Гавьяат тамирчин Э.Цэндбаатар WBA холбооны Хойд Америкийн аваргын бүс хамгаалах тулаан мэргэжлийн боксын замналын тулааны 12 дахь тулааныг ирэх сарын 15-нд эх орондоо буюу ASA Arena хийх гэж байгаа талаар тус тэмцээний зохион байгуулагчид мэдээлэл өглөө. Энэхүү тулаан нь мэргэжлийн боксын топ дөрвөн холбооны нэг болох WBA холбооны нэр дор зохион байгуулагдаж буйгаараа онцлогтой. Гавьяат тамирчин Э.Цэндбаатар мэргэжлийн замналаа эхлүүлснээс хойш 11 тулаан хийж бүгдэд нь ялсан. Үүнээс таван тулалдаанд хүнд цохилтоор өрсөлдөгчдөө буулган авсан байдаг.

Мөн 11 тулааныхаа зургааг нь АНУ-д, гурвыг нь ОХУ-д, хоёрыг нь Хятадад хийжээ. Тэрээр мэргэжлийн тулаанаа эхлүүлснээс хойш бүх тулаанаа хилийн чанадад хийсэн. Харин мэргэжлийн карьераа эхлүүлснээс хойш анх удаа эх орондоо тулаанаа хийх гэж байна. Энэ үеэр Гавьяат тамирчин Э.Цэндбаатар “Аваргын бүсээ хамгаалах тулаанаа эх орондоо хийх гэж байгаадаа баяртай байна. Би 16 жил боксын спортод хүчээ зориулаад явж байна. Харин мэргэжлийн бокст хөл тавиад хоёр жил болсон. Энэ хугацаанд өөрийн гэсэн багтай болсон. Энэ тулаанд тулалдах өрсөлдөгчид маань хориос дээш тоглолттой, дэлхийн чансааны топ 15-д багтах тамирчид байгаа. Энэ тулааныхаа бэлтгэлийг АНУ-д хийнэ. Энэ сарын 15-нд АНУ-руу яваад хоёрдугаар сарын 10-нд буцаж эх орондоо ирнэ. Тавдугаар сард Лос-Анджелесд дэлхийн аваргын тулаанаа хийнэ. Тиймээс энэ удаагийн тулаанд заавал ёстой. Маш их хичээж байгаа. Эх орондоо тулаанаа хийх болохоор ард түмнийхээ уухайн дор заавал ялна” гэлээ.

Эх сурвалж: www.zms.mn