Өнөөдөр АНУ-ын Төрийн департмент Монгол Улсын 2025 оны хөрөнгө оруулалтын орчны мэдэгдлийг нийтлэн гаргалаа. 2025 оны мэдэгдэл нь Монгол Улсыг судлан сонирхож буй АНУ-ын хөрөнгө оруулагчдад Монгол Улсын бизнесийн орчны боломжууд болон учирч болох бэрхшээлүүдийн талаар тэнцвэртэй үнэлэлт дүгнэлт өгөх юм.

Түүнчлэн, Монгол Улсын 2025 оны хөрөнгө оруулалтын орчны мэдэгдэл нь Монгол Улсын төрийн байгууллагын түншүүдэд АНУ-ын болон дотоодын хөрөнгө оруулагчдад эрх тэгш бизнесийн орчинг бүрдүүлэх эх сурвалж болох юм.

2025 оны мэдэгдэлд дурдсанчлан “Монгол Улсын хөгжиж буй зах зээл, байгалийн баялаг нь хөрөнгө оруулагчдад өндөр өгөөжийг авчрах боломжтой ч, тус улсын гадаад эдийн засаг, санхүүгийн нөлөөн дэх эмзэг байдал, маргаан шийдвэрлэх үйл ажиллагааны үр дүнгүй байдал, дүрэм журам боловсруулах үед талуудын оролцох боломжийн дутмаг байдал, хөрөнгө албадан хураах эрсдэл зэргийг харгалзан үзэж болгоомжтой хандах нь зүйтэй” гэжээ.

Хувийн хэвшлийн хууль эрх зүйн орчин нь ил тод, таамаглах боломжтой байхын үнэ цэнийг Монгол Улс ойлгож, түүний ач холбогдлыг нээлттэйгээр хүлээн зөвшөөрч байгаад Америкийн Нэгдсэн Улс талархалтай хандаж байгаа билээ. Иймд Америкийн Нэгдсэн Улс Монгол Улсыг солонгорсон, амьд эдийн засгийн цохилох зүрх нь болсон, үр өгөөжтэй хувийн хэвшлийн салбарыг бий болгох олон нийтийн өмнө хүлээсэн үүргээ гүйцэлдүүлэхүйц хууль, журмыг хэрэгжүүлэхийг хөхиүлэн дэмжиж байна.

Монгол дахь Америкийн худалдааны танхимтай хийсэн уулзалтынхаа үеэр АНУ-аас Монгол Улсад суугаа Элчин сайд Ричард Л.Буанган “Монгол Улсын эдийн засгийн хөгжлийг хувийн хэвшлийнхэн түүчээлэх хэрэгтэй. Энэ хөгжилд хүрэхийн тулд хариуцлагатай, чанартай дотоодын болон гадаадын хөрөнгө оруулалтыг татаж чадах хууль, журам, хөрөнгө оруулалтын орчныг бий болгох шаардлагатай” хэмээн цохон тэмдэглэсэн юм.

Монгол Улсын 2025 оны хөрөнгө оруулалтын орчны мэдэгдлийг (англи хэл дээр) хүлээн авна уу.