Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 21.1.1-д “Захиалагч тендерийн урилгыг үндэсний өдөр тутмын сонин, худалдан авах ажиллагааны цахим систем болон хэвлэл мэдээллийн бусад хэрэгслээр нийтэд зарлан мэдээлнэ” гэж заасан байна. Хуулийн уг заалтаар өдөр тутмын сонинууд харилцагчдынхаа тендерийн материалыг хууль журмын дагуу зарлаж мэдээлдэг.

Өдөр тутмын сонинууд www.tender.gov.mn сайтаар дамжуулж тендерт оролцохдоо зах зээлийн үнээс асар бага буюу 25 дахин хямд үнээр оролцохыг Төрийн худалдан авах ажиллагааны газраас шаардаж, үнэ тогтоож өгч байгаа нь хэвлэлүүдийг алдагдалд хүргэж, хэвлэл мэдээллийн байгууллагууд цаашид оршин тогтноход хүндрэлтэй болоод байна. 250 мянган төгрөгөөр зарлагддаг тендерийг үнэ буулгаж 10 мянган төгрөгөөр мэдээлж байгааг шалгаруулж буй нь шударга бус. Гэтэл энэ байдал улам даамжирч Монгол Улсад хэрэгждэг олон улсын томоохон төсөл, хөтөлбөрүүдийг заавал www.tender.gov.mn сайтаар дамжуулж тендерийн шалгаруулалтаа зарлан мэдээл гэж байгаа нь төр хувийн хэвшлийг, тэр дунд чөлөөт хэвлэлийг шууд боомилсон үйлдэл болж байна. Учир нь, хэрэв уг тендерүүдийн шалгаруулалтыг www.tender.gov.mn сайтаар дамжуулж авбал мөн л зах зээлийн үнээс даруй 25 дахин бууруулсан үнээр авч нийтлэхээс өөр аргагүй болно.

“Худалдан авах ажиллагааны цахим системээр тендер шалгаруулалт зохион байгуулах, холбогдох мэдээллийг зарлан мэдээлэх журам”, Сангийн сайдын тушаал зэрэгт өдөр тутмын сонинд тендер шалгаруулалт нийтлэхэд босго үнэ тогтоосон тухай зүйл тусгагдаагүй байна. Ямар хууль, дүрэм, журмыг баримталж ийн өдөр тутмын сонинуудад тендер шалгаруулалтыг мэдээлэхэд зах зээлийн ханшаас хэт доогуур босго үнэ тогтоох болов гэдэг нь эргэлзээтэй байгаа тул хардлага төрүүлж байна.

Энэ бүгдийг харахад, төр хэвлэл мэдээллийн зар сурталчилгаанаас олдог орлогыг нь булаан дарамтлах замаар хяхан боогдуулж, зах зээлийн эрүүл зарчмаар оршин тогтнож ирсэн чөлөөт хэвлэлийг бүрмөсөн дарах гэсэн оролдлого гэж үзэхээс өөр замгүй болж байна.

Сангийн яам болон Төрийн худалдан авах ажиллагааны газар холбогдох журам, тушаалуудаа эргэн харж, өдөр тутмын сонины үйл ажиллагааг хэвийн явуулахад дэмжлэг үзүүлнэ үү хэмээн хүсч байна.

Монголын өдөр тутмын сонинуудын холбоо

2023.03.29