СУИС-ийн ДДУС Монголын дизайнерүүд болон үндэсний үйлдвэрлэлийг олон улсад сурталчлах, гадаад улс оронтой хувцас загвар, маркетингийн судалгаа, бизнесийн хамтын ажиллагааг өргөжүүлэх, загварын шүүмж судлалын судалгааны чиглэлийг үүсгэн хөгжүүлэх зэрэг үйл явцыг дэмжих зорилгоор бүс нутгийн хувцас загварын үйлдвэрлэлийн салбарт тэргүүлэгч БНСУ-д төвтэй Солонгос, Хятадын хамтарсан хувцас загвар судлал, үйлдвэрлэлийн академи, Солонгос улсын хувцас загварын бизнесийн холбоотой хамтран энэ сарын 25-ны өдрөөс 27-ны өдөр хүртэл олон улсын хувцас загвар судлалын эрдэмтэн судлаачид, дизайнерүүдийн уулзалт, эрдэм шинжилгээний хурал, үзэсгэлэн, загварын шүүмж судлалыг зохион байгууллаа.

Энэ удаагийн үйл ажиллагаа “The Creative Asia” сэдвийн дор явагдах бөгөөд Монгол Улс, БНСУ, БНХАУ, ОХУ, Узбекистан, Хонг-Конг, Вьетнам, Тайвань, Пакистан зэрэг есөн орны хувцас загвар судлал, загварын бизнес, маркетингийн эрдэмтэн судлаачид, нийт 101 уран бүтээлч дизайнерууд бүтээлээ туурвин оролцож байгаа аж.

ДДУС-ийн дизайн урлагийн профессор Б. Мөнхцэцэг тус арга хэмжээний талаар “Бид 2008 онд анх Монголд ийм арга хэмжээ зохион байгуулж байсан. Тэр үед харьцангуй цөөн улс орнууд оролцсон. Үйл ажиллагааны маань гол зорилго нь азийн бүс нутгийн томоохон хувцас загварын байгууллагуудтай монголын дизайнерүүдийг холбож, цаашид хамтран ажиллах боломж бололцоог хангах юм. Энэ удаад бид загварын шүүмж судлалыг эхлүүлэн зохион байгуулж байгаа нь дизайнерүүдэд үр өгөөжтэй мөн илүү хөгжих боломжийг нь нээж өгнө гэж үзэж байна” гэв.

Н.ЭНХЖИН