Нийслэлийн хэмжээнд энэ оны арваннэгэн сарын байдлаар зам тээврийн осолд 606 хүүхэд өртөж, гэмтэж бэртсэн статистик гарчээ. Тодруулбал, 552 удаагийн зам тээврийн осолд 606 хүүхэд өртсөн байна. Үүнээс нийслэлийн Баянзүрх дүүрэгт 148, Хан-Уул дүүрэгт 126, Сонгинохайрхан дүүрэгт 102, Сүхбаатар дүүрэгт 92, Баянгол дүүрэгт 88, Чингэлтэй дүүрэгт 50 хүүхэд зам тээврийн осолд өртсөн байна.

Зам тээврийн осолд өртсөн 606 хүүхдийн 376 нь явганаар, 98 нь тээврийн хэрэгслээр зорчиж байх үедээ, 132 нь унадаг дугуй болон цахилгаан дугуйгаар замын хөдөлгөөнд оролцож явах үедээ осолд өртжээ.

Зам тээврийн ослын улмаас хүүхдийн эрүүл мэндэд хохирол учирсан 140 хэрэгт Эрүүгийн хуульд заасны дагуу мөрдөн шалгах ажиллагаа явуулан, 71 хэргийг шүүхээр шийдвэрлүүлж, буруутай этгээдэд ял оногдуулсан байна. Мөн Тээврийн цагдаагийн албаны мэдээллээр 2025 оны эхний арван сарын байдлаар улсын хэмжээнд зам тээврийн ослын шинжтэй дуудлага мэдээлэл 10 мянга бүртгэгджээ. Үүнээс зам тээврийн осол, гэмтлийн улмаас 562 иргэн амь насаа алдаж, 2990 хүн гэмтэл бэртэл авч хөдөлмөрийн чадвараа түр болон бүрэн алдсан аж. Монгол Улсын хэмжээнд бүртгэгдсэн нийт осол гэмтэлд 875 хүүхэд өртөж 60 хүүхэд амь насаа харамсалтайгаар алдсан талаар Тээврийн цагдаагийн албанаас мэдээлсэн юм.