Улаанбаатар хотод хүнсний гол нэрийн зарим барааны үнэ өнгөрсөн сарынхаас нэг, өмнөх долоо хоногийнхоос 0.7 хувиар өсөөд буйг статистикийн байгууллагаас мэдээлэв. Төрлөөр нь авч үзвэл мах, төмс, хүнсний ногооны үнэ хамгийн өндөр хувиар өссөн байна. Өнгөрсөн сард нэг кг байцайны дундаж үнэ 3245 төгрөг байсан бол одоо 11.4 хувиар буюу 370 гаруй төгрөгөөр нэмэгджээ. Нэг кг луувангийн үнэ 8.3 хувиар өсөж 4035, сонгиных 6.7 хувиар нэмэгдэн 4794, төмснийх зургаан хувиар дээшлэн 1446 төгрөгт хүрчээ. Адуу, хонь, ямааны махны үнэ тогтвортой байгаа бол үхрийнх 1.3-2.1 хувиар өсөв. Өчигдрийн байдлаар нийслэл дэх хүнсний зах, худалдааны төвүүдэд үхрийн нэг кг цул мах 23 686, ястай нь 20 716 төгрөгийн ханштай байлаа.

ЭХ СУРВАЛЖ: Unuudur.mn