Төсөлд нийслэлийн ЕБС-ийн дунд ахлах ангийн 3 мянга орчим сурагч хамрагдсан байна. Үүнээс гадна 1200 гаруй насанд хүрэгчдэд сонсголын эрт илрүүлгийн шинжилгээ болон сонсгол бууралтын тархалтын судалгаанд хамрагдсан байна. Төслийн хүрээнд өнөөдрийн байдлаар 3 сурагч хэнгэрэг нөхөх хагалгаанд орсон байна.

О.Даваанжин/148-р сургуулийн 7-р ангийн сурагч:

Хагалгаанд орсны дараа юм сонсоход бол өмнөхөөсөө илүү тод сонсдог болчихсон. Өмнө нь ингээд 4-өөс 5 удаа дуудуулж байж сонсдог байсан бол одоо нэгэн удаа дуудуулаад л тэгээд л аан за гээд л оччихдог.

---

Л.Сүлд-Эрдэнэ/82-р сургуулийн 9-р ангийн сурагч:

Төсөлд хамрагдахаасаа өмнө би хэнгэрэг хагархай байгааг ерөөсөө мэдээгүй. Хагалгаанд орсны дараа бол ер нь сонсгол бол гайгүй сайжирсан. Илүү муудаж болох байсан юмыг эрт нөхүүлээд, сонсголоо бүүр муудахаас хамгааллаа даа гэж бодсон доо.

Сурагчдын сонсголын эрт илрүүлгийн шинжилгээ хийгдэхэд эцэг эхчүүдийн 50 орчим хувь нь хүүхдийнхээ сонсгол бууралттайг мэддэггүй байсан гэж хариулжээ. Сонсгол гэдэг хүүхдийн сурах чадвар, өөртөө итгэх итгэл, нийгмийн харилцаанд ороход чухал нөлөөтэй юм аа. Тиймээс эцэг эхчүүд хүүхдийнхээ сонсголд анхаарч жилдээ нэг эрт илрүүлгийн шинжилгээнд хамрагдаж байхыг зөвлөж байна.

---

“Улаанбаатар хотын иргэдийн сонсгол бууралтыг анхан шатанд нь илрүүлэх шинжилгээ, оношилгооны орчныг сайжруулах төсөл (2023–2025)” нь KOICA-тай хамтран хэрэгжүүлсэн төр, хувийн хэвшлийн түншлэлийн төсөл юм.