Багш нар цалингаа нэмхийг шаардан жагсаад нэлээд хэд хонолоо. Энэ долоо хоногоос эхлэн орон даяар ажил хаяхыг уриалж байгаа.

Ямартаа ч нэр бүхий сургуулиуд тус уриалгад нэгдэж, энэ сарын 15-наас ажил хаяна гэдгээ илэрхийлсэн байна лээ. Мөн эмч нар ч цалингаа нэмүүлэхийг шаардсан жагсаалыг өнгөрсөн долоо хоногоос эхлүүлсэн. Үүнээс гадна ахмадууд тэтгэврийн доод хэмжээг нэм хэмээн шаардаад байгаа. Жагсаал, тэмцэл эхлүүлээд буй нь энэ жишээнүүд болохоос бус нийгмийн бусад бүлгийнхэн ч цалин бага тухай гомдол мэдүүлсээр байна.

Гэвч сүүлийн өдрүүдэд арай өөр шаардлага тавих нь дээр юм шиг санагдах боллоо. Учир нь өдрөөс өдөрт монгол төгрөгийн ханш унаж, ам.долларын ханш гэрлийн хурдаар өссөөр байна. Үүнийг дагаад өргөн хэрэглээний барааны үнэ ч нэмэгдсээр байгаа. Яаж ийгээд цалин нэмлээ гэхэд дагаад инфляци өсөж, төгрөг улам л цаас болно.

Өмнөх жишээнүүд үүнийг хангалттай батална. Ингэснээр цалин, тэтгэврийг нэмсэн ашиг огт гарахгүй. Тийм болохоор төрд байгаа хүмүүс, Засгийн газраас монгол төгрөгийнхөө ханшийг чангаруул, инфляциа багасга гэсэн шаардлага тавих нь зүйтэй. Ингэж байж л цалин, тэтгэврийн нэмэгдэл илүү бодитой болно.