мэдээ
СУРВАЛЖИЛГА: Яаралтай тусламжийн тасагт өдөрт 250-300 хүүхэд үйлчлүүлж байна DNN.mn

Админ
2024 оны 12 сарын 17

110

Улаанбаатар хотын агаарын бохирдол, хүн амын бөөгнөрөл, цаг агаарын өөрчлөлтөөс шалтгаалан ханиад томуу ихээр нэмэгддэг. Бага насны хүүхдийн ханиад, амьсгалын замын өвчлөл хэр байгааг ЭХЭМҮТ-өөс сурвалжиллаа.
2024 оны 12 дугаар 12-ны өглөөний 09:00 цагт очиход эмнэлгийн хүлээн авах хэсэгт хүүхдээ тэвэрсэн эцэг эхчүүд “ягаан дэвтэр” гэгдэх “Эх хүүхдийн эрүүл мэндийн дэвтэр”-ээ барьчихсан урт дараалал үүсгэсэн байв. Гаднаас орж буй хүмүүсийг гадуур хувцсаа өлгүүлж, улавч, амны хаалтаа зүүхийг эмнэлгийн ажилтан анхааруулсаар байлаа. Царай нь цонхийсон, ханиалгасан, уйлсан, халуурч бүлээрсэн хүүхдээ тэвэрсэн эцэг эхийн цуваа тасарсангүй. Төрөөд удаагүй гэмээр нярай хүүхдээ тэвэрсэн ээжүүд ч харагдана. Коридорт хүүхэд бөөлжиж байх нь ч элбэг. Ажлын өдөр хүний хөлд дарагдаастай, эмнэлгээ үйлчлэгч нар тасралтгүй цэвэрлэх аж. Хүүхдээ үзүүлэх гэж дор хаяж хоёроос гурвуулаа ирсэн харагдлаа.
“Хүүхдийн зөвлөх поликлиник”-т ханиад томуунаас гадна бусад төрөлжсөн нарийн мэргэжлийн эмч нэг хүүхдэд 10-15 минутын хугацаа зарцуулж өвчний явц, зовиурыг асууж тодруулан үзлэг хийдэг учраас ингэж оочерлосон байна гэж эмнэлгийн ажилтан хэлсэн юм.
Эцэг эхчүүд: Дархлааг нь яаж ч дэмжсэн хүйтний улиралд ханиад хүрчихээд байна
Хүүхдээ тэврэн дарааллаа хүлээх ээж А.Жаргал: “Хүү маань одоо хоёр ой өнгөрч байгаа. Цэцэрлэгт явдаг. Өнгөрсөн нэг дэх өдрөөс халуурч эхэлсэн. Халууны шилээр үзтэл 38 хэм хүрч байсан. Гэрт байсан халуун бууруулах лааг хийгээд түргэн дуудаад үзүүлтэл хоолой нь жаахан улайсан байна гээд эм бичиж өгсөн. Нэг хэсэг гайгүй болж байгаад өчигдөр оройноос дахиад халуурч эхэлсэн. Тэгээд өнөөдөр “Эх нялхас”-т үзүүлэх гээд байж байна. Уг нь хүүгээ өнгөрсөн зун хөдөө авч явж, аль болох дархлааг нь дэмжсэн ч хүйтний улиралд ханиад хүрчихээд байна. Өчигдөр орой бас суулгах шинж тэмдэг илэрсэн. Энэ долоо хоногт би ажлаасаа чөлөө аваад хүүгээ гэртээ харж байна. Ханиад нь эдгээгүй болохоор цэцэрлэгт нь явуулж болохгүй аргагүйн эрхэнд гэртээ асарч байна. Өнөөдөр эмчид үзүүлээд болохгүй бол хэвтэж эмчлүүлнэ гэж бодож байна. Ер нь үзүүлж байгаа хүүхдүүдийг харахад ихэнх нь цэцэрлэгийн насны хүүхдүүд байна” гэсэн юм.
Чингэлтэй дүүргийн иргэн Т.Саруул: “Охин маань одоо зургаан настай. Энэ жил сургуульд орсон. Охинд маань өчигдөр оройноос ханиадны шинж тэмдэг илэрсэн. Шөнөжингөө ханиалгасан болохоор бие нь ямар ч тамиргүй болсон байна. Тэгээд эмчид үзүүлье гэж бодоод түгжрэлээс өмнө эрт гараад эмнэлэг дээр хүрээд ирлээ. Манайх хотод нүүж ирээд хоёр жил болж байна. Хөдөө байхдаа охин маань ханиад хүрдэггүй байсан. Гэтэл хотод ирээд ялангуяа өвөл хүйтрээд утаа ихсэх үед шууд ханиад хүрдэг болчихсон. Энэ нь агаарын бохирдолтой л холбоотой гэж бодож байгаа. Хөдөө байсан болохоор охиноо дархлаа сайтай гэж боддог ч хотын утаа, хүйтний үед яах аргагүй ханиад хүрчихлээ. Ер нь хүйтэрч эхэлснээс хойш хүүхдийн эмнэлгийн ачаалал нэмэгдэж байгаа юм шиг байна. Хэрэв удаан явах юм бол уушги руугаа орох эрсдэлтэй байдаг гэж сонссон. Тэгэхээр нь айгаад оочерлоод ч хамаагүй үзүүлье гэж бодлоо” гэв.
Биднийг ярилцаж байх зуур эмчид үзүүлээд гарч ирсэн хүүхдүүд зарим нь уйлсан, зарим нь айгаад үзүүлэхгүй гээд гараад гүйж байгаа нь ч харагдлаа.
ХӨСҮТ долоо хоног бүр аймаг, нийслэлээс цуглуулсан сорьцод шинжилгээ хийдэг. Өнгөрсөн долоо хоногийн мэдээгээр 223 сорьцод шинжилгээ хийсний 48 сорьц буюу 21.5 хувьд нь амьсгалын замын синцитиал вирус илэрсэн. Энэ нь томуу төст өвчний үүсгэгч илүү байгааг харуулж байгаа юм. Харин томуугийн А хүрээний “H1N1” вирус 12 тохиолдол буюу 5.3 хувьд нь илэрсэн. “Ковид-19”-ийн вирус 11 буюу 4.9 хувьд нь илэрсэн гэсэн мэдээллийг өгсөн. Харин томуу, томуу төст өвчнөөр өвчлөгсдийн 47.1 хувь, амьсгалын замын цочмог хүнд халдварын 72 хувийг тав хүртэлх насны хүүхдүүд эзэлж байна. Тэгэхээр энэ хүндрэлээр өвдөж байгаа эрсдэлт бүлэг нь хүүхдүүд болж байна. Үүнийг өнгөрсөн долоо хоногийн мэдээтэй харьцуулахад 8.5 хувиар нэмэгдсэн гэсэн мэдээллийг өгсөн юм.
Тиймээс ханиад томууны дэгдэлт өндөр байгаа энэ цаг үед ард иргэд гадуур явахдаа амны хаалтаа зүүж, гараа тогтмол угаахыг эмнэлгийн мэргэжилтнүүд болон холбогдох байгууллагуудаас анхааруулсан юм.
Ц.Пүрэвсүрэн: Хүүхдүүдийн дунд гүйлгэлт, суулгалт, уушгины хатгаа түлхүү байна
ЭХЭМҮТ-ийн хүүхдийн эмнэлгийн Яаралтай тусламжийн тасгийн эмч Ц.Пүрэвсүрэнгээс цаг үеийн байдлын талаар тодруулсан юм.
-Яаралтай тусламжийн тасагт өдөрт хэд орчим хүүхэд хандаж байна вэ?
-Манай тасагт энэ сараас эхлэн ажлын өдрүүдэд хоногт 250 орчим, амралтын өдрүүдэд 300 гаруй хүүхэд үйлчлүүлж байна. 60-70 орчим хувь нь амьсгалын замын эмгэгүүд. Тэр дундаа гүйлгэлт суулгалт, уушгины хатгаа түлхүү байна. Халдварын хувьд томуу, томуу төст өвчний вирус ихсэж байна. Өмнөх сартай харьцуулахад энэ сард хүндрэл нь нэмэгдэж байна. Зарим тохиолдолд хоёроос гурав хоноод хатгалгаа болох нь энүүхэнд. Гэхдээ энэ нь хүүхдийн дархлаанаас хамаардаг. Амбулатори шөнө ажилладаггүй учраас ажлын цагаас хойш манай тасгийн ачаалал илүү нэмэгддэг.
–Хүүхдүүдийн дунд ямар төрлийн шинж тэмдэг түлхүү илэрч байна вэ?
-Хүүхдүүд ихэвчлэн өндөр халуурч ханиалгасан, нус гоожсон, хоолонд дургүй болсон, нурмайсан, бөөлжсөн зэрэг шинж тэмдэг илэрч байна. Нөгөө талаар суулгалт, гүйлгэлттэй хүүхэд их байна. Манай тасаг өдөрт ирж байгаа хүүхдүүдээ бүгдийг нь үнэлээд шаардлагатай заалтууд гарсан тохиолдолд хэвтүүлж эмчилдэг. Заалтгүй хөнгөн байвал гэрээр эмчлэх зааварчилгаа өгөөд явуулдаг.
-Эцэг эхчүүд хүүхдээ ханиад, амьсгалын замын өвчлөлөөс хамгаалахын тулд гэрийн нөхцөлд асаргаан дээр юуг анхаарах хэрэгтэй вэ?
-Эцэг эхчүүдэд хүүхдийнхээ суурь дархлааг дэмжих хэрэгтэй байна гэж хэлмээр байна. Хүүхдээ чанартай эрүүл хүнсээр хооллож, эрт унтуулж, гар утасны хэрэглээг нь багасгаж, стрессийн түвшинг бууруулах хэрэгтэй. Мөн халдвар хамгааллын дэглэмээ сахих, эцэг эхчүүд өөрсдөө гаднаас орж ирээд гараа угаах, хүүхдээ мөн гарыг нь угаалгаж сургах, гадуур явахдаа заавал амны хаалт зүүхийг зөвлөж байна.
Олон нийтийн газар авч явахгүй, халуун бүлээн юм сайн уулгах, гэрт нь дааруулахгүй байх арга хэмжээ авна. Хүүхэд ханиад томуу хүрлээ гэж бодоход асаргаа маш чухал байдаг. Энэ үед гэрт нь байлгаад асаргаагаа сайжруулах хэрэгтэй гэж хэлмээр байна. Тэгвэл өвчлөл нь хүндрэхгүй байх боломжтой. Өөрсдөө дур мэдэж эмийн эмчилгээ хийж болохгүй. Вирусийн цочмог халдвар нь давамгайлж байгаа учраас антибиотик эмчилгээг заавал эмчийн заалтаар хэрэглэх хэрэгтэй. Вирусийн эсрэг үйлчилдэг хэдхэн эм байдаг. Эцэг эхчүүд энэ вирусийн эсрэг эм авмаар байна” гэдэг. Тийм зүйл байхгүй. Тэгэхээр вирусийн халдвараас сэргийлэхийн тулд дархлааг нь маш сайн дэмжих хэрэгтэй гэсэн үг. Вирус нь нян, бактериар хүндэрвэл антибиотикийг эмчийн заавраар авч, эмчилгээндээ хэрэглэх ёстой.
Г.БАЛГАРМАА





Ж.Соронзонд 24 сая төгрөгийг нөхөн олгохоор шийдвэрлэжээ
Монгол-Оросын хамтарсан гуравдугаар сургуулийн захирал асан Ж.Соронзонгийн гомдлыг өчигдөр /2025.05.19/ нийслэлийн Баянзүрх, Сүхбаат...
8 цагийн дараа
Орхон аймагт Хууль тогтоомж сурталчлах төвийг албан ёсоор нээлээ
Монгол Улсын Их Хурлын Ерөнхий нарийн бичгийн дарга Б.Баасандорж, Улсын Их Хурлын Тамгын газрын дэд дарга Ү.Амарбат нар Орхон аймагт...
8 цагийн дараа
“Боловсролын өдөрлөг 2025” арга хэмжээ болж байна
Мэргэжлээ зөв сонгох боломжийг олгох “3L” буюу “Боловсролын өдөрлөг 2025” арга хэмжээг өнөөдрөөс эхлэн 21-ны өдрийг хүртэл Сүхбаатар...
7 цагийн дараа
Өнөөдрөөс дараах байршлуудад халуун ус хязгаарлана
Энэ зун халуун ус хязгаарлаж, дулаан хангамжийн шугамд засвар хийх хуваарь гарсан. Засварын ажлыг тавдугаар сарын 15-нд эхлүүлж, най...
7 цагийн дараа
БНХАУ 15135, Тайвань 710, БНЭУ 427, БНСУ 352 иргэнд цахим виз олгожээ
Гадаадын иргэн, харьяатын газар нь 2025 оны эхний дөрвөн сарын байдлаар нийт 25582 виз, визийн зөвшөөрлийн хүсэлт хүлээн авснаас 98....
6 цагийн дараа
Сэтгэгдлүүд