Тээврийн цагдаагийн албанаас хяналтын камераар илрүүлсэн болон иргэдийн оролцоотойгоор зам тээврийн зөрчлийг илрүүлэх боломжтой “Цахим замын цагдаа” фэйсбүүк хуудас, “E-POLICE” аппликэйшний талаар өнөөдөр мэдээлэл хийсэн юм.

Тээврийн цагдаагийн албаны урьдчилан сэргийлэх хэлтсийн ахлах мэргэжилтэн Б.Лхагважаргал:

“Иргэн бүр цагдаа уриан дор” иргэд Камерын хяналт байхгүй, цагдаагийн алба хаагч хяналт тавих боломжгүй ялангуяа орон сууцны хороолол дундах замуудад гарсан зөрчилийг Цахим замын цагдаа фэйсбүүк хуудсанд илгээх боломжтой. Өдөрт 40-50 зөрчил ирдгээс байршил, цаг, он сар өдөр зөрчлийн товч утгыг бүрэн ирүүлсэн 10 гаруй зөрчлийг өдөртөө тооцож хариу ирүүлдэг. Иргэдээс ихэвчлэн урсгал сөрсөн, машинаа зогсоолд тавиагүй зөрчлүүд ирдэг” гэв.

Замын хөдөлгөөний удирдлагын төвийн олон нийт, сургалт судалгаа хариуцсан мэргэжилтэн Х.Гансүх:

“Замын хөдөлгөөнд оролцож буй жолооч нарын хувьд урсгал сөрөх, тэмдэг тэмдэглэгээ зөрчих, зогс шугам давж зогсох, уулзвар гарц хаах, уулзварт давхар эргэх, эгнээ хааж зогсох, эгнээ байр буруу эзлэх, гэрлэн дохио зөрчих гэх мэтээр замын хөдөлгөөний дүрмийг ихээр зөрчдөг. Үүний улмаас ЗОХИОМОЛ түгжрэл үүсч, хөдөлгөөний ачааллыг ихээр бий болгож байна. Тиймээс замын хөдөлгөөний соёлыг дээшлүүлэх, зөрчлийг бууруулах, иргэдийн оролцоо, хяналтыг нэмэгдүүлэх, болзошгүй аюулаас урьдчилан сэргийлэх зорилгоор Замын хөдөлгөөний удирдлагын төв, Тээврийн цагдаагийн албатай хамтран “E-Police аппликейшнийг гарган ажиллаж байгаа юм. Ухаалаг буюу I Phoneболон Android утастай хүн болгон Энэхүү аппликейшнийг ашиглан зөрчлийг илгээхболомжтой юм.Одоогоор 15000 орчим хэрэглэгч энэ аппликейшныг гар утсан дээрээ суулган хэрэглэж байна.

Иргэд, олон нийт E-POLICE аппликейшнийг ашиглан иргэдээс нийт 7,000 орчим зөрчлийн мэдээлэл ирсэн ба замын хөдөлгөөний дүрэм зөрчсөн нийт 3838 зөрчлийг илрүүлсэн. Гол нь иргэд нотлох баримтын түвшинд буюу тухайн зөрчлийг тодорхой харуулсан зургийг явуулах ёстой” хэмээв.

Камерын хяналт тавьснаар нийт 150 уулзварын 80-ынх нь гэрэл дохиог онлайнаар шууд удирдан зохион байгуулдаг байна. Камер болон аппликэйшн ашиглан өдөрт нэгдүгээр эгнээгээр явсан 3,000-5,000 орчим зөрчил, хурд хэтрүүлсэн зөрчил 500-1,000 зөрчил илрүүлдэг аж.

“E-POLICE” АППЛИКЭЙШНИЙГ АШИГЛАН ДАРААХ ЗӨРЧЛҮҮДИЙГ МЭДЭЭЛЭХ БОЛОМЖТОЙ

• Түр болон удаан зогсохыг хориглосон газарт зогссон, тэмдэг тэмдэглэл зөрчсөн
• Явган хүний зам, гарч, ногоон байгууламж дээр зогссон
• Явган хүний зам, хөвөө, зорчих хэсгийн гадна талаар явсан
• Урсгал сөрсөн
• Үргэлжилсэн цагаан шугам давж зүүн гар тийшээ эргэсэн, буцаж эргэсэн
• Эгнээ байр буруу эзэлсэн
• Гэрлэн дохио зөрчсөн
• Улсын дугаар арилсан, үзэгдэх байдал муудсан
• Утаа хэт ихээр ялгаруулсан / бүрэн бус/

Б.САРУУЛ