсэн бөгөөд «Шүүгч» нэртэй намтар болон «Шорон» нэртэй роман хэвлүүлжээ. Карки нь Непалын Дээд шүүхийн түүхэнд анхны эмэгтэй дарга болж байсан бол одоо улсынхаа анхны эмэгтэй ерөнхий сайд болж байна. Одоо Карки болон түүний засгийн газрыг хууль дэг журмыг сэргээх, парламентын байр болон жагсагчид сүйтгэсэн бусад барилгыг дахин барих, мөн “Z-т үеийнхэн”-ийг тайвшруулж, тэдний шаардсан өөрчлөлтүүдийг хийх зэрэг амаргүй даалгаврууд хүлээж байна. Сушила Карки 1952 онд төрсөн одоо 73 настай, ардчилал, шударга ёсны төлөө ажиллаж ирсэн хуульч, улстөрч юм

 

Г.АМАРСАНАА