Германы Гадаад хэргийн сайд Йоханн Вадефуль энэ сарын 23-ны мягмар гарагт “Dpa(Deutsche Presse-Agentur)” агентлагт өгсөн ярилцлагадаа “Орос улс Украинтай энхийн гэрээ байгуулсны дараа НАТО-гийн аль нэг улсад халдаж болзошгүй. Европын аюулгүй байдал гэдэг нь Оросоос ангид, аюулгүй байх асуудал юм.

Иймээс Герман улс Украинд үзүүлэх дэмжлэгээ үргэлжлүүлэх сонирхолтой байна. Кремль Украинд гал зогсоох тохиролцоог НАТО-гийн нутаг дэвсгэрт халдахдаа ашиглах талаар би одоо тодорхой зүйл яримааргүй байна. Би зөвхөн ийм үйл явдалд бэлэн байхыг л зөвлөж чадна. Иймээс Германд батлан хамгаалах хүчин чармайлтаа сулруулах шалтгаан байхгүй. Европ Кремльтэй харилцахдаа хүчтэй байр сууринаас хандах ёстой. Хэрэв Оросын арми Украинд цэргийн амжилтад хүрвэл энэ нь НАТО-д ноцтой аюул болно. Ийм учраас Украинд үзүүлэх дэмжлэг нь Европ тивийн аюулгүй байдалтай шууд холбоотой зорилт хэвээр байна.

Украинд энх тайвны байдал тогтвортой болж, Украин өөрийн ашиг сонирхлоо хамгаалж чаддаг болох тусам бүх Европт төдий чинээ ашигтай байх болно” гэж мэдэгдсэн байна. Үүнтэй төстэй үнэлгээг өмнө нь Германы Батлан хамгаалахын сайд Борис Писториус ч илэрхийлж “Орос улс Украинтай хийж буй дайнд учирсан хохирлоо нөхөж, цэргийн чадавхаа сэргээсний дараа, магадгүй 2029 он гэхэд НАТО-гийн аль нэг улсад халдаж болзошгүй” гэж мэдэгдэж байсан.

Мөн Бундесверийн оператив командлалын дарга, дэслэгч генерал Александер Золльфранк ч энэ байр суурийг дэмжиж “Орос улс бараг маргааш ч НАТО-гийн нутаг дэвсгэрт жижиг хэмжээний цохилт өгөх боломжтой. Хэрэв Москва зэвсэглэлээ үргэлжлүүлэн нэмэгдүүлбэл 2029 он гэхэд Кремль томоохон хэмжээний довтолгоо хийх шийдвэр гаргаж ч болзошгүй” гэж мэдэгдсэн юм.