Одооноос дулаарч бас нэгэн гайхамшигт улирал айсуй. Ногоо халтартан, модод ногоорч эхэлж байна. Дэлхийн хойд хагаст зун айсуй. Манай өндөрлөгт хамгийн сүүлд хавар дуусч зун эхэлдэг. Дайнтай хойд хөрш нэг дайн дууссаны баярыг хөөр хөстэй тэмдэглэн өнгөрөөв. Баярын үеэр дайн байлдаан хийгээгүй буун дуугүй өнгөрөөв бололтой.

Энэ буун дуугүй хэд хоног нь цааш үргэлжлэн залуус, хүмүүс үхэж үргэдэхээ болиосой гэж хүснэм. Энхтайванд дасан дассаар энх цаг үргэлжлээсэй гэж горьдох юм. Уул нь цаг ирж байна даа. Ирж яваа цаг сайхан. Монголчууд айсуй цагийн совинд хөтлөгдөн зуны налгар өдрийг хөөр баяртайгаар төсөөлөн буй. Бид энэ зун ажил хийнэ гэж ярьж байгаа. Нөгөө том төслүүд хөдөлж ажилтай орлоготой байна гэж хүлээж байна. Бид олон жил хийнэ, бүтээнэ, сайхан болно гэж ирээдүй цаг дээр ярьцгаалаа. Одоо сүүлдээ тэгнэ гэж хэлсэн хүнээс залхталаа ингэж ярьлаа. Бид тэгнэ гэж хэлж байгаа хүнийг үзэн ядмаар удаан, юу ч бүтээлгүй сууцгаалаа.

Одоо ингэхээ баймаар, шууд л бүтээж эхэлмээр байна. Үнэхээр залхаж байна, үнэхээр ядуу хоосон байсаар залхлаа. Бас ядруу доожоогүй орны иргэд байхаас, нэг дарга нь эс үйлдлээр мэдэн будилж бүтээн байгуулахаас зайлсхийж байгааг хараад, тэр нь монголчуудыг хувхай хоосон байлгадгийг бодохоос дургүй хүрч байна. Цаг ирж байна, бидний цаг ч цуг ирж байна гэсэн горьдлогоор л тэссээр байгаа.

Одоо хаврын ногоон бороо аажуухан шивэрч эхлээсэй. Чийг ханхлан агаар цэвэршиж бүх юм залуу болсон шиг, бүх юм дахин эхэлж байгаа шиг болоосой. Бид өглөө босоод ажилдаа гарч оройдоо эцэж цуцан инээд хөөр цацруулан гэртээ орж ирдэг болоосой. Улсаараа баяжиж хүнд дээрэлхүүлдэггүй болоосой. Уул нь цаг ирж байгаа даа.