Эрүүл мэндийн яамнаас ээлжит мэдээллээ хийлээ. Дэлхий дахинаа коронавирус нь 216 улс орон, нутаг дэвсгэрт бүртгэгдэж, 10400000 хүн өвчилж, 507000 хүн нас барсан байна.

---

ХӨСҮТ-ийн захирал Д.Нямхүү

Зургадугаар сарын 29-ны өдөр 357 хүний сорьцонд шинжилгээ хийхэд бүгдэд нь коронавирус илрээгүй. ХӨСҮТ-д 45 хүн эмчилгээнд байна. 11 хүн хүндэвтэр байна. 2 жирэмсэн эх коронавирусийн халдвартай байна. Өнөө өглөө эдгэрсэн ээж ХӨСҮТ-д амаржиж, охинтой боллоо.

ЭМЯ-ны Шуурхай удирдлагын газрын дарга Д.Нарангэрэл

Коронавирусийн цар тахал бол гамшиг юм. Амны хаалт зүүх, хүн хоорондын зай барих, гараа сайтар угаах нь гамшгаас сэргийлэх жор юм гэж ДЭМБ-аас анхаарууллаа.” Сүүлийн 24 цагт 200,000 гаруй хүн шинээр өвчиллөө. АНУ, Бразид, Энэтхэгт халдварын тохиодол хамгийн олон бүртгэгдсэн.Халдварт өвчний математик тооцооллын төвийн судлаачид дэлхийн нийт хүн амын 5 хувь нь коронавируст халдвараар өвчлөх магадлалтай гэсэн тооцоолол хийсэн байна. “Цар тахал буурах болоогүй, дэлхийн бүх улс орны өмнө тулгарах асуудал боллоо. Хүн бүр коронавируст халдвараар өвчлөх эрсдэлтэй. Гэхдээ хүн бүр өөрийгөө болон бусдыг эрсдлээс хамгаалах боломжтой” хэмээн ДЭМБ-ын захирал онцолж хэллээ. ОХУ-д өчигдөр 6,719 хүн шинээр өвчилж, 59 хүн нас барсан байна. Манай олон аймагтай хил залгаа бүс нутгуудад өвчлөл нэмэгдсэн. Тувад нийт өвчлөлийн тоо 4,361 болсон байна.

ЭМЯ-ны Эмнэлгийн тусламжийн газрын дарга Я.Буянжаргал

Нэгдүгээр сараас хойш улсын хэмжээнд 11031 иргэнийг тусгаарлан ажиглагдсан. Улсын хэмжээнд давхардсан тоогоор 25611 сорьцонд шинжилгээ хийсэн. 29 байранд 2174 иргэн тусгаарлагдаж байна. 5 хүртэлх насны хүүхэд 103, жирэмсэн эх 46, хорт хавдартай 23 хүн байна. Гэрийн тусгаарлалтад нийслэлд 504 иргэн байна.

ХӨСҮТ-д тусгаарлагдаж байсан эх өчигдөр амаржлаа. 3.6 кг жинтэй охин төрлөө. Эх, нярайн бие сайн байна.

Х.ЕСҮ