Монгол Улсын Зэвсэгт хүчин хуулиар хүлээсэн үндсэн чиг үүргийнхээ зэрэгцээ улс орны бүтээн байгуулалт болон сүүлийн жилүүдэд байгаль орчныг хамгаалах, зүй зохистой ашиглах, нөхөн сэргээх, ойжуулах чиглэлээр идэвхитэй ажиллаж Зэвсэгт хүчнийхээ түүхийн хуудсыг улам бүр баяжуулсаар байна.

Цэргийн хангалт үйлчилгээний газрын экологи уул уурхайн алба нь цэрэг, батлан хамгаалахынзориулалтаар ашиглагдаж, хөрсний эвдрэлд орж орхигдсон Зэвсэгт хүчний 337, 350 дугаар ангийн эзэмшил 120 га талбайд техникийн болон биологийн нөхөн сэргээлт хийх төслийг боловсруулан батлуулж ЗХЖШ-ын даргын тушаалаар нөхөн сэргээлтийн ажлыг 2015 оны дөрөвдүгээр сарын нэгний өдрөөс эхлэн хэрэгжүүлж эхэлсэн бөгөөд өнөөдрийг хүртлэхи хугацаанд нийт 120 га талбайг нөхөн сэргээж 700 ширхэг мод тарилаа.

Техникийн нөхөн сэргээлтийг Зэвсэгт хүчний 014 дүгээр ангийн 50 гаруй цэргийн алба хаагч 25 нэгж техниктэйгээр, биологийн нөхөн сэргээлтийг ЗХЖШ-ын ЦХҮГ-ын экологийн албаны бие бүрэлдэхүүн04 дүгээр сарын 01-ээс эхлэн хийж гүйцэтгэсэн бөгөөд өнөөдөр хүлээлгэн өглөө. Зэвсэгт хүчний бие бүрэлдэхүүн өөрийн нөөц бололцоонд тулгуурлан хийж гүйцэтгэсэн анхны байгаль орчны нөхөн сэргээлтийн ажил боллоо. Хүлээлгэн өгөх арга хэмжээнд ЗХЖШ-ын дарга дэслэгч генерал Ц.Бямбажав, ЗХЖШ-ын ЦХҮГ-ын дарга Бригадын генерал Д.Даваа, ЗХЖШ-ын ЕЗЦК-ын дарга Бригадын генерал Р.Сүхбат, ЗХЖШ-ын АУГ-н дарга хурандаа Д.Ганзориг болон албаны бусад хүмүүс, Зэвсэгт хүчний 014, 337, 350 дугаар ангийн удирдлага бие бүрэлдэхүүний төлөөлөл оролцлоо.

ЗХЖШ-ын бүтцэд экологи уул уурхайналбыг 2011 онд байгуулж байгаль орчны чиглэлээр нилээдгүй ажлуудыг хийж гүйцэтгээд байгаа бөгөөд Зэвсэгт хүчний анги, байгууллагууд“Бүх нийтээр мод тарих үндэсний өдөр”-ийг жил бүр уламжлал болгон зохион байгуулж 2011-2014 онуудад нийт 217897 мод, бут, сөөгийг тарьж арчилан хамгаалж байна.

Зэвсэгт хүчний 310, 311 дүгээр ангиудад экологийн тасгууд ойн цэвэрлэгээ, ойжуулалт нөхөн сэргээлтийн ажлуудыг хийж гүйцэтгэхээс гадна “Энхийг сахиулагчдын цэцэрлэгт хүрээлэн” байгуулсан. Тус хүрээлэнгийн дэргэд мод үржүүлгийн газар байгуулж анхны тарьцаа нөхөн сэргээлт хийгдсэн талбайдаа тарьлаа. 2010 оноос хойш нийт 230 гаруй га-д 250 мянга ширхэг тарьцаар ойжуулалтын ажлыг хийж гүйцэтгээд байна.

“ЗХЖШ, НЗДТГ хоорондын хамтран ажиллах санамж бичиг”-ийг байгуулж, санамж бичгийн хүрээнд Нийслэлийн ногоон бүс болон голуудын ай сав газрын цэвэрлэгээний ажилд жил бүр оролцож байна.

Цаашид ЗХЖШ нь байгаль орчныг хамгаалах, ойжуулах, нөхөн сэргээх ажлуудыг байгаль орчны чиглэлээр үйл ажиллагаа эрхэлдэг төрийн болон төрийн бус байгууллагууд, олон улсын төсөл, хөтөлбөрийн газруудтай хамтран зэвсэгт хүчний бие бүрэлдэхүүнд байгаль орчныг хамгаалах, зүй зохистой ашиглах мэдлэг олгох, эвдэрсэн газрын нөхөн сэргээлт хийх, ойжуулалт, ногоон байгууламжуудыг шинээр байгуулах чиглэлээр түлхүү анхаарч ажиллахаар төлөвлөн ажиллаж байгаа юм.