Берлинд болсон Украины ерөнхийлөгчийн Дональд Трампын тусгай төлөөлөгчидтэй хийсэн уулзалтын дараа Европын гол удирдагчид Зеленскийтэй уулзсаны дараа “Украинд найдвартай энх тайван тогтоохын тулд Европоор ахлуулсан, АНУ-ын дэмжлэгтэй олон үндэстний цэргийн бүлэг байгуулж, оруулах ёстой. Уг хүчний зорилго нь Украины армийг сэргээн бэхжүүлэхэд туслах, агаарын орон зайг хамгаалах, тэнгисийн аюулгүй байдлыг хангах, шаардлагатай тохиолдолд Украины газар нутагт үйл ажиллагаа явуулахад оршино.Украины газар нутгийн асуудал бол хамгийн төвөгтэй сэдэв бөгөөд үүнийг зөвхөн Украин өөрөө шийдэх ёстой. Олон улсын хүлээн зөвшөөрсөн хил хязгаарыг хүчээр өөрчлөх ёсгүй. Газар нутгийн талаарх аливаа шийдвэр нь найдвартай аюулгүй байдлын баталгаа хэрэгжиж эхэлсний дараа, зөвхөн Украины ард түмний шийдвэрээр гарна.

Мөн шаардлагатай тохиолдолд ерөнхийлөгч Зеленскийн ард түмэндээ хандах шийдвэрийг Европ дэмжинэ” гэж заасан хамтарсан мэдэгдэл гаргав. Уг мэдэгдэлд Германы канцлер Фридерик Мерц, Францын ерөнхийлөгч Эммануэль Макрон, Польшийн ерөнхий сайд Дональд Туск, Италийн ерөнхий сайд Жоржиа Мелони, Их Британийн ерөнхий сайд Кир Стармер, Европын Комиссын тэргүүн Урсула фон дер Ляйен нар гарын үсэг зуржээ.

Г.АМАРСАНАА